“புது தம்பதிகள் பற்றிய மகிழ்வான கதை” - ‘குடும்பஸ்தன்’ குறித்து இயக்குநர்  

காலா, சில்லுக்கருப்பட்டி, ஜெய் பீம் உள்ளிட்ட பல்வேறு படங்களில் நடித்த மணிகண்டன் குட் நைட் படத்தில் ஹீரோவாக நடித்திருந்தார். இப்படம் நல்ல வரவேற்பு பெற்றது. இதையடுத்து பிரபுராம் வியாஸ் இயக்கத்தில் ஒரு படம் நடித்துள்ளார். மில்லியன் டாலர் ஸ்டுடியோஸ் மற்றும் எம்ஆர்பி எண்டர்டெயின்மெண்ட் நிறுவனம் இணைந்து தயாரிக்கின்றனர். கௌரி பிரியா கதாநாயகியாக நடித்துள்ள இப்படத்திற்கு ஷான் ரோல்டன் இசையமைத்துள்ளார்.

இதையடுத்து சினிமாக்காரன் நிறுவனம் தயாரிப்பில் ராஜேஷ்வர் காளிசாமி இயக்கத்தில் ஒரு படம் நடித்துள்ளார். மணிகண்டன் தவிர்த்து சான்வே மேகனா, குரு சோமசுந்தரம், இயக்குநர் சுந்தர்ராஜன் உள்ளிட்ட பலர் நடித்துள்ளனர். ஒரு சாதாரண நடுத்தர குடும்பத்து இளைஞன் தன் மானத்திற்காகவும், தன் குடும்பத்தின் நலனுக்காகவும் எதிர்கொள்ளும் சவால்களும் சாகசங்களுமே இத்திரைப்படத்தின் மையக்கரு எனத் தெரிவிக்கப்பட்டது. இப்படத்தின் படப்பிடிப்பு ஏற்கனவே முடிவடைந்த நிலையில், விரைவில் படத்தை வெளியிடுவதற்கான ஏற்பாடுகள் முழுவீச்சில் நடைபெற்று வருகின்றன.

இந்த நிலையில் இப்படத்தின் தலைப்பு அறிவிக்கப்பட்டுள்ளது. அதன்படி ‘குடும்பஸ்தன்’ என பெயரிடப்பட்டுள்ளது. படம் குறித்து இயக்குநர் ராஜேஷ்வர் கூறும்போது, “கோயம்புத்தூரில் இருக்கும் புதிதாக திருமணமான தம்பதிகள் பற்றிய மகிழ்வான கதை இது. குடும்பஸ்தன் ஒருவன் எதிர்கொள்ளும் சவால்கள் மற்றும் வேடிக்கையான தருணங்களை சுற்றி இந்தக் கதை நடக்கிறது” என்றார்.