புற்று நோயாளிகளுக்காக நடிகை இனியா செய்தது... 

'வாகை சூடவா' படத்திற்கு பிறகு அதிகம் தமிழ் படங்களில் தலை காட்டாமல் ஒதுங்கியே இருந்த நடிகை இனியா நடிப்பில் நீண்ட நாட்களுக்கு பின் வெளிவர இருக்கும் படம் 'பொட்டு'. இயக்குனர் வடிவுடையான் இயக்கியிருக்கும் இப்படம் விரைவில் வெளியாகவுள்ள நிலையில் இனியா அடுத்ததாக இசை ஆல்பம் ஒன்றை வெளியிடவிருக்கிறார். 'மியா' என்ற நடனப் பெண் ஒருவரின் வாழ்க்கைப் பதிவை 8 நிமிட வீடியோ ஆல்பமாக “மியா” என்ற பெயரில் இனியா தயாரித்திருக்கிறார். ஒரு பெண் பிரபல டான்ஸராகி கொடி கட்டி பறக்க வேண்டும்.விருதுகளை வாங்கி குவிக்க வேண்டும் என்பதே அந்தப் பெண்ணின் வாழ்க்கை லட்சியம். அந்த லட்சியத்தை அடைய அவள் போராடுகிறாள். எவ்வளவோ தடைக்கற்கள் வந்தாலும் லட்சியத்தை அடைய வேண்டுமென்றால் முயற்சியை கை விடக் கூடாது என்று போராடுகிறாள். அந்த முயற்சி எப்படி வெற்றியாகிறது என்பதே 'மியா' ஆல்பம். மேலும் இந்த ஆல்பத்தை குறித்து இனியா பேசியபோது....

"இந்த மியா வீடியோ ஆல்பம் எனது முதல் முயற்சி. இதற்கு உறுதுணையாக இருந்த ஒவ்வொருவருக்கும் நன்றி சொல்லக் கடமைபட்டுள்ளேன். இந்த வீடியோ ஆல்பத்தை பார்த்து பாராட்டிய திரு நவீன்பிரபாகர் திரு ரியாஸ், திரு கபாலிபாபு மூவரும் பியாண்ட்பிரேம்ஸ் நிறுவனம் மூலம் இந்த வீடியோ ஆல்பத்தை பிரமாதமாக வெளியிடுகிறார்கள். இந்த ஆல்பத்தின் மூலம் வசூலாகும் பணத்தில் கேன்சரால் பாதித்த 10 பேருக்கு மருத்துவ உதவி செய்ய திட்டமிட்டுள்ளார்கள்.மேலும் இதை போல இன்னும் நிறைய திட்டமிட்டுள்ளோம். இந்த உலகத்தில் உள்ள எல்லா டான்ஸர்களுக்கும் 'மியா' வை காணிக்கையாக்குகிறேன்" என்றார்.