Skip to main content

"நூதன முறையில் ஜெயிலில் இருந்து தப்பிய சோப்ராஜின் கதை" - திலகவதி ஐபிஎஸ் பகிரும் தடயம்: 10

Published on 08/05/2023 | Edited on 08/05/2023

 

Thilagavathi IPS (Rtd) Thadayam : 10

 

இந்தியாவையே நடுங்க வைத்த கொடூர மனிதன் சோப்ராஜ் ஜெயிலிலிருந்து தப்பியது பற்றிய பல்வேறு தகவல்களை நம்மோடு தமிழ்நாடு காவல்துறையின் முதல் பெண் இயக்குநர், ஓய்வு பெற்ற ஐபிஎஸ் அதிகாரி திலகவதி பகிர்ந்துகொள்கிறார்.

 

சோப்ராஜ் தப்பிக்காத சிறைச்சாலைகளே இல்லை என்று சொல்லலாம். மற்ற இடங்களில் பாதுகாப்பு குறைவு என்று கருதியதால் நேபாளத்திற்கு சென்றான். பிற நாட்டினருக்கும் மயக்க மருந்து கொடுத்து தன்வயப்படுத்துவது அவனுக்குக் கைவந்த கலை. அதுபோன்று நேபாளத்திலும் இருவரை கொலை செய்கிறான். அவனுக்கு பல்வேறு மொழிகளில் பேசத் தெரியும். இந்தியாவில் தேடப்படும் குற்றவாளியாக அறிவிக்கப்பட்டதால் தாய்லாந்து தப்பிச் செல்கிறான். அங்கும் இவனுடைய கொலைகள் தொடர்ந்தன. 

 

தாய்லாந்து போலீசார் விசாரணையைத் தொடங்கினர். அவனையும் அவனுடைய கூட்டாளிகளையும் கண்டுபிடித்து கைது செய்தனர். அதன் பிறகு மர்மமான முறையில், போதுமான ஆதாரம் இல்லை என்று கூறி அவர்கள் விடுவிக்கப்பட்டனர். தாய்லாந்து போலீசார் லஞ்சம் வாங்கிக் கொண்டு அவர்களை விடுவித்தனர் என்கிற குற்றச்சாட்டு எழுந்தது. மீண்டும் அவன் டெல்லிக்கு வந்தான். மீண்டும் சிலரைத் தன்னோடு சேர்த்துக்கொண்டு குற்றச்செயல்களைத் தொடர்கிறான். அதன் பிறகு இந்திய போலீசாரால் கைது செய்யப்பட்டு திகார் சிறையில் அடைக்கப்பட்டான். 

 

திகார் சிறையில் அனைத்து வசதிகளுடனும் ஒரு ராஜா போல் வாழ்ந்து வந்தான். சிறைக்குள் 7 குற்றவாளிகளைத் தன்னோடு சேர்த்துக்கொண்டு, தனக்கெனத் தனி அணி ஒன்றை அமைத்துக்கொண்டு தப்பிக்கத் திட்டமிட்டான். அதிகாரிகளுக்கு உணவில் மயக்க மருந்து கலந்து கொடுத்தான். அவர்கள் மயக்கமடைந்த பிறகு அவர்களுடைய கைகளையும் கால்களையும் கட்டி தனித்தனி அறையில் அடைத்தான். மயக்கத்தில் இருந்த சிறை அதிகாரி ஒருவரையும் காரில் ஏற்றிக்கொண்டு தன் கூட்டாளிகளுடன் தப்பித்தான்.

 

இது ஒரு தேசிய அவமானம் என்று பத்திரிகைகள் எழுதின. சிறை அதிகாரிகளுக்கு பணம் கொடுத்தே அவன் தப்பித்துச் சென்றான் என்று அனைவரும் பேசினர். அனைத்து இடங்களிலும் அவனைத் தேடும் பணிகள் முடுக்கிவிடப்பட்டன. அதற்கு முன்பு ஒருமுறை அவனைக் கைது செய்த அனுபவமிக்க ஷிண்டே என்கிற அதிகாரி கோவாவில் அவனைப் பிடித்தார். பலத்த பாதுகாப்போடு அங்கிருந்து அவனை மும்பைக்கு அழைத்து வந்தார். மீண்டும் அவன் சிறையில் அடைக்கப்பட்டான். 

 

ஆனால், இப்படி அவன் தப்பித்தது மீண்டும் கோவாவில் சிக்கியது என்று அனைத்தும் சோப்ராஜ் நடத்திய நாடகம்தான் என்பது தெரிந்தது. தாய்லாந்து போலீசாரிடம் சிக்கினால் தூக்கில் போட்டு விடுவார்கள் என்பதால் இந்திய சிறையில் இருப்பதையே அவன் பாதுகாப்பாகக் கருதினான். 1997 ஆம் ஆண்டு சிறையிலிருந்து விடுவிக்கப்பட்டவுடன் நேபாளத்திற்கு சென்றான். அங்கு சூதாட்டத்தில் ஈடுபடும்போது ஒரு பத்திரிக்கையாளர் இவனைப் பார்த்தார். அவருக்கு இவனுடைய குற்ற வரலாறு தெரியும். காவல்துறைக்கு அவர் தகவல் கொடுத்து இவன் கைது செய்யப்பட்டான்.

 

 

 

Next Story

திருமணத்திற்குத் தயாராகிக் கொண்டிருந்த இளம்பெண்; முன்னாள் காதலனின் வெறிச்செயல்!

Published on 24/06/2024 | Edited on 24/06/2024
Incident happened on A young woman preparing for marriage in madhya pradesh

மத்தியப் பிரதேச மாநிலம், டாடியா பகுதியைச் சேர்ந்தவர் காஜல் அஹிர்வார்(22). இவருக்கும், இளைஞர் ஒருவருக்கு நேற்று (23-06-24) திருமண ஏற்பாடு செய்யப்பட்டிருந்தது.

மணப்பெண்ணான காஜல் திருமணம் நடைபெறுவதற்கு சில மணி நேரத்திற்கு மேக்கப் போடுவதற்காக உத்தரப் பிரதேச மாநிலம், ஜான்சியில் உள்ள அழகு நிலையத்திற்கு தனது சகோதரியுடன் வந்தார். மேலும், அந்த அழகு நிலையத்திற்கு உள்ளே சென்று காஜல் மேக்கப் போட்டுக் கொண்டிருந்தார்.  அப்போது, அங்கு அடையாளம் தெரியாத நபர் ஒருவர் முகத்தில் முகமூடி அணிந்து வெளியே நின்று கொண்டு, காஜலிடம் வெளியே வருமாறு கூறியுள்ளார். ஆனால், அதற்கு அந்த பெண் மறுப்பு தெரிவித்துள்ளார். மேலும், அந்த நபர், ‘வெளியே வா காஜல், நீ எனக்கு துரோகம் செய்துவிட்டாய்’ என்று கூறியதாக கூறப்படுகிறது. 

ஆனாலும், அந்த பெண் வெளியே வர மறுத்துள்ளார். இதில் ஆத்திரமடைந்த அந்த நபர், தான் மறைத்து வைத்திருந்த துப்பாக்கியை கொண்டு காஜலை சரமாரியாக சுட்டார். இதில் ரத்த வெள்ளத்தில் படுகாயமடைந்த காஜல் மயங்கி கீழே விழுந்தார். இதனிடையே, காஜலை துப்பாக்கியால் சுட்ட அந்த நபர் அங்கிருந்து தப்பிச் சென்றுள்ளார். இதில் அதிர்ச்சியடைந்த காஜலின் சகோதரி, காஜலை மீட்டு சிகிச்சைக்காக மருத்துவமனைக்கு கொண்டு சென்றார். அங்கு அவரை பரிசோதித்த மருத்துவர்கள், காஜல் ஏற்கெனவே இறந்துவிட்டதாகத் தெரிவித்துள்ளனர். 

இந்தச் சம்பவம் குறித்து போலீசாருக்கு தகவல் கொடுக்கப்பட்டது. தகவல் அறிந்து விரைந்து வந்த போலீசார் இந்தச் சம்பவம் தொடர்பாக வழக்குப்பதிவு செய்து விசாரணை நடத்தினர். அந்த விசாரணையில், இளம்பெண்ணை சுட்டுக்கொலை செய்தவர் தீபக்.  அந்தப் பெண் வசிக்கும் அதே ஊரில்தான் அவரும் வசித்து வந்துள்ளார். தீபக்கும், காஜலும் காதலித்து வந்ததாகக் கூறப்படுகிறது. இதனிடையே, காஜலுக்கு வேறு ஒருவருடன் திருமணம் ஏற்பாடு செய்யப்பட்டுள்ளதாகவும் கூறப்படுகிறது. இதில் ஆத்திரமடைந்த தீபக், காஜலை சுட்டுக் கொலை செய்துள்ளார் என்பது தெரியவந்தது. இதனையடுத்து, இளம்பெண்ணை சுட்டுக் கொன்ற தீபக்கை போலீசார் தீவிரமாக தேடி வருகின்றனர். திருமணம் நடைபெறுவதற்கு முன்பு இளம்பெண் ஒருவர் கொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது. 

Next Story

கள்ளச்சாராய வியாபாரி கொடுத்த வாக்குமூலம்; மீண்டும் தோண்டி எடுக்கப்பட்ட உடல்

Published on 23/06/2024 | Edited on 23/06/2024
Confession given by liquor dealer; The body was exhumed again


கள்ளக்குறிச்சி மாவட்டம் கருணாபுரத்தில் கள்ளச்சாராயம் குடித்து 4 பெண்கள் உட்பட 50க்கும் மேற்பட்டோர் உயிரிழந்த சம்பவம் நாட்டையே உலுக்கிக் கொண்டிருக்கிறது. சிகிச்சையில் இருப்பவர்களில் பலர் சிகிச்சை பலனின்றி உயிரிழந்து வருகின்றனர். இதனால் இறப்புகளின் எண்ணிக்கையும் தொடர்ந்து அதிகரித்து வருகிறது. அதே சமயம் கள்ளச்சாராயம் குடித்து பாதிக்கப்பட்டவர்களுக்கு கள்ளக்குறிச்சி, சேலம் மற்றும் விழுப்புரம் அரசு மருத்துவமனை, புதுச்சேரி ஜிப்மர் மருத்துவமனையில் தொடர்ந்து தீவிர சிகிச்சை அளிக்கப்பட்டு வருகிறது.

இந்தநிலையில் கள்ளக்குறிச்சி மாவட்டம் சின்னசேலம் பகுதியைச் சேர்ந்த ஜெயமுருகன் என்பவர் கடந்த 18 ஆம் தேதி அதே பகுதியைச் சேர்ந்த ராமர் என்பவர் விற்பனை செய்த சாராயத்தை வாங்கி குடித்துள்ளார். பின்னர் உடல்நலக்குறைவு ஏற்பட்டு மருத்துவமனைக்கு செல்லும் வழியிலேயே அவர் உயிரிழந்தார். இதனால் மீண்டும் உடலை வீட்டுக்கு எடுத்து வந்த ஜெயமுருகனின் உறவினர்கள் அவரது உடலை மறுநாள் அடக்கம் செய்தனர். ஆனால் ஜெயமுருகன் கள்ளச்சாராயம் குடித்து உயிரிழந்தது அவருடைய வீட்டாருக்கு தெரியவில்லை என்று கூறப்படுகிறது. இந்த நிலையில் கள்ளக்குறிச்சியில் கள்ளச்சாராயம் உயிரிழப்பு பரபரப்பை ஏற்படுத்தியது.

போலீசார் தொடர்ந்து கள்ளச்சாராய வியாபாரிகளை கைது செய்த நிலையில் ராமர் என்பவரையு விசாரித்த போது அதே ஊரில் உயிரிழந்த ஜெயராமன், ஜெயமுருகன் உட்பட பலர் தன்னிடம் சாராயம் வாங்கிக் குடித்ததாக வாக்குமூலத்தில் தெரிவித்தார். இதனையடுத்து ஜெயராமன், ஜெயமுருகன் ஆகியோர் வீட்டிற்குச் சென்ற போலீசார் இது குறித்து விசாரணை நடத்தினர். விசாரணையில் அவர்கள் கள்ளச்சாராயம் அருந்தியதால்தான் உயிரிழந்தார்களா என்பதை உறுதிசெய்ய உடல்கள் தோண்டி எடுக்க முடிவு செய்யப்பட்டது. அதன்படி இன்று மதியம் வருவாய் வட்டாட்சியர் கமலக்கண்ணன், காவல் ஆய்வாளர் கந்தகுமார் ஆகியோர் முன்னிலையில் தோண்டி எடுக்கப்பட்ட உடல் விழுப்புரம் முண்டியம்பாக்கம் அரசு மருத்துவக் கல்லூரி மருத்துவமனைக்கு பிரேதப் பரிசோதனைக்காக அனுப்பி வைக்கப்பட்டுள்ளது.