வியப்பூட்டும் ‘அவதார் 3’ முன்னோட்டம் - இணையத்தில் வைரல்

ஜேம்ஸ் கேமரூன் இயக்கத்தில் 2009ஆம் ஆண்டு வெளியாகி, உலகமெங்கும் மாபெரும் வெற்றி பெற்ற படம் ‘அவதார்’. 3டி-யில் வெளியான இப்படம் 2.923 பில்லியன் டாலர்கள் வசூலித்து உலக அளவில் அதிகம் வசூல் ஈட்டிய படம் என்ற சாதனையை அப்போது பெற்றது.    

முதல் பாகத்தின் மாபெரும் வெற்றியைத் தொடர்ந்து படத்தின் இரண்டாம் பாகம் ‘அவதார்: தி வே ஆஃப் வாட்டர்’ என்ற தலைப்பில் 2022ஆம் ஆண்டு டிசம்பர் மாதம் வெளியானது. இப்படமும் நல்ல வரவேற்பைப் பெற்றது. இதனைத் தொடர்ந்து படத்தின் மூன்றாம் பாகத்தை ஜேம்ஸ் கேமரூன் இயக்கி வருகிறார்.  ‘அவதார்: ஃபயர் அண்ட் ஆஷ்’ என்ற தலைப்பில் உருவாகும் மூன்றாம் பாகம் இந்தாண்டு டிசம்பர் 19ஆம் தேதி வெளியாகவுள்ளது.

மூன்றாம் பாகத்தின் ஃபர்ஸ்ட் லுக் போஸ்டர் மற்றும் ட்ரெய்லர் அப்டேட் சமீபத்தில் வெளியானது. ஃபர்ஸ்ட் லுக் போஸ்டரில் ‘வராங்’(Varang) என்ற கதாபாத்திரத்தை படக்குழு அறிமுகம் செய்திருந்தது. மேலும் ட்ரெய்லர், ‘தி ஃபென்டாஸ்டிக் ஃபோர்; ஃபர்ஸ்ட் ஸ்டெப்ஸ் ’ படத்துடன் பிரத்யேகமாக திரையிடப்படவுள்ளதாகவும் தெரிவிக்கப்பட்டது. இப்படம் கடந்த 25ஆம் தேதி வெளியானது குறிப்பிடத்தக்கது. 

இந்த நிலையில் படத்தின் ட்ரெய்லரை, சமூக வலைதளத்தில் படக்குழு வெளியிட்டுள்ளது. முதல் இரண்டு பாகத்தை போலவே இந்த பாகமும் மிகப் பிரம்மாண்டமாக உருவாகியிருக்கிறது. வியப்பூட்டும் காட்சிகள், புதிய அவதார் கதாபாத்திரங்கள் என பார்வையாளர்களை மிரட்ட வைத்துள்ளது. கடந்த பாகத்தில் தண்ணீரைக் கையில் எடுத்த ஜேம்ஸ் கேமரூன் இந்த முறை நெருப்பை கையிலெடுத்துள்ளார். இந்த ட்ரெய்லர் தற்போது சமூக வலைதளத்தில் வைரலாகி வருகிறது.