மாரி செல்வராஜ் - துருவ் விக்ரம் கூட்டணியில் உருவாகியுள்ள படம் ‘பைசன்’. பா.ரஞ்சித்தின் நீலம் ஸ்டுடியோஸ் மற்றும் அப்ளாஸ் என்டர்டெயின்மென்ட் ஆகிய நிறுவனங்கள் இணைந்து தயாரித்துள்ள இப்படத்தில் அனுபமா பரமேஷ்வரன், லால், பசுபதி, ரஜிஷா விஜயன், கலையரசன் உள்ளிட்டோர் நடித்துள்ளனர். நிவாஸ் கே.பிரசன்னா இசையமைத்துள்ள இப்படம் அர்ஜுனா விருது வென்ற தூத்துக்குடியைச் சேர்ந்த கபடி வீரர் மணத்தி கணேசன் வாழ்க்கையை மையமாக வைத்து உருவாகியுள்ளதாக கூறப்படுகிறது.

Advertisment

இப்படத்தின் படப்பிடிப்பு கடந்த ஆண்டு மே மாதம் தொடங்கி பல கட்டங்களாக நடந்து கடந்த பிப்ரவரி மாதம் நிறைவுற்றது. படத்தின் ஃபர்ஸ்ட் லுக் கடந்த மார்ச் மாதம் வெளியானது. படம் அக்டோபர் 17ஆம் தேதி தீபாவளியை முன்னிட்டு வெளியாகவுள்ளது. படத்தின் தமிழக வெளியீட்டு உரிமையை 5 ஸ்டார் நிறுவனம் பெற்றுள்ளது. ஆனால் படத்தின் தயாரிப்பு நிறுவனங்களின் ஒன்றான அப்ளாஸ் என்டர்டெயின்மென்ட்டின் நிர்வாக இயக்குநர் சமீர் நாயர் முழுப்படத்தை பார்த்து படக்குழுவை பாராட்டியிருந்தார். 

படத்தின் ஃபர்ஸ்ட் சிங்கிளான ‘தீக்கொளுத்தி’ பாடல் லிரிக் வீடியோவுடன் கடந்த 1ஆம் தேதி வெளியானது. காதலியை பிரிந்த பரிதவிப்பில் வேதனையுடன் நாயகன் பாடும் பாடலாக இப்பாடல் அமைந்திருந்தது. இதையடுத்து இரண்டாவது பாடலாக ‘றெக்க றெக்க’ எனும் பாடல் லிரிக் வீடியோவுடன் வெளியாகியிருந்தது. இப்பாடல் கபடி போட்டிக்கு துருவ் விக்ரம் தயாராகுவது போல் அமைந்திருந்தது. இதனைத் தொடர்ந்து மூன்றாவது பாடலாக ‘சீனிக்கல்லு’ பாடல் லிரிக் வீடியோவுடன் வெளியாகியுள்ளது. இப்பாடலை விஜய் யேசுதாஸ், சின்மயி ஆகியோர் பாடியுள்ளனர். மாரி செல்வராஜ் எழுதியுள்ளார். நாயகன் துருவ் விக்ரம் தனது தாய், தந்தையை நினைத்து இருவர் மீதும் இவர் வைத்திருக்கும் பாசத்தை சொல்லும் படியாக அமைந்துள்ளது. அதற்கேற்றார் போல் ‘உச்சு பானையில் நின்னு பாடும் குயிலு நீ... மொட்ட பாறையில ஆடும் மயிலு நீ...’  என மகனை கொஞ்சி பெற்றோர் பாடுவது போன்ற வரிகளும் இடம்பெற்றுள்ளது.