‘லிஃப்ட்’ படம் குறித்து பரவிய வதந்திக்கு முற்றுப்புள்ளி! 

விஜய் டிவியில் ஒளிபரப்பான ‘சரவணன் மீனாட்சி’ சீரியலில் நடித்ததன் மூலம் பிரபலமடைந்த கவின், ‘நட்புன்னா என்னனு தெரியுமா’ என்ற படத்தின் மூலம் திரையுலகிற்கு அறிமுகமானார். இப்படத்திற்கு ரசிகர்களிடையே நல்ல வரவேற்பு கிடைத்தது. இதனைத் தொடர்ந்து, கவின் நடிப்பில் தற்போது உருவாகியுள்ள படம் ‘லிஃப்ட்’. இப்படத்தில் கவினுக்கு ஜோடியாக அம்ரிதா ஐயர் நடித்துள்ளார். வினீத் வரப்பிரசாத் இயக்க, ஈகா என்டர்டெயின்மெண்ட் நிறுவனம் தயாரித்துள்ளது.

இப்படத்தின் அனைத்துப் பணிகளையும் முடித்து ரிலீஸிற்காகப் படக்குழு காத்திருக்கும் நிலையில், ‘லிஃப்ட்’ திரைப்படம் நேரடியாக ஓடிடியில் வெளியாகவுள்ளதாக சில தினங்களுக்கு முன் தகவல் வெளியானது. இந்த நிலையில், இத்தகவலை ‘லிஃப்ட்’ படத்தின் தமிழ்நாடு விநியோக உரிமையைக் கைப்பற்றியுள்ள லிப்ரா ப்ரொடக்சன்ஸ் நிறுவனம் மறுத்துள்ளது. இது தொடர்பாக அந்நிறுவனம் வெளியிட்டுள்ள பதிவில், "திரையரங்குகளில் 100 சதவிகித இருக்கை அனுமதிக்கப்பட்ட பிறகு ‘லிஃப்ட்’ திரைப்படம் திரையரங்குகளில் வெளியாகும். படம் நேரடியாக ஓடிடியில் வெளியாகவுள்ளது எனப் பரவும் வதந்தியை நம்ப வேண்டாம்" எனக் குறிப்பிடப்பட்டுள்ளது.