மீண்டும் எழும் 'டைட்டானிக்' ; புது ரிலீஸ் தேதியை வெளியிட்ட படக்குழு

'மெட்ராஸ்' படத்தின் மூலம் பிரபலமானவர் நடிகர் 'கலையரசன்'. தொடர்ந்து பல படங்களில் முக்கிய கதாபாத்திரத்தில் மற்றும் சில படங்களில் கதாநாயகனாகவும் நடித்து வருகிறார். கடைசியாக இவர் நடிப்பில் வெளியான படம் 'குதிரைவால்'. இந்த படத்தில் இவரது நடிப்பை பலரும் பாராட்டியிருந்தனர். இதனிடையே 'திருக்குமரன் என்டர்டெய்ன்மெண்ட்' சார்பாக சி.வி.குமார் தயாரிக்கும் 'டைட்டானிக்' படத்தில் நடித்துள்ளார். இப்படத்தில் கதாநாயகியாக கயல் ஆனந்தி நடிக்க காளி வெங்கட், ஆஷ்னா சவேரி உள்ளிட்ட பலர் முக்கிய கதாபாத்திரங்களில் நடித்துள்ளனர். ஜானகிராமன் இயக்கியுள்ள இப்படத்திற்கு நிவாஸ் கே பிரசன்னா இசையமைத்துள்ளார். கடந்த மே 6-ஆம் தேதி இப்படம் திரையரங்கில் வெளியாகும் என அறிவிப்பு வந்தது. பின்பு சில காரணங்களால் வெளியாகவில்லை.

இந்நிலையில் 'டைட்டானிக்' படத்தின் புது ரிலீஸ் தேதி வெளியாகியுள்ளது. வருகிற ஜூன் மாதம் 24-ஆம் தேதி இப்படம் திரையரங்குகளில் வெளியாகவுள்ளது. இதனை அதிகாரபூர்வமாக சமூக வலைத்தளத்தில் படக்குழு அறிவித்துள்ளது. அதோடு இப்படம் ரொமான்ஸ் கலந்த காமெடி படமாக இருக்கும் எனத் தெரிவித்து ஒரு புதிய வீடியோவையும் படக்குழு வெளியிட்டுள்ளது.