“பாதுகாப்பிற்கு முன்னுரிமை அளித்துள்ளோம்” - அனுபமா படக்குழு எடுத்த திடீர் முடிவு

தமிழ், தெலுங்கு, மலையாளம் என பிஸியாக நடித்து வரும் அனுபமா பரமேஸ்வரன் கடைசியாக பைசன் படத்தில் நடித்திருந்தார். இப்படம் கடந்த தீபாவளி முன்னிட்டு வெளியாகி நல்ல வரவேற்பை பெற்றது. இப்படத்தைத் தொடர்ந்து அவர் நடிப்பில் வெளியீட்டுக்கு தயாராகியுள்ள படம் ‘லாக் டவுன்’. அறிமுக இயக்குனர் ஏ ஆர் ஜீவா இயக்கியுள்ள இப்படத்தை லைக்கா நிறுவனம் தயாரித்துள்ளது. இப்படத்தில் சார்லி, நிரோஷா உள்ளிடடோர் நடித்துள்ளனர். இசையை பொறுத்தவரை என் ஆர் ரகுநந்தன் மற்றும் சித்தார்த் விப்பின் ஆகியோர் கவனித்துள்ளனர். 

இப்படம் கடந்த மாதம் கோவாவில் நடந்து முடிந்த இந்திய சர்வதேச திரைப்பட விழாவில் 23ஆம் தேதி பிரீமியர் செய்யப்பட்டது. இதைத்தொடர்ந்து வரும் ஐந்தாம் தேதி திரையரங்குகளில் வெளியாகவிருந்தது. ஆனால் அது தற்போது தள்ளிப் போகியுள்ளது. இது தொடர்பாக தயாரிப்பு நிறுவனம் வெளியிட்ட அறிவிப்பில் “தொடர்ந்து பெய்து வரும் கனமழை காரணமாகவும் மோசமான வானிலை காரணமாகவும் லாக்டவுன் திரைப்படத்தின் வெளியீட்டை ஒத்திவைக்கிறோம். 

தற்போதைய சவால்களை கருத்தில் கொண்டு எங்கள் பார்வையாளர்கள் திரையரங்க ஊழியர்கள் மற்றும் கூட்டாளர்களின் பாதுகாப்பிற்கு முன்னுரிமை அளித்து வெளியீட்டை தள்ளி வைத்துள்ளோம். தயவு செய்து பாதுகாப்பாக இருங்கள், தேவையான முன்னெச்சரிக்கை நடவடிக்கைகளை எடுங்கள். லாக் டவுன் படத்தை விரைவில் நீங்கள் தியேட்டரில் காண நாங்கள் ஆவலுடன் காத்திருக்கிறோம்” எனக் குறிப்பிடப்பட்டுள்ளது.