கிண்டலுக்கு உள்ளான ‘ஆதிபுருஷ்’ டீசர்; படக்குழு எடுத்த திடீர் முடிவு

பிரபாஸ் நடிப்பில் ஓம் ராவத் இயக்கத்தில் பிரமாண்டமாக உருவாகி வரும் படம் ‘ஆதிபுருஷ்’. ராமாயணத்தின் ஒரு பகுதியை மையமாக வைத்து உருவாகி வரும் இப்படத்தில் பிரபாஸ் ராமர் கதாபாத்திரத்திலும், கீர்த்தி சனோன் சீதை கதாபாத்திரத்திலும், சையிப் அலிகான் ராவணன் கதாபாத்திரத்திலும்நடிக்கின்றனர்.

3டி தொழில்நுட்பத்தில் உருவாகி வரும் இப்படத்தின் டீசர் சமீபத்தில் வெளியாகி ரசிகர்களிடையே கடும் விமர்சனத்தையும் கிண்டலையும் சந்தித்து வந்தது. இது தொடர்பாக மத்தியப்பிரதேச உள்துறை அமைச்சர் நரோட்டம் மிஸ்ரா, அயோத்தி ராமர் கோயிலின் தலைமை குரு சத்யேந்திர தாஸ், உத்தரப்பிரதேச துணை முதல்வர்கள் கேசவ் பிரசாத் மவுரியா மற்றும் பிரஜேஷ் பதக், விஸ்வ ஹிந்து பரிஷத் அமைப்பு உள்ளிட்ட பலர் இப்படத்தை வெளியிடத்தடை விதிக்கக்கோரி கண்டனம் தெரிவித்திருந்தனர்.

‘ஆதிபுருஷ்’ படம் தமிழ், தெலுங்கு, மலையாளம், கன்னடம், இந்தி ஆகிய மொழிகளில் அடுத்த ஆண்டு ஜனவரி 12ஆம் தேதி வெளியாகும் என அறிவிப்பு வெளியான நிலையில், தற்போது ரிலீஸ் தேதி மாற்றப்பட்டுள்ளது. அதன்படி அடுத்த ஆண்டு ஜூன் 16ஆம் தேதி இப்படம் வெளியாகும் எனப்படக்குழு அறிவித்துள்ளது. மேலும் பார்வையாளர்களுக்குச் சிறந்த அனுபவத்தைக் கொடுக்கும் நோக்கில் இன்னும் கூடுதல் நேரம் தேவைப்படுகிறது எனப் படக்குழு தெரிவித்துள்ளது.

ஏற்கனவே ரிலீஸ் தேதி தள்ளிப் போவதாகத்தகவல் வெளியான நிலையில் அதனைப் படக்குழு தற்போது உறுதி செய்துள்ளது. இந்த அறிவிப்பு தொடர்பாகத்திரை வட்டாரத்தில், இப்படத்தின் டீசர் ரசிகர்களின் கிண்டலுக்கு ஆளானதால் படக்குழு இப்படி திடீர் முடிவு எடுத்துள்ளது என்று பரவலாகப் பேசப்பட்டு வருகிறது.

பிரபாஸ் நடிப்பில் 'ஆதிபுருஷ்' படம் மட்டுமல்லாது, நாக் அஸ்வின் இயக்கும் 'ப்ராஜெக்ட் கே' படம் உருவாகி வருகிறது. இப்படத்தில் தீபிகா படுகோனே கதாநாயகியாக நடிக்க, முக்கியக் கதாபாத்திரத்தில் அமிதாப்பச்சன் நடிக்கிறார். இது போக பிரசாந்த் நீல் இயக்கத்தில் 'சலார்' படமும் உருவாகிறது. இப்படம் அடுத்த ஆண்டு செப்டம்பர் 28 ஆம் தேதி வெளியாகிறது.