ரூமுக்கு பொண்ண அனுப்பவா? - கேட்டது ஒன்னு; புரிஞ்சது ஒன்னு - பப்லூ ப்ரித்திவிராஜ் பகிர்ந்த சுவாரசிய சம்பவம்

குழந்தை நட்சத்திரமாக திரைத்துறையில் அறிமுகமாகி தெலுங்கு, தமிழ் உட்பட பல்வேறு மொழிகளில் நடித்துப் பிரபலமான நடிகர் பப்லூ ப்ரித்திவிராஜை நக்கீரன் ஸ்டூடியோ சார்பில் சந்தித்தோம். அந்தச் சந்திப்பில் தன்னுடைய திரையுலக அனுபவம் குறித்து பல்வேறு விஷயங்களைப் பகிர்ந்துகொண்ட அவர், ஒரு தெலுங்கு திரைப்பட ஷூட்டிங்கின்போது தனக்கு நேர்ந்த சுவாரசியமான அனுபவம் குறித்து பகிர்ந்து கொண்டவை பின்வருமாறு...

”சினிமாவே வேண்டாம் என ஒதுங்கியிருந்த எனக்கு, ஒரு தெலுங்கு படத்தில் முக்கிய கதாபாத்திரத்தில் நடிக்க வாய்ப்பு வந்தது. முதலில் நடிக்க வேண்டாம் என்றுதான் நினைத்தேன். கதை ரொம்பவும் பிடித்திருந்ததால் நடிக்க சம்மதித்தேன். அந்த ஷூட்டிங்கின்போது என்னை ஒரு ஹோட்டலில் தங்க வைத்திருந்தார்கள். அங்கிருந்த ஜிம்மை 24 மணி நேரமும் பயன்படுத்திக்கொள்ளலாம் என்று சொன்னார்கள். அறையில் கொஞ்ச நேரம் ஓய்வெடுத்துவிட்டு ஜிம்மிற்கு சென்றால் ஜிம் குடோன் மாதிரி இருந்தது. நிறைய பொருட்களை அங்கு போட்டு வைத்திருந்தார்கள். அங்கிருந்தவரிடம் கேட்டபோது அதையெல்லாம் தள்ளி வச்சுட்டு பண்ணுங்க சார் என்றார். நான் ஓர்க்அவுட் பண்ணாமல் திரும்பிவந்துட்டேன்.

பின்னர், இரவு அந்தப் பட மேனேஜருக்கு போன் செய்தேன். நான் ரொம்ப டெஸ்பரேட்டா இருக்கேன் என்று சொன்னேன். அவர் சாரி சொல்லிவிட்டு நீங்க அப்படி இல்லனு நினைச்சோம் சார் என்றார். நான் ஏன் அப்படி இல்லை, நான் மட்டுமில்லை என் அப்பாவும் அப்படித்தான் என்றேன். சாரி சார், இந்த விஷயத்தை நான் கேள்விப்பட்டதே இல்ல, கொஞ்சம் பணம் செலவாகும் பரவாயில்லையா என்றார். எவ்வளவு செலவானாலும் பரவாயில்லை, இந்த விஷயத்தில் நான் காசு பார்க்கமாட்டேன் என்றேன். நீங்க போறீங்களா சார், இல்ல அவங்களை வரச் சொல்லனுமா என்றார். எனக்கு ஒன்னும் புரியவில்லை.

நான் எங்க போகணும், நீங்க எதைப் பத்தி பேசுறீங்க என்று கேட்டேன். அவர் நீங்க எதைப் பத்தி பேசுனீங்க என்று கேட்டார். நான் ஜிம் பத்தி பேசுனேன் என்று சொன்னதும் சார் நைட்டு பதினோறு மணிக்கு போன் செய்து நான் டெஸ்பரேட்னு சொன்னால் எல்லோரும் என்ன சார் புரிஞ்சிப்பாங்க என்றார். ஐயோ நான் அப்படியெல்லாம் இல்லப்பா என்றேன். எங்க அப்பாவும் அந்த மாதிரிதானு சொன்னீங்க சார் என்றார். எங்க அப்பாவும் ஜிம் போவாருப்பா என்று அவருக்கு விளக்கமா எடுத்துக்கூறினேன். ஜிம்தான சார், நாளைக்கு கண்டிப்பா ஏற்பாடு பண்ணுறேன், இப்ப தூங்குங்க என்றார். இந்த சம்பவத்தை என்னால் மறக்கவே முடியாது” என்றார்.