லோகேஷ் கனகராஜ் இயக்கத்தில் ரஜினி நடிப்பில் உருவாகி வரும் படம் ‘கூலி’. இப்படத்தில் தெலுங்கு முன்னணி நடிகர் நாகர்ஜுனா, கன்னட நடிகர் உபேந்திரா கலீஷா, மலையாள நடிகர் சௌபின் சாஹிர், சத்யராஜ், ஸ்ருதிஹாசன் உள்ளிட்ட ஏகப்பட்ட பிரபலங்கள் நடித்துள்ளனர். பாலிவுட் நடிகர் ஆமீர்கான் கேமியோ ரோலில் நடித்துள்ளார். மேலும் பூஜா ஹெக்டே ஒரு பாடலுக்கு நடனமாடியுள்ளார். சன் பிக்சர்ஸ் தயாரிப்பில் அனிருத் இசையில் உருவாகி வரும் இப்படம் ஆகஸ்ட் 14ஆம் தேதி வெளியாகவுள்ளது.

இப்படத்தின் படப்பிப்பிடிப்பு கடந்த ஆண்டு ஜூலை மாதம் தொடங்கி பல்வேறு கட்டங்களாக பல இடங்களில் நடந்து கடந்த மார்ச் மாதம் முடிந்திருந்தது. இதனிடையே படத்தின் டைட்டில் டீசர் வெளியாகி ரசிகர்கள் மத்தியில் நல்ல வரவேற்பை பெற்றிருந்தது. பின்பு ‘சிக்குடு வைப்’ என்ற பாடலில் கிளிம்ஸ் வெளியாகியிருந்தது. அடுத்தாக படம் வெளியாகுவதற்கு 100 நாட்கள் தான் இருக்கிறது என்பதை நினைவுபடுத்து ஒரு முன்னோட்ட காட்சி வெளியானது. இதில் பின்னணியில் இடம் பெற்ற ‘பவர்ஹவுஸ்’ பாடம் சமூக வலைதளத்தில் ட்ரெண்டானது. இதனைத் தொடர்ந்து ‘சிக்குடு வைப்’ பாடலின் மியூசிக் வீடியோ மற்றும் பூஜா ஹெக்டே நடனமாடிய ‘மோனிகா’ பாடலின் லிரிக் வீடியோ ஆகியவை வெளியாகியிருந்தது.

இந்த நிலையில் லோகேஷ் கனகராஜ் புரொமோஷன் பணிகளில் ஈடுபடத் தொடங்கியுள்ளார். அந்த வகையில் ஒரு ஆங்கில ஊடகத்தில் பேட்டியளித்த அவர், படம் பார்த்து ரஜினி கூறியது குறித்து பேசியுள்ளார். அவர் பேசியதாவது, “எனக்கு ரஜினி நடித்த படங்களிலேயே தளபதி படம் ரொம்ப பிடிக்கும். அந்த ரஜினியை இதில் கொண்டு வர முயற்சித்துள்ளேன். டப்பிங் ஸ்டூடியோவில் ரஜினி முழு படத்தை பார்த்த பிறகு என்னை மகிழ்ச்சியுடன் கட்டியணைத்து, இந்தப் படம் தளபதி போல் எனக்கு இருக்கிறது என்றார். அந்த நாள் நான் நிம்மதியாக தூங்கினேன். ஏனென்றால் அதைத்தான் நான் சாதிக்க வேண்டும் என விரும்பினேன்” என்றார்.