“தணிக்கை சான்றிதழில் தலையிட முடியாது” - ‘திரௌபதி 2’ விவகாரத்தில் நீதிமன்றம்

மோகன் ஜி இயக்கத்தில் ரிச்சர்ட் ரிஷி நடிப்பில் உருவாகியுள்ள படம் ‘திரௌபதி 2’. இதில் ரக்ஷனா இந்துசூடன், நட்டி நட்ராஜ், வேல ராமமூர்த்தி உள்ளிட்ட பலர் நடித்துள்ளனர். நேதாஜி புரொடக்‌ஷன்ஸ் தயாரித்துள்ள இப்படத்திற்கு ஜிப்ரான் இசையமைத்துள்ளார். இப்படம் 14ம் நூற்றாண்டின் மறைக்கப்பட்ட போசளர்ககளைப் பற்றி இருக்கும் என தெரிவிக்கப்பட்டுள்ளது. தமிழ், இந்தி, தெலுங்கு உள்ளிட்ட நான்கு மொழிகளில் வரும் நாளை வெளியாகவுள்ளது.

Advertisment

இந்த நிலையில் இப்படத்திற்கு எதிராக சென்னை உயர்நீதிமன்ற மதுரை கிளையில் மனு தாக்கல் செய்யப்பட்டுள்ளது. இதனை மதுரை மாவட்ட மேலூரை சேர்ந்த மகாமுனி அம்பலகாரர் என்பவர் தாக்கல் செய்துள்ளார். அவர் கூறிய மனுவில், “திருவண்ணாமலையை தலைமையிடமாக கொண்டு 14ஆம் நூற்றாண்டில் ஆட்சி புரிந்த மன்னன் வீர வல்லாள தேவன். இவரின் வாழ்க்கை வரலாறு அடிப்படையில் திரௌபதி 2 படம் தயாரிக்கப்பட்டுள்ளதாக படக்குழு தெரிவித்துள்ளது.

Advertisment

வீர வல்லாள தேவன் என்பவர் கள்ளர் சமூகத்தைச் சேர்ந்தவர் என்பதற்கு பல கல்வெட்டுகள், செப்பு பட்டயங்கள் உள்ளிட்ட வரலாற்று ஆவணங்கள் உள்ளன. ஆனால், திரெளபதி 2 படத்தில் வீர வல்லாள தேவனை வன்னியர் சமூகத்தைச் சேர்ந்தவராக இயக்குநர் மோகன் சித்தரித்துள்ளார். படத்தின் சுவரொட்டிகளில் வீர வல்லாள தேவன் என்பதை வீர வல்லாளன் என்று மட்டும் குறிப்பிட்டுள்ளனர். இது உள்நோக்கம் கொண்டது. மேலும், கள்ளர் சமூகத்தினரிடையே கொந்தளிப்பை ஏற்படுத்தும். இதை கண்டித்து மேலூரில் பல போராட்டங்கள் நடத்தப்பட்டன.

இந்நிலையில், படத்துக்கு அவசர அவசரமாக யு/ஏ சான்றிதழை தணிக்கை வாரியம் வழங்கியுள்ளது. யு/ஏ சான்றிதழை திரும்பப் பெறுமாறு தணிக்கை வாரியத்திடம் மனு அளித்தும் எந்த நடவடிக்கையும் எடுக்கவில்லை. எனவே, திரௌபதி 2 படத்தை தணிக்கை வாரியம் மறு ஆய்வு செய்யவும், படத்தில் இடம் பெற்றுள்ள வரலாற்றுப் பிழைகளை திருத்தம் செய்யும் வரை படத்தை வெளியிட இடைக்கால தடை விதிக்க வேண்டும்” எனக் குறிப்பிட்டிருந்தார்.

Advertisment

இந்த மனு நீதிபதி ஆர்.விஜயகுமார் தலைமையில் விசாரணைக்கு வந்தது. அப்போது மத்திய அரசு சார்பில் படத்துக்கு தணிக்கை வாரியம் யு/ஏ சான்றிதழ் வழங்கியுள்ளதாக தெரிவிக்கப்பட்டது. பின்பு பேசிய நீதிபதி, தணிக்கை வாரியம் சான்றிதழ் வழங்கியுள்ளதால் நீதிமன்றம் தலையிட முடியாது எனக் கூறி பொதுநல வழக்கு தொடர உரிமை வழங்கி மனுவை முடித்துவைத்தார்.