விஜய்க்கு முதல் ஆளாக வாழ்த்து தெரிவித்த அஜித் 

வெங்கட் பிரபு இயக்கத்தில் விஜய் நடிப்பில் உருவான திரைப்படம் ‘தி கிரேட்டஸ்ட் ஆஃப் ஆல் டைம்’. ஏ.ஜி.எஸ் நிறுவனம் சார்பில் அர்ச்சனா கல்பாத்தி தயாரித்துள்ள இப்படத்திற்கு யுவன் இசையமைத்துள்ளார். இப்படத்தில் பிரசாந்த், மோகன், பிரபுதேவா, சினேகா, லைலா உள்ளிட்ட பலர் நடித்துள்ளனர். மேலும் இப்படத்தில் விஜய் டி ஏஜிங் கெட்டப்பிலும், மறைந்த விஜயகாந்தின் தோற்றத்தையும் பவதாரிணி குரலையும் ஏ.ஐ தொழில்நுட்பத்தின் மூலம் பயன்படுத்தியுள்ளனர்.

விஜய்யின் அரசியல் வருகைக்கு பிறகு வரும் விஜய்யின் முதல் படம் என்பதால் ரசிகர்களிடையே பெரும் எதிர்பார்ப்பு ஏற்பட்டது. இந்நிலையில் இப்படத்திற்கு காலை 9 மணி சிறப்பு காட்சி முதல் நள்ளிரவு 2 மணி வரை திரையிட்டுக்கொள்ள தமிழ்நாடு அரசு திரையரங்குகளுக்கு உத்தரவிட்டிருந்தது. அதன்படி தமிழகம் முழுவதும் காலை 9 மணிக்கு சிறப்பு காட்சி தொடங்கப்பட்டது. அப்போது திரையரங்கில் வழக்கம் விஜய் ரசிகர்கள் பேனர் வைத்து பட்டாசு வெடித்து கொண்டாட்டத்தில் ஈடுபட்டனர்.

இதனிடையே ‘தி கோட்’ படத்திற்கு அஜித் வாழ்த்து தெரிவித்துள்ளதாக தனது எக்ஸ் பக்கத்தில் வெங்கட் பிரபு தெரிவித்துள்ளார். இது தொடர்பான அவரின் பதிவில், “விஜய்க்கு முதல் ஆளாக வாழ்த்து தெரிவித்தற்கு நன்றி அஜித் அண்ணா. நாங்கள் அனைவரும் உங்களை நேசிக்கிறோம்” என்று பதிவிட்டுள்ளார். இதையடுத்து வெங்கட் பிரபுவின் மற்றொரு பதிவில், “தி கோட் படம் பார்க்க வருவதற்கு முன் எந்தப் படத்தையும் பார்க்கத் தேவையில்லை. ஜாலியாக வந்து தியேட்டரில் விஜய்யை பார்த்து கொண்டாடுகள்” என்று குறிப்பிட்டுள்ளார். ‘தி கோட்’ திரைப்படத்தின் அறிவிப்பு சமயத்தில் அஜித் வாழ்த்து தெரிவித்தாக வெங்கட் பிரபு தெரிவித்திருந்தது குறிப்பிடத்தக்கது.