Skip to main content

கோபர் நிகஸும் கலிலியோவும்...! டெலஸ்கோப்பின் கதை பகுதி 1

Published on 29/03/2019 | Edited on 29/03/2019

தொடக்க காலத்தில் பூமி தட்டையான நிலப்பரப்பாக கருதப்பட்டது. அதாவது, ஒரு திசையில் தொடர்ந்து நடந்தால் பூமியின் முடிவில் அதலபாதாளம் இருப்பதாக நினைத்தனர்.

 

telescope story part 1

 

பூமியை மையமாக வைத்து சூரியனும் சந்திரனும் சுற்றி வருவதாக கருத்து நிலவியது. வானம் என்பது திடப்பொருளாகவும், நட்சத்திரங்கள் அனைத்தும் இறைவன் படைத்த ஒளிவிளக்குகள் எனவும் நினைத்தனர்.

 

பைபிள் இப்படித்தான் போதித்தது. கிறிஸ்தவ தலைமையகம் இதைத்தான் வலியுறுத்தியது. பைபிள் எதைச் சொல்கிறதோ அதுதான் மாற்றமுடியாத உண்மை என்றும், பைபிளின் போதனைக்கு மாறாக யார் கருத்து சொன்னாலும் அது குற்றம் என்றும் கருதப்பட்டது.

 

இந்நிலையில் தான் வானவியல் அறிஞர்கள் தாலமியும், கோபர்நிகஸும் வானசாஸ்திரத்தில் புதிய ஈடுபாட்டை வளர்த்தனர். பூமி மையமாகவும் அதை சூரியன் உள்ளிட்ட கிரகங்கள் சுற்றி வருவதாகவும், தாலமி கூறினார்.

 

ஆனால் சூரியன் தான் மையத்தில் இருப்பதாகவும் பூமி உள்ளிட்ட மற்ற கிரகங்கள் சூரியனைச் சுற்றுவதாகவும் கோபர்நிகஸ் புதிய கோட்பாடு ஒன்றை வெளியிட்டார். எனினும், தான் கண்டுபிடித்ததை அவர் வெளியில் சொல்லவில்லை.
 

சக்தி வாய்ந்த கத்தோலிக்க தலைமையகம் தனக்கு தண்டனை அளித்துவிடும் என்று அவர் அஞ்சினார். பிரபஞ்சத்தின் மையத்தில் பூமி இருக்கிறது. பூமியைச் சுற்றும் கிரகங்கள் கோளவடிவில் இருக்கின்றன. அவற்றில் மலைகளோ, பள்ளத்தாக்குகளோ இல்லை என்று கத்தோலிக்க தலைமையகம் நம்பியது. அந்த நம்பிக்கைக்கு எதிரான கருத்துக்களை அது வரவேற்கவில்லை.

 

கோபர்நிகஸ் கண்டுபிடித்த உண்மையை கலிலியோ உறுதிப்படுத்தினார். 1609-ஆம் ஆண்டு கலிலியோ கலிலி என்பவர் ஒரு வித்தியாசமான கருவியைக் கண்டுபிடித்தார். இரவு நேர வானத்தை நோக்கி அந்த கருவி வழியாக பார்த்தார். வெறும் கண்ணால் பார்க்கும் வானத்தை விட இப்போது வானம் மிகத் துல்லியமாக தெரிந்தது.

 

நிலவை வெறும் கண்ணால் பார்க்கும் போது கிரே மற்றும் வெள்ளை நிறம் கலந்த பொருளாக மின்னும். ஆனால் தனது புதிய கருவி வழியாக அதைப் பார்த்த கலிலியோ, நிலவின் மேற்பரப்பில் நிழல் பரப்புகளும், வெளிச்சம் மிகுந்த புள்ளிகளும் தெரிவதை கண்டார். நிழற்பரப்புகள் பள்ளத்தாக்குகள் எனவும், வெளிச்சம் மிகுந்த புள்ளிகள் மலைகள் எனவும் அவர் உணர்ந்தார்.

சாதாரணமாக பார்க்கும் போது இரவு நேர வானில் வெறும் புள்ளிகளாகத் தெரியும் நட்சத்திரங்கள் கோளவடிவங்களாக தெரிந்தன. சில கிரகங்களுக்கு நிலவுகள் இருப்பதையும் அவர் கண்டுபிடித்தார்.

 

தான் கண்டுபிடித்த உண்மைகளை நட்சத்திரங்கள் தரும் செய்திகள் என்ற தலைப்பில் கட்டுரையாக வெளியிட்டார். அவருடைய இந்த கண்டுபிடிப்புகள் பெரும் வியப்பையும், உற்சாகத்தையும் ஏற்படுத்தின.

 

தான் கண்டுபிடித்த கருவிக்கு இத்தாலி மொழியில் டெலஸ்கோப்பியோ என்று பெயரிட்டு கத்தோலிக்க தேவாலய தலைமையகத்துக்கு அன்பளிப்பாக கொடுத்தார். டெலஸ்கோப்பியோ என்றால் தொலைவில் இருக்கும் பொருளை பார்க்க உதவும் கருவி என்று அர்த்தம்.

 

கலிலியோவின் இந்த டெலஸ்கோப் மிக எளிமையான கருவியாகும். அது ஒரு குழல் வடிவில் இரண்டு லென்சுகளுடன் உருவாக்கப்பட்டிருந்தது. ஒரு முனையில் குவிலென்சும், மறு முனையில் குழிலென்சும் பொருத்தப்பட்டிருந்தது.

 

telescope history part 1

 

எதிரிகளின் ராணுவ முகாம்களை உளவு அறிவதற்காக அப்போதுதான் ஒரு கருவி கண்டுபிடிக்கப்பட்டிருந்தது. அந்த மாதிரியில்தான் கலிலியோ தனது கருவியையும் உருவாக்கினார்.

 

அவர் உருவாக்கிய அந்த முதல் கருவிதான் இப்போது வரை டெலஸ்கோப்புக்கு அடிப்படையாக அமைந்திருக்கிறது.

 

கலிலியோ தனது சிறிய டெலஸ்கோப் வழியாக பார்த்தபொழுது ஒரு கிரகத்தின் முழு உருவத்தையும் ஒரே சமயத்தில் பார்க்கமுடியவில்லை. அவருடைய டெலஸ்கோப் உருவாக்கப்பட்டதில் பல குறைபாடுகள் இருந்தன. சாதாரண உருவத்தை அது 30 மடங்கு பெரிதாகக் காட்டியது. உருவமும் மங்கலாகவே தெரிந்தது.

 

அவருடைய ஆராய்ச்சி விரிவாகிக் கொண்டே போனது. இது அவருக்கு எதிரிகளை உருவாக்கியது. இந்த சமயத்தில் தான் அவர் முக்கியான விஷயத்திற்குள் நுழைந்தார். சந்திரன் தேய்ந்து மறைவதை போல, வெள்ளிகிரகமும் தேய்ந்து மறைவதை அவர் கண்டறிந்தார். இதையடுத்து அந்த கிரகம் பூமியைச் சுற்றவில்லை. மாறாக, அது சூரியனைச் சுற்றுகிறது என்று அறிந்தார்.

 

அதுபோல, வியாழன் கிரகத்தின் நிலவுகள் வியாழனைத் தான் சுற்றுகின்றன என்பதையும் கண்டறிந்தார். இருந்தாலும், கலிலியோ மிகுந்த எச்சரிக்கையுடன் செயல்பட்டார். தான் கண்டறிந்த உண்மைகளை வெளியிட்டால் அது கத்தோலிக்க தேவாலயத்தின் நம்பிக்கைக்கு எதிரானதாக இருக்கும் என்பதை உணர்ந்தார்.
 

பைபிளின் கருத்தை மறுத்தால், அந்த காலகட்டத்தில் மரணதண்டனைதான் விதிக்கப்படும். இருந்தாலும், தனது கருத்தை வெளியிட்டே ஆக வேண்டிய நிர்பந்தம் ஏற்பட்டது. முன்பு அவரை ஆதரித்த கத்தோலிக்க தேவாலயம், இப்போது அவருக்கு எதிராக திரும்பியது. தான் கண்டுபிடித்த உண்மைகளை வெளியிடக்கூடாது என்று அது தடை விதித்தது.

 

விசாரணைக் கூண்டில் நிறுத்தி சாகும் வரை வீட்டிலேயே அடைந்து கிடக்க வேண்டும் என்று உத்தரவிட்டது. (கலிலியோ கூண்டில் நிறுத்தப்பட்டு கல்லால் எறிந்து கொல்லப்பட்டதாகவும், நெருப்புக்குள் இறக்கி கொல்லப்பட்டதாகவும் முன்பு தகவல்கள் வெளியாயின. பின்னர், அதற்கு ஆதாரம் இல்லை என்று மறுக்கப்பட்டது.)

 

வீட்டுச்சிறையில் இருந்த போதும் தொடர்ந்து சோதனைகளில் ஈடுபட்டார். கிறிஸ்தவ மதத்துக்கும் தனக்கும் கருத்து மோதல் எதுவும் இல்லை என்று கலிலியோ வாதிட்டார். மனிதனின் ஆய்வுத்திறன் மிகப்பெரிய வரம் என்றார்.

 

நம்மை படைத்த கடவுள் தான் அறிவையும், மொழிகளையும், புத்திசாலித்தனத்தையும் அளித்திருக்கிறார். அவற்றை ஓரங்கட்டி புதைத்துவிடும்படி அவர் கூறவில்லை. கண்ணால் பார்க்கும் உண்மைகளை ஏற்க மறுப்பதை அவர் விரும்ப மாட்டார் என்று கலிலியோ ஆணித்தரமாக கூறினார்.

 

வானத்தின் அடர்த்தியை நாம் அறிந்து கொள்வதற்கு கலிலியோ வழிவகுத்தார். பிரபஞ்சத்தின் ரகசியங்கள் இன்னமும் விரிவடைந்து கொண்டே போகின்றன. எடுத்தவுடன் தனது டெலஸ்கோப்பை அவர் உருவாக்கிவிடவில்லை. சுமார் 100-க்கும் மேற்பட்ட டெலஸ்கோப்புகளை அவர் உருவாக்கினார். அவற்றில் 10 டெலஸ்கோப்புகள் மட்டுமே ஓரளவு அவருக்கு உபயோகமாக இருந்தன.
 

1608-ஆம் ஆண்டு ஹாலந்தைச் சேர்ந்த ஹேன்ஸ் லிப்பர்ஸே என்ற கண்கண்ணாடி செய்யும் நபர் தனது புதிய கருவிக்கு காப்புரிமை கேட்டிருந்தார். தனது கடையில் சிறுவர்கள் இரண்டு லென்சுகளை ஒரே நேர்க்கோட்டில் பிடித்து பொருட்கள் மிக அருகாக தெரிவதாக கூறியதைக் கேட்டார் லிப்பர்ஸே.

 

அந்த அடிப்படையில் தான் ஐ ஸ்பை என்ற தொலைநோக்கு கருவிக்கு காப்புரிமை கோரியுள்ளார். அவருடைய தொழில்நுட்பத்தின் அடிப்படையில்தான் கலிலியோ தனது டெலஸ்கோப்பை உருவாக்கினார்.

 

கலிலியோவின் முதல் டெலஸ்கோப் 10 அடி நீளத்துடன் குழல் வடிவில் இருந்தது. அந்த டெலஸ்கோப் வழியாக 20 மடங்கு உருப்பெருக்கி பார்த்தாலும் கூட நிலவின் கால் பகுதி மேற்பரப்பை மட்டுமே பார்க்கமுடியும்.

நிலவிலிருந்து டெலஸ்கோப் வழியாக ஊடுறுவும் ஒளிக்கதிர்கள் சிதறின. எனவே நிலவின் தோற்றம் மங்கலாக இருந்தது. இந்தக் குறைபாடுகளை கலிலியோவால் சரிசெய்ய இயலவில்லை. கண்ணாடியை லென்சாக மாற்றும் தொழில்நுட்பம் முன்னேறி இருக்கவில்லை. எனவே, அந்த லென்சுகள் துள்ளியமாக இல்லை.

 

கலிலியோவின் டெலஸ்கோப்பை மாதிரியாகக் கொண்டு பல டெலஸ்கோப்புகள் அந்த காலகட்டத்திலேயே உருவாக்கப்பட்டன. அவற்றின் வழியாக பார்த்தவர்கள் கலிலியோ சொன்னது போல நிலவின் தோற்றம் இருக்கவில்லை என்று உணர்ந்தனர்.

 

கலிலியோ வெளியிட்ட விவரங்களை மேலும் ஆய்வு செய்ய வேண்டும் என்ற அடிப்படையில் மட்டுமே பார்க்கவேண்டும் என்பதை சிலர் மட்டுமே புரிந்து கொண்டனர்.

 

 

கலிலியோ வாழ்க்கை குறிப்பு

 

1564-ஆம் ஆண்டு இத்தாலியில் பிறந்தவர் கலிலியோ. சின்ன வயதில் கலிலியோ கேள்வி கேட்பவராக வளர்ந்தார்.

 

பைஸா நகரத்தில் கணித பேராசிரியராக பணிபுரிந்தார். அங்கு தனக்கென்று ஒரு மாணவர் கூட்டத்தை அவர் பெற்றிருந்தார்.

 

கிரேக்க அறிஞரான அரிஸ்டாட்டில் ஒரு கோட்பாட்டை வெளியிட்டிருந்தார். பல்வேறு எடையுள்ள பொருட்களை உயரமான இடத்திலிருந்து கீழே போட்டால் வெவ்வேறு நேர வித்தியாசத்தில் அவை பூமியைத் தொடும் என்பது அவருடைய கோட்பாடு.

 

இந்தக் கோட்பாடு தவறு என்று கலிலியோ உணர்ந்தார். பொருட்களின் எடை ஒரு பொருட்டே அல்ல. வேறுபட்ட எடையுள்ள பொருட்களை உயரத்திலிருந்து போட்டால் அனைத்துமே ஒரே நேரத்தில் பூமியைத் தொடும் என்று கூறினார்.

 

தனது மாணவர்களை உயரமான கோபுரத்துக்கு அழைத்துச் சென்று தான் கூறியது சரிதான் என்பதை நிரூபித்துக் காட்டினார்.

 

எந்த ஒரு விஷயத்தையும் சோதனை செய்து சரி அல்லது தவறு என்று நிரூபிக்கும் ஆற்றலை கலிலியோ பெற்றிருந்தார்.

 

1609-ஆம் ஆண்டு கலிலியோ டெலஸ்கோப்பை உருவாக்கி வானத்தை நோக்கி திருப்பினார். நிலவில் மலைகளும், பள்ளத்தாக்குகளும் உள்ளன. சாதாரணமாக பார்க்கும் போது வானத்தில் தெரிவதைக் காட்டிலும் கூடுதலாக நட்சத்திரங்கள் உள்ளன. கிரகங்களில் தோன்றும் புள்ளிகள் பூமியின் நிலவைப் போல துணைக்கோள்கள்தான் என்றெல்லாம் கலிலியோ நிரூபித்துக் காட்டினார்.

 

நமது சூரியக்குடும்பத்தில் சூரியன் நடுநாயகமாக இருக்கிறது. மற்றக் கிரகங்கள் அதைச் சுற்றுகின்றன என்று தெரிவித்தார். சக்தி வாய்ந்த கத்தோலிக்க தேவாலயம் அவரை வீட்டுச் சிறையில் தனிமைப் படுத்தியது. இருந்தாலும், சாகும் வரை அவர் தனது ஆய்வுகளைத் தொடர்ந்தார்.

 

Next Story

தொலைநோக்கி மூலம் கோள்களைக் கண்டுகளித்த மாணவர்கள் 

Published on 27/01/2023 | Edited on 27/01/2023

 

trichy school students seen planets via telescope 

 

திருச்சி மாவட்டம் லால்குடி அருகே மணக்காலில் உள்ள தென் போஸ்கோ உயர்நிலைப் பள்ளியில் வானில் உள்ள கோள்களை தொலைநோக்கி மூலம் மாணவ மாணவிகள் காணும் வகையில் நிகழ்ச்சி ஒன்று ஏற்பாடு செய்யப்பட்டு இருந்தது. இந்நிகழ்ச்சியில் 500-க்கு மேற்பட்ட மாணவ, மாணவிகள் குழந்தைகள் 300-க்கும் மேற்பட்ட  பொதுமக்கள் வானில் உள்ள கோள்களை தொலைநோக்கி மூலம் பார்த்து ரசித்தனர். இந்நிகழ்ச்சி நேற்று மாலை ஆறு மணி முதல் 9 மணி வரை நடைபெற்றது.

 

வானில் உள்ள கோள்கள் பூமிக்கு அருகில் வருகின்ற காட்சிகளை தொலைநோக்கி வழியாக நான்கு கோள்களை பார்க்க முடியும் என எதிர்பார்த்த நிலையில் கூடுதலாக ஒரு கோள் ஐந்தாவதாக காட்சியளித்ததாக நிகழ்ச்சி ஏற்பாட்டாளர்கள் தெரிவித்தனர்.

 

இந்நிகழ்வை மணக்காலில் உள்ள தென்போஸ்கோ உயர்நிலைப் பள்ளியில் லால்குடி இயற்கை விழுதுகள், என் எம் சி அஸ்ட்ரோ கிளப் திருச்சி அஸ்ட்ரோ கிளப்,மற்றும் சங்கம் சில்க்ஸ் இணைந்து லால்குடியில் முதன்முறையாக வானில் உள்ள கோள்களை தொலைநோக்கி வழியாக காணும் வகையில் ஏற்பாடு செய்யப்பட்டு இருந்தது குறிப்பிடத்தக்கது. 

 

 

Next Story

நீளமான டெலஸ்கோப்புகள்

Published on 05/04/2019 | Edited on 05/04/2019

கத்தோலிக்க தேவாலயம் கலிலியோவை மிரட்டித் தனிமைப் படுத்தியது. ஆனால் அவர் வெளியிட்ட கோட்பாடுகள் விரைவாக பற்றிக் கொண்டன. ஐரோப்பா முழுவதும் டெலஸ்கோப் பரவியது.

 

telescope

 

அறிவியல் பூர்வமான உண்மைகள் தகுந்த ஆதாரங்களுடன் நிரூபிக்கப்பட வேண்டும் என்ற தத்துவம் ஏற்றுக் கொள்ளப்பட்டது. ஜெர்மனியில் பிறந்தவர் ஜோகன்னஸ் கெப்லர். இவர் கண்ணாடி குறித்து ஆய்வு செய்தவர். பிறகு வானவியலில் ஈடுபாடு கொண்டார்.

 

இவர் தான் கண்ணாடி லென்ஸ் எவ்வாறு ஒளியை பிரதிபலிக்கிறது என்பதை முதன்முதலில் புரிந்து கொண்டவர். லென்சுகளின் வடிவத்தை மாற்றி அவை பொருத்தப்படும் இடங்களை மாற்றினால் டெலஸ்கோப்பில் தெரியும் உருவத்தின் தரம் உயரும் என்று கெப்லர் கூறினார்.

 

டெலஸ்கோப்பின் முதல் லென்ஸ், குழிலென்ஸாக இருந்தது. அடுத்தது குவிலென்ஸாக இருந்தது. குழிலென்ஸுக்கு பதிலாக குவிலென்ஸை பொருத்தினார் கெப்லர். இது பார்க்கிற உருவங்களை பெரிதாக காட்ட உதவியது. கலிலியோ உருவாக்கிய டெலஸ்கோப்புக்கு பதிலாக இரண்டு குவிலென்ஸ் பொருத்தப்பட்ட கெப்லரின் டெலஸ்கோப்புகள் வரவேற்பை பெற்றன. இருந்தாலும் பிரகாசமான கோள்களைச் சுற்றி தோற்றமளிக்கும் வண்ண வளையங்கள் கெப்லரின் டெலஸ்கோப்பில் சிதறின. ஒவ்வொரு வண்ணத்தையும் வேறுபட்ட அளவில் லென்ஸுகள் வளைத்தன.

ஆனால், மங்கலான தோற்றத்தை தெளிவாக காட்டியது கெப்லரின் டெலஸ்கோப். கோளவடிவிலான லென்ஸ்கள் ஒளிக்கதிர்களை வளைக்கின்றன. அவை ஒளியை ஒரே இடத்தில் சந்திக்கவிடாமல் செய்கின்றன.

 

telescope

 

மனிதனின் விழிலென்ஸை நன்கு ஆய்வு செய்த கெப்லர், கோளவடிவிலான லென்ஸைக் காட்டிலும் வித்தியாசமான வடிவத்தில் டெலஸ்கோப் லென்ஸ் இருக்க வேண்டும் என்பதை உணர்ந்தார். ஆனால் வேறுபட்ட வடிவங்களில் லென்ஸ்களை உருவாக்கும் தொழில்நுட்பம் அறிமுகமாகவில்லை. அதே சமயம் வழக்கமான வளைவுகளை காட்டிலும் கூடுதல் வளைவுடன் கோளவடிவ லென்ஸ்களை உருவாக்கினர். இந்த லென்ஸ்கள் ஒளியை குறைவாகவே வளைத்தன.

 

டெலஸ்கோப்பின் இரண்டு லென்ஸுகளுக்கும் இடைப்பட்ட தூரம் அதிகமானால் மிகவும் தொலைவுள்ள பொருட்களை அருகில் பார்க்க முடியும் என்று வானியல் அறிஞர்கள் உணர்ந்தனர். எனவே அவர்கள் மிக நீளமான டெலஸ்கோப்புகளை பயன்படுத்த தொடங்கினர்.

 

டெலஸ்கோப்புகளின் நீளம் நாளடைவில் மிக அதிகமாக நீண்டு கொண்டே போனது. சில டெலஸ்கோப்புகள் 100 அடி நீளம் வரை இருந்தன. இத்தகைய டெலஸ்கோப்புகளை பயன்படுத்துவதில் நிறைய சிரமங்கள் இருந்தன.

 

இந்த ஆர்வம் கட்டுக்கடங்காமல் போனது. ஒரு சமயத்தில் 1000 அடி நீளத்தில் டெலஸ்கோப் உருவாக்கினால் நிலவில் வாழும் விலங்குகளைக் கூட பார்க்கலாம் என்று கூறும் அளவுக்கு சிலர் போனார்கள். நீளமான டெலஸ்கோப்புகள் கூடுதல் கவனத்தை பெற்றாலும் பெரிய அளவில் வெற்றிபெறவில்லை. இருந்தாலும், அந்த காலகட்டத்தில் உருவாக்கப்பட்ட 30 முதல் 40 அடி நீள டெலஸ்கோப்புகளில்தான் முக்கியமான பல கண்டுபிடிப்புகள் நிகழ்த்தப்பட்டன.

 

1600களின் தொடக்கத்தில் கலிலியோ தனது 4 அடி நீள டெலஸ்கோப்பை உருவாக்கினார்.  1647ல் போலந்து நாட்டைச் சேர்ந்த ஜோகன்னஸ் ஹவேலியஸ் 12 அடி நீள டெலஸ்கோப்பை உருவாக்கினார். அது ஒரு தொடக்கம் தான்.

 

12 அடி நீளமுள்ள டெலஸ்கோப்புகள் பார்க்கும் உருவத்தை 50 மடங்கு பெரிதாக காட்டின. அவை வானியல் அறிஞர்களுக்கு போதவில்லை. ஹவேலியஸ் 60 முதல் 70 அடி நீளமுள்ள டெலஸ்கோப்பை உருவாக்கிப் பயன்படுத்தினார்.

 

அதுவும் திருப்தி அளிக்காததால் பால்டிக் கடற்கரையோரம் 150 அடி நீள டெலஸ்கோப்பை நிறுவினார். இதற்காக அவர் 90 அடி உயரத்தில் ஒரு கம்பத்தை நட்டார். அதன் குறுக்காக மரக்குழல் ஒன்றை அமைத்தார். காற்றில் அசையாமல் இருப்பதற்கு தேவையான ஏற்பாடுகளை செய்தார். இருந்தாலும், அந்த டெலஸ்கோப் எதிர்பார்த்த வெற்றியை தரவில்லை. பலமான காற்றில் அது அசைந்தது. தெளிவான உருவம் கிடைக்கவில்லை. எனவே எப்போதாவது மட்டுமே அது பயன்பட்டது.

 

ஜோகன்னஸ் ஹவேலியஸ் வாழ்க்கை குறிப்பு

 

போலந்து நாட்டைச் சேர்ந்த டான்ஸிக் என்ற நகரில் மிகப் பெரிய செல்வந்தரின் மகனாக பிறந்தவர் ஹவேலியஸ்.

 

சட்டம் படித்த இவர் ஐரோப்பா முழுவதும் சுற்றினார். பிறகு, தனது சொந்த ஊரிலேயே மதுபான தொழிற்சாலையை உருவாக்கினார். அரசியலிலும் ஈடுபட்டார்.

 

அந்த சமயத்தில்தான் வானவியல் பிரபலம் அடைந்தது. ஹவேலியஸும் வானத்தின்பால் ஈர்க்கப்பட்டார். 1641ஆம் ஆண்டு தனது வீட்டிலேயே முதல் ஆய்வுக்கூடத்தை அமைத்தார். விரைவிலேயே சிறிய அளவு ஆய்வுக்கூடம் உதவாது என்று புரிந்துகொண்டார்.

 

வானத்திலுள்ள நட்சத்திரங்களை வரைபடமாக கொண்டுவர வேண்டும் என்று அவர் விரும்பினார்.

 

டெலஸ்கோப்புகள் வேலை செய்யும் விதம் குறித்த ஹவேலியஸின் ஞானம் நீளமான, மிக நீளமான டெலஸ்கோப்புகளை உருவாக்க தூண்டியது. இவர் அமைத்த 150 அடி நீள டெலஸ்கோப்பை பார்க்க போலந்து ராஜாக்களும், ராணிகளும் வந்த வண்ணம் இருந்தார்கள்.

 

இவருக்கு தேவையான உதவித் தொகை அளிக்கவும் உத்தரவிட்டார்கள். அன்றைய காலகட்டத்திலிருந்த ராயல் சொஸைட்டியில் உறுப்பினராக சேர்த்துக் கொள்ளப்பட்டார்.

 

நிலவின் மிக விரிவான வரைபடத்தை இவர் உருவாக்கினார். புதன் கிரகத்தின் படிப்படியான தோற்றங்களை வரைந்தார். சூரியனின் மேற்பரப்பில் தெரியும் கரும்புள்ளிகளை கண்டறிந்தார். ஏராளமான குறுங்கோள்களை கண்டறிந்து தெரிவித்தார்.

 

1663ஆம் ஆண்டு இவரது முதல் மனைவி இறந்தார். அதை தொடர்ந்து 16 வயது நிரம்பிய எலிசபெத் கூப்மேன் என்ற பெண்ணை மணந்து கொண்டார். இவர் தான் ஹவேலியஸின் ஆய்வுகளுக்கு உதவியாக இருந்தார். 1679ஆம் ஆண்டு ஹவேலியஸின் ஆய்வுக்கூடத்தில் தீ விபத்து ஏற்பட்டது. அதில் அரிதான பல வரைபடங்கள் எரிந்து நாசமாயின.

 

ஆனால் 1687ல் ஹவேலியஸ் இறந்த பிறகு எஞ்சியிருந்த பல முக்கியமான வரைபடங்களை எலிசபெத் வழங்கினார்.

 

ஹவேலியஸின் நிலா வரைபடம் (1647)

 

hevelius moon art

 

முதல் டெலஸ்கோப் உருவாக்கப்பட்டு 40 ஆண்டுகளுக்குப் பிறகு, ஹவேலியஸ் நிலவின் முதல் முழுமையான வரைபடத்தை உருவாக்கினார்.
 

தனது டெலஸ்கோப் மூலம் 4 ஆண்டுகள் நிலாவை இவர் ஆய்வு செய்தார். பகுதிபகுதியாக ஆய்வு செய்து முழுமையான வரைபடம் ஒன்றை உருவாக்கினார். நிலாவில் உள்ள மலைகளின் உயரத்தை கூட இவர் அனுமானித்தார்.

 

தான் வரைந்த வரைபடத்தில் நிலாவில் உள்ள மலைகளுக்கு பூமியில் உள்ள மலைகளின் பெயரையும், கடல்களின் பெயரையும் சூட்டினார்.

 

1647ல் ஹவேலியஸின் அட்லஸ் வெளியிடப்பட்டது. அதன் உதவியுடன் வானியல் அறிஞர்கள் நிலாவை ஆய்வு செய்தனர். அடுத்த 100 ஆண்டுகள் வரை அந்த வரைபடம் தான் வானியல் அறிஞர்களுக்கு உதவிகரமாக இருந்தது.

 

ஹவேலியஸின் டெலஸ்கோப் மற்ற டெலஸ்கோப்புகளைக் காட்டிலும் துல்லியமான விவரங்களை அளித்தது. அவர் வரைந்த நிலா வரைபடங்கள் இங்கே தரப்பட்டுள்ளன.

 

வெறும் கண்ணால் பார்க்கும் போது நிலா கிரே மற்றும் வெள்ளை நிறம் கலந்த பந்து போல காட்சியளிக்கும்.

 

கலிலியோவின் நிலா வரைபடம் (1610)

 

galileo moon art

 

கலிலியோ தனது மிகச் சிறிய டெலஸ்கோப்புகளின் உதவியால் நிலாவை வரைந்தார். நிலவின் கரிய மற்றும் வெளிச்சம் மிகுந்த மேற்பரப்புகளை அவர் வரைந்திருந்தார்.