‘நெஞ்சமே நெஞ்சமே…' - காதலரைக் கரம் பிடித்த அபர்ணா தாஸ்

2019 ஆண்டு மலையாளத்தில் வெளியான மனோகரம் படம் மூலம் ஹீரோயினாக அறிமுகமானார் அபர்ணா தாஸ். கேரளாவைச் சேர்ந்த இவர் அடுத்த படமாகவே தமிழில் விஜய்யின் பீஸ்ட் படத்தில் முக்கிய கதாபாத்திரத்தில் நடித்திருந்தார். இதன் மூலம் தமிழ் ரசிகர்கள் மத்தியில் பரீட்சயமாக உருமாறினார். பின்பு தமிழில் கவினுக்கு ஜோடியாக நடித்த டாடா படம் அவரை அடுத்த கட்டத்திற்கு அழைத்து சென்றது. மேலும், ரசிகர்கள் மத்தியில் இன்னும் பிரபலமான நடிகையாக மாற்றியது.

இதனிடையே தமிழ், மலையாளம் ஆகிய இரு மொழிகளிலும் கவனம் செலுத்தி வந்த அபர்ணா தாஸ், கடந்த ஆண்டு ஆதிகேஷவா படம் மூலம் தெலுங்கிலும் அறிமுகமானார். இப்படி மூன்று மொழிகளிலும் கவனம் செலுத்து வரும் அபர்ணா தாஸ் மலையாள நடிகர் தீபக் பரம்போலை நீண்ட நாள்களாககாதலித்து வந்ததாக கூறப்பட்டு வந்தது. மலையாளப் படங்களில் சிறிய கதாபாத்திரத்தில் நடித்து வந்த தீபக் பரம்போல், விஸ்வ விக்யாதரய பையன்மார் படத்தில் முன்னணி கதாபாத்திரத்தில் நடித்திருந்தார். தொடர்ந்து லவ் ஆக்‌ஷன் ட்ராமா, ஹெவன், கன்னூர் ஸ்குவாட் உள்ளிட்ட படங்களில் முக்கிய கதாபாத்திரங்களில் நடித்தார். மேலும் சமீபத்தில் வெளியாகி மலையாளத் திரையுலகில் பெரும் வெற்றி பெற்று வசூல் சாதனை படைத்த மஞ்சும்மல் பாய்ஸ் படத்தில் முதன்மை கதாபாத்திரத்தில் ஒருவராக நடித்திருந்தார்.

அபர்ணா தாஸ் மற்றும் தீபக் பரம்போல் இருவரும் 2019ல் வெளியான மனோகரம் படத்தில்இணைந்து நடித்திருந்தனர். இந்த சூழலில் இருவரும் திருமணம் செய்யவுள்ளதாக சமீபத்தில் தகவல் வெளியானது. இதையடுத்து திருமணத்தை முன்னிட்டு ஹல்தி சடங்குகள் கொண்டாட்டமாக நடந்தது. இது தொடர்பான புகைப்படங்கள் மற்றும் வீடியோக்கள் நேற்று சமூக வலைத்தளங்களில் வெளியானது. இந்த நிலையில் கேரளா வடக்காஞ்சேரியில் இன்று (24.04.2024) திருமணம் நடைபெற்றுள்ளது. இதில் இரு வீட்டாரின் குடும்பத்தினர் மற்றும் நெருங்கிய நண்பர்கள் பங்கேற்றுள்ளனர்.