நேர்கொண்ட பார்வை படத்தின் வெற்றிக்கு பிறகு மீண்டும் ஹெச்.வினோத்தின் இயக்கத்தில் நடிக்க இருக்கிறார் அஜித். இந்த படத்தின் ஷூட்டிங் டிசம்பர் இறுதியில் தொடங்க இருப்பதாக தகவல் வெளியாகி வருகிறது.
 

இந்நிலையில் கடந்த 1995ஆம் ஆண்டு அஜித் நடித்து வெளியான மைனர் மாப்பிள்ளை என்னும் படம் மீண்டும் 24 வருடங்கள் டிஜிட்டல் தொழில்நுட்ப முறையில் திரையில் வெளியாக இருக்கிறது. 
 

இதில் அஜித்துடன் ரஞ்சித், வடிவேல், விவேக், கீர்த்தனா, சுபாஸ்ரீ, ஸ்ரீவித்யா ஆகியோர் நடித்திருக்கின்றனர். 24 வருடங்களுக்குப்பின், இந்த படம் டிஜிட்டலில் மெருகேற்றப்பட்டுள்ளது. இப்படத்தின் கதை, திரைக்கதை, வசனம் எழுதி, வி.சி.குகநாதன் இயக்கம் செய்திருந்தார். அவரே `மைனர் மாப்பிள்ளை' படத்தின் கிராபிக்ஸ் மற்றும் டிஜிட்டல் பணிகளை மேற்பார்வையிட்டு வருகிறார். இந்த படத்தை விரைவில் திரைக்கு கொண்டுவர அனைத்து பணிகளும் நடைபெற்று வருவதாக சொல்லப்படுகிறது. 

நேர்கொண்ட பார்வை படத்தை தொடர்ந்து அஜித்தின் அடுத்த படத்தையும் ஹெச்.வினோத்தான் இயக்குகிறார். போனி கபூர்தான் இப்படத்தையும் தயாரிக்கிறார். இதற்கான பணிகள் மும்முரமாக நடைபெற்றுவருகிறது.
 

இப்படத்திற்கான கதை விவாதங்கள் அனைத்தும் முடிவுபெற்று, நடிகர்களுக்கான தேர்வு நடைபெற்று வருகிறது. இதனிடையே இந்தப் படத்தில் அஜித்துடன் நடிக்கும் நடிகர்கள் தேர்வு குறித்து பல்வேறு விளம்பரங்கள் இணையத்தில் வெளியானதாகத் தெரிகிறது. இதற்குப் படக்குழுவினர் தரப்பில் மறுப்பு தெரிவிக்கப்பட்டுள்ளது.

இந்நிலையில் போனிகபூர் தரப்பு வழக்கறிஞர் வெளியிட்டுள்ள அறிக்கையில், "போனி கபூர் தயாரிப்பு நிறுவனத்திலிருந்து எந்தவொரு விளம்பரத்தையுமே அளிக்கவில்லை. அவ்வாறு வெளியாகியுள்ள விளம்பரங்களுக்கு எங்கள் நிறுவனமோ, போனிகபூரோ பொறுப்பேற்க முடியாது. அந்த விளம்பரங்களுக்கும் போனி கபூருக்கும் எவ்வித சம்பந்தமும் கிடையாது. அதற்கு நாங்கள் பொறுப்பல்ல" என்று எச்சரித்துள்ளனர்.