மாரி செல்வராஜ் இயக்கத்தில் துருவ் விக்ரம் நடிப்பில் உருவாகியுள்ள படம் ‘பைசன்’. பா.ரஞ்சித்தின் நீலம் ஸ்டுடியோஸ் மற்றும் அப்ளாஸ் என்டர்டெயின்மென்ட் ஆகிய நிறுவனங்கள் இணைந்து தயாரித்துள்ள இப்படத்தில் அனுபமா பரமேஷ்வரன், லால், பசுபதி, ரஜிஷா விஜயன், கலையரசன் உள்ளிட்டோர் நடித்துள்ளனர். நிவாஸ் கே.பிரசன்னா இசையமைத்துள்ள இப்படம் அர்ஜுனா விருது வென்ற தூத்துக்குடியைச் சேர்ந்த கபடி வீரர் மணத்தி கணேசன் வாழ்க்கையை மையமாக வைத்து உருவாகியுள்ளதாக கூறப்படுகிறது.

இப்படத்தின் படப்பிடிப்பு கடந்த ஆண்டு மே மாதம் தொடங்கி பல கட்டங்களாக நடந்து கடந்த பிப்ரவரி மாதம் நிறைவுற்றது. படத்தின் ஃபர்ஸ்ட் லுக் கடந்த மார்ச் மாதம் வெளியானது. படம் அக்டோபர் 17ஆம் தேதி தீபாவளியை முன்னிட்டு வெளியாகவுள்ளது. படத்தின் தமிழக வெளியீட்டு உரிமையை 5 ஸ்டார் நிறுவனம் பெற்றுள்ளது. விரைவில் படத்தின் டீசர், இசை வெளியீட்டு விழா உள்ளிட்ட அடுத்தக்கட்ட அப்டேட்டுகள் வெளியாகும் என எதிர்பார்க்கப்படுகிறது.  

இந்த நிலையில் இப்படத்திற்கு முதல் ரிவ்யூ வெளியாகியுள்ளது. பட தயாரிப்பு நிறுவனங்களின் ஒன்றான அப்ளாஸ் என்டர்டெயின்மென்ட் நிர்வாக இயக்குநர் சமீர் நாயர், “மாரி செல்வராஜ் இயக்கிய பைசன் காளமாடன் திரைப்படத்தை பார்த்தோம். எங்களை வியப்பில் ஆழ்த்திய ஒரு அனல் பறக்கும் சக்திவாய்ந்த கலைப்படைப்பு. இப்படி ஒரு துணிச்சலும் திறமிக்க படத்தை தயாரித்ததில் எங்கள் நிறுவனம் பெருமிதம் கொள்கிறது. இந்த தீபாவளிக்கு வருகிறான் பைசன்” எனக் குறிப்பிட்டுள்ளார்.