Skip to main content

'அண்ணாத்த படப்பிடிப்பு'; பிறந்தநாள் வாழ்த்தோடு சிவா கொடுத்த அப்டேட்!

 

director siva

 

தமிழ் சினிமாவின் உச்சநட்சத்திரமான நடிகர் ரஜினிகாந்த், சன் பிக்சர்ஸ் தயாரிப்பில் இயக்குனர் சிவா இயக்கி வரும் 'அண்ணாத்த' படத்தில் நடித்து வருகிறார். முழுவீச்சில் நடைபெற்று வந்த இப்படத்தின் படப்பிடிப்பு கரோனா நெருக்கடி நிலை காரணமாக தடைபட்டது. தற்போது படப்பிடிப்பு நடத்துவதற்கான அனுமதியை அரசு அளித்துள்ளது. இதனையடுத்து, அண்ணாத்த படத்தின் படப்பிடிப்பு அடுத்தாண்டு ஜனவரியில் தொடங்கும் என எதிர்பார்க்கப்பட்டது.

 

இந்த நிலையில், இம்மாதத்தின் தொடக்கத்தில் தனது அரசியல் வருகை குறித்து ரஜினி உறுதிப்படுத்தினார். சட்டமன்றத் தேர்தலுக்கு இன்னும் சில மாதங்களே உள்ளதால், அண்ணாத்த படத்தின் பணிகளை முடித்துவிட்டு அரசியலில் கவனம் செலுத்த ரஜினி திட்டமிட்டுள்ளார். இதனால், இப்படத்தின் படப்பிடிப்பு இந்த மாதமே தொடங்கவுள்ளது எனச் செய்திகள் வெளியாகின. 

 

இந்நிலையில், நடிகர் ரஜினிகாந்த்  இன்று தனது 70-ஆவது பிறந்தநாளைக் கொண்டாடுகிறார். அதனை முன்னிட்டு பலரும் அவருக்கு வாழ்த்துத் தெரிவித்து வருகின்றனர். அந்த வகையில், அண்ணாத்த படத்தின் இயக்குனரான சிவா, அண்ணாத்த படக்குழு சார்பாக ரஜினிகாந்திற்கு பிறந்தநாள் வாழ்த்துத் தெரிவித்து காணொளி ஒன்றினை வெளியிட்டுள்ளார். அதில், படப்பிடிப்பு மீண்டும் தொடங்கவுள்ள தகவலையும் அவர் தெரிவித்துள்ளார். அக்காணொளியை சன் பிக்சர்ஸ் நிறுவனம் தன்னுடைய ட்விட்டர் பக்கத்தில் பகிர்ந்துள்ளது. அதன்படி, அண்ணாத்த படத்தின் படப்பிடிப்பு டிசம்பர் 15-ம் தேதி மீண்டும் துவங்கவுள்ளது.