சர்வதேச திரைப்பட விழாவில் ‘ஆக்காட்டி’ படத்திற்கு கிடைத்த அங்கீகாரம்

மேற்கு தொடர்ச்சி மலையில் நடிப்பின் மூலம் கவனம் பெற்ற ஆண்டனி மற்றும் முல்லையரசி , சிறுவன் சுபாஷ் ஆகியோர் கதையின் மாந்தர்களாக நடித்துள்ள படம் ‘ஆக்காட்டி’. இப்படத்தை ஜெய் லட்சுமி இயக்கியிருக்க, தென் தமிழக கிராமப்புறங்களில் நிலவும் தாய்மாமன் சீர் வரிசை முறையை மையமாகக் கொண்டு உருவாக்கப்பட்டுள்ளது. மேலும் சமுதாய மரபுகள் உருவாக்கும் நெருக்கடிகளையும், அதனால் மனித மனத்தில் எழும் சிக்கல்களையும் மென்மையான உணர்வுகளையும் பேசுகிறது. பதிவு செய்கிறது. இப்படத்தை சுனில் குமார் தயாரித்துள்ளார்.  

இந்த நிலையில் 56வது சர்வதேச கோவா திரைப்பட விழாவில் ‘வேவ்ஸ் பிலிம் பசார்’ பிரிவின் கீழ் சிறந்த திரைப்பட அடையாள விருதை இப்படம் பெற்றுள்ளது. படத்தின் இயக்குநர் ஜெய் லட்சுமி, இணைத் தயாரிப்பாளர் சுனில் குமார், ஒலி வடிவமைப்பாளர் ஹரி பிரசாத், மற்றும் காஸ்டிங் இயக்குநர் சுகுமார் சண்முகம் ஆகியோர் விழாவில் கலந்து கொண்டு விருதை பெற்றனர். இப்படம் பல சர்வதேச திரைப்பட விழாவுக்கு அனுப்ப பட்டிருக்கும் நிலையில் விரைவில் முதல் பார்வையை வெளியிட தயாரிப்பு நிறுவனம் திட்டமிட்டுள்ளது.