பிக் பாஸ் வீட்டிற்கு சீல்; பாதியிலேயே போட்டியாளர்கள் ரகசியமாக வெளியேற்றம்

கன்னட பிக் பாஸின் 12வது சீசன் கடந்த மாதம் 28ஆம் தேதி தொடங்கியது. இந்த நிகழ்ச்சி, பெங்களூருக்கு அருகே பிடாடி தொழில்துறை பகுதியில் உள்ள ஜாலி வுட் ஸ்டுடியோஸ் மற்றும் அட்வென்ச்சர்ஸ் வளாகத்தில் நடைபெற்று வருகிறது. இதற்காக அங்கு பிரம்மாண்ட செட் அமைக்கப்பட்டது. இதில் கழிவு நீர் எவ்வாறு சுத்திகரிக்கப்படுகிறது என்பது குறித்து கர்நாடக மாநில மாசு கட்டுப்பாட்டு வாரிய அதிகாரிகள் ஆய்வு செய்தனர். அப்போது கழிவுநீர் அங்கு சுற்றுப்புற பகுதிகளிலே வெளியேற்றப்படுவது கண்டுபிடிக்கப்பட்டது. 

அதைத்தாண்டி திடக்கழிவுகள் முறையாக பராமரிக்கப்படாமல் இருப்பதையும் சுற்றுச்சூழல் மாசுபாட்டிற்கு வழிவகுக்கும் வகையில் உள்ளே இரண்டு டீசல் ஜெனரேட்டர்கள் இருப்பதையும் அதிகாரிகள் கண்டறிந்தனர். இது சுற்றுச்சூழல் மாசுபாட்டின் விதிகளை மீறுவதால் நிகழ்ச்சி நடக்கும் செட்டை இழுத்து மூட வேண்டும் என்று கர்நாடக மாநில மாசு கட்டுப்பாட்டு வாரியம் அதிரடி உத்தரவை பிறப்பித்தது. இதனிடையே நிகழ்ச்சிக்கு எதிராக கஸ்தூரி கர்நாடக ஜனபார வேதிகேவைச் சேர்ந்த நிர்வாகிகள், ஸ்டூடியோ முன்பு போராட்டம் நடத்தினர். பிரச்சினைகள் தீர்க்கப்படும் வரை நிகழ்ச்சியை நிறுத்த வேண்டும் என்று கோரிக்கை வைத்தனர்.

இதையடுத்து அரசு வாரியத்தின் உத்தரவு படி அதிகாரிகள் பிக் பாஸ் நடக்கும் செட்டிற்கு சீல் வைத்தனர். இதனால் உடனடியாக பிக் பாஸ் வீட்டில் இருந்த 17 போட்டியாளர்கள் மற்றும் நூற்றுக்கணக்கான ஊழியர்கள் வெளியேற்றப்பட்டனர். இதில் போட்டியாளர்கள் அதே பகுதியில் உள்ள மற்றொரு ரெசார்ட்டிற்கு ரகசியமாக யாருக்கும் தெரியாமல் மாற்றப்பட்டுள்ளதாக கூறப்படுகிறது. இது தொடர்பாக நிகழ்ச்சியை ஒளிபரப்பும் கலர்ஸ் தொலைக்காட்சி, இன்றைய எபிசோட் தொலைக்காட்சியில் ஒளிபரப்பாகாது என்று தெரிவித்து எக்ஸ் பக்கம் வாயிலாக மன்னிப்பு கேட்டுள்ளனர். மேலும் ஜியோ ஹாட்ஸ்டாரில் எபிசோடை பார்க்கலாம் எனவும் அறிவித்துள்ளனர். 

இதனிடையே நிகழ்ச்சி நிறுத்தப்பட்டதால் கோடிக்கணக்கில் நஷ்டம் ஏற்பட்டதாகவும் நூற்றுக்கணக்கான ஊழியர்களுக்கு வேலை பாதித்துள்ளதாகவும் தகவல் வெளியாகியுள்ளது. ஒவ்வொரு வருட சீசனுக்கும் செட் அமைப்பதற்கு மட்டும் ரூ.5 கோடி முதல் ரூ.10 கோடி வரை செலவாகுமாம். இதற்காக 500 முதல் 600 தொழிலாளர்கள் சுமார் ஆறு மாதங்களுக்கு வேலை செய்வார்களாம். நிகழ்ச்சியை தொகுத்து வழங்கும் பிரபல நடிகர் கிச்சா சுதீப் ரூ.1 கோடி சம்பளம் பெறுவதாக கூறப்படுகிறது. இப்படி பெறும் பொருட்செலவில் உருவாக்கப்படும் நிகழ்ச்சி திடீரென ரத்து செய்யப்பட்டுள்ளது கர்நாடகா திரைத்துறையில் பரபரப்பு ஏற்பட்டுள்ளது. மேலும் நிகழ்ச்சி இனி தொடருமா எனவும் கேள்வி எழுந்துள்ளது. இது குறித்து நிகழ்ச்சி ஏற்பாட்டாளர்கள் பேச்சு வார்த்தை நடத்தி வருவதாக கூறப்படுகிறது. விரைவில் இதற்கான அதிகாரப்பூர்வ அறிவிப்பு வெளியாகும் என கர்நாடக திரை வட்டாரம் தெரிவிக்கிறது.