Skip to main content

கப்பலில் வந்த ஆயிரம் டன் உர மூட்டை; காணாமல் போனது எப்படி? -ராஜ்குமார் பகிரும் சொல்ல மறந்த கதை: 18

Published on 06/12/2023 | Edited on 06/12/2023

 

 rajkumar-solla-marantha-kathai-18

 

கப்பலையும், கப்பலில் சட்ட ரீதியாக ஏற்றி வரும் சரக்குகளையும் இன்சூரன்ஸ் செய்வது பற்றி இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் நம்மிடையே விவரிக்கிறார்.

 

கப்பல் கட்டும் வரை ஒரு இன்சூரன்ஸ் இருக்கும், கப்பலை முழுவதுமாக கட்டி முடித்து அது கடலுக்குள் இறங்கிய பிறகு ஒரு இன்சூரன்ஸ் எடுத்தாக வேண்டும். அதற்கு பெயர் மரைன் ஹல் இன்சூரன்ஸ் ஆகும். கட்டுமரம், படகு போன்றவைகளுக்கும் இன்சூரன்ஸ் அளிக்கப்படும். இதில் சில தில்லுமுல்லு எல்லாம் நடக்கும். அதை விவரிக்கிறேன்.

 

தொழில் அதிபர் ஒருவர் வெளிநாட்டிலிருந்து உரம் கொண்டு வந்து தருவதாக அரசின் டெண்டரை எடுக்கிறார். கப்பலில் சரக்கை ஏற்றும் முன் கப்பலின் எடை பரிசோதிக்கப்படும், கப்பலில் சரக்கு ஏறிய பிறகு அது நீரில் மூழ்கும் அளவை வைத்து ஒரு எடை போடப்படும், அதை வைத்துதான் சரக்கிற்கு இன்சூரன்ஸ் தொகை நியமிக்கப்படும். சென்னை துறைமுகம் வந்த சரக்கு இங்குள்ள விவசாயிகளிடம் அரசு மானியத்திற்கு விற்க இருந்த ஆயிரம் டன் உரத்தின் மூட்டைகள் காணாமல் போய்விட்டது என்று இன்சூரன்ஸ் கேட்டு விண்ணப்பித்தார்.

 

இன்சூரன்ஸ் அதிகாரிகள் மாறுவேடமிட்டு துறைமுகத்திற்குள் வேலை தேடுவது போல் சென்று விசாரித்தால் நூற்றுக்கணக்கான லாரிகள் துறைமுகத்திலிருந்து வெளியேறுகிறது. என்ன ஏதுவென்று விசாரித்தால் அங்குள்ளவர்கள் “இதெல்லாம் பெரிய இடத்து சமாச்சாரம், கண்டுகொள்ளக்கூடாது” என்றிருக்கிறார்கள். பிறகு அங்குள்ள ரெஜிஸ்டரில் வெளியே சென்ற லாரிகளின் நம்பரை வைத்து தேடினால் அந்த தொழிலபதிபர் ஆயிரம் டன் உர மூட்டைகளை அரசின் உதவி இல்லாமல், தனியாக விவசாயிகளிடம் விற்பனை செய்து வந்தது தெரிய வந்தது.

 

இந்த உண்மையை கண்டறிய கடலூரில் பணிபுரிந்த கிரைம் இன்ஸ்பெக்டர் உதவினார். பிறகு, இந்த வழக்கு சிபிஐ-க்கு மாற்றப்பட்டது. இன்சூரன்சிற்காக இதுபோன்ற பெரிய அளவிலான கொள்ளை எல்லாம் நடக்கும். ஆனால், இன்சூரன்ஸ் அதிகாரிகளை அவ்வளவு சீக்கிரத்தில் ஏமாற்றி இன்சூரன்ஸ் தொகையை பெற்றுவிட முடியாது. 
 

 

 

Next Story

பாதுகாப்பு அதிகாரியின் மர்ம மரணம்; கழிவுநீர் பாதையில் ஆணுறைகள் - ராஜ்குமார் பகிரும் சொல்ல மறந்த கதை: 21

Published on 26/02/2024 | Edited on 26/02/2024
 rajkumar-solla-marantha-kathai-21

இன்சூரன்ஸ் பெறுவதற்காக நடத்தப்படும் பல்வேறு மோசடி, திருட்டு குறித்து தொடர்ச்சியாக இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் நம்மிடையே பகிர்ந்து வருகிறார். பாதுகாப்பு துறையைச் சேர்ந்த அதிகாரியின் வழக்கு பற்றி நம்மிடையே விவரிக்கிறார்.

பாதுகாப்பு துறையில் உயர்ந்த பதவியில் இருக்கும் அந்த அதிகாரி பணி மாற்றம் ஆகி சென்னைக்கு வருகிறார். நல்ல நேர்மையான அதிகாரி, வேலையில் அதிகமான பதக்கங்கள் பெற்று அமைதியான குடும்பமாக மனைவி மற்றும் பள்ளி சென்று கொண்டிருக்கும் ஒரு குழந்தையுடன் வாழ்ந்து வருகிறார். அவரது வேலை ரிஸ்க்கான வகையைச் சேர்ந்தது. அவருக்கு மருத்துவ இன்சூரன்ஸ் என்பது இந்திய அரசே பெற்றுத் தந்துவிடும். 

ஒருநாள் இரவு, காவல் கட்டுப்பாட்டு அறைக்கு அந்த அதிகாரி திடீரென்று மர்மமான முறையில் இறந்துவிட்டதாக அவர் மனைவியிடம் இருந்தே அழைப்பு வந்தது. அவரது துறை சார்ந்த காவலர்களும் வந்தனர். நாங்களும் சென்றோம். தடயவியல் நிபுணர்களும் வந்தனர். அவர்கள் வந்ததும் வழக்கம் போல முதல் கேள்வியாக, இன்சூரன்ஸ் இருக்கிறதா என்று கேட்டுக் கொண்டனர். அந்த இறந்த அதிகாரி எல்.ஐ.சி மற்றும் பொதுவான ஒரு இன்சூரன்ஸ் கம்பெனி என்று இரண்டு இன்சூரன்ஸ் எடுத்திருந்தார். மேற்கொண்டு தடயவியல் நிபுணர்கள் தங்கள் பணியை செய்யும்போது, ஒரு நிபுணர் அந்த சடலத்தின் வலது காலில் ஒரு மஞ்சள் நிறத்தில் ஏதோ ஒன்று படிந்திருந்ததை பார்த்துச் சொன்னார்.

பின்னர், இவருக்கு யாரோ இந்த விபரீத கெமிக்கலை அறியாமல் கொடுத்து, மாரடைப்பு வரவைத்திருக்க வேண்டும் என்று சொன்னவுடன், அந்த இடத்தின் சூழலே பரபரப்பாக மாறுகிறது. இயற்கை மரணம் அல்லாது கொலை என்று கேஸ் ஆகிறது. ஒரு பிரபலமான தேர்ந்த வட மாநில அசிஸ்டண்ட் கமிஷ்னர் வருகிறார். இவர் குடும்பத்திடம் தகவல்களை வாங்கி விசாரணை நடைபெறுகிறது. மோப்ப நாய் கொண்டு அந்த பழைய பங்களாவை நோட்டம் விடப்பட்டது. அந்த நாயும் விசித்திரமாக ஒரு மர்ம நபரைக் கண்டு குரைத்துவிட்டு நேராகப் படி ஏறி கழிவு நீர் செல்லும் பாதையிடம் வந்து நின்று குரைத்தது. பாரென்சிக் துறையும், ஆராய்ந்ததில் அந்த கழிவு நீர் செல்லும் பாதையை அடைத்து நிறைய ஆணுறைகள் கிடைத்தன. ஆதாரங்களை எடுத்துக் கொண்டனர்.

அடுத்தகட்டமாக மூன்று நாள் கழித்து அதிகாரியின் விந்துகளும், ஆதாரத்தில் கிடைத்த விந்துகளும் பொருந்தவில்லை என்று பாரென்சிக் துறை தகவலை கொடுத்தது. உடனடியாக சந்தேகத்திற்கு உரிய மரணமாக மாற்றப்பட்டு, விசாரணையை ஆரம்பித்தோம். அக்கம்பக்கத்தில் விசாரித்தோம். அவர்கள் கூறியதை வைத்து அந்த அதிகாரியின் துறையில் இருக்கும் ஒரு குறிப்பிட்ட நபரின் மேல் சந்தேகம் வந்தது. உரிய முறைகளில் அவரது கால்ஸ், டவர் லொகேஷன் வைத்தும், அந்த நபருக்கும் குடும்பம் ஒன்று இருக்க, அவர்களை கூப்பிட்டு விசாரித்ததும், அவரும் உண்மையை ஒத்துக்கொண்டார். அதாவது அவருக்கும் அந்த அதிகாரியின் மனைவிக்கும் தொடர்பு இருந்திருக்கிறது. அதன் விளைவாக எதிர்பாராமல் இந்த அதிகாரியை கொலை செய்யும்  அளவுக்கு சென்றிருக்கிறது. இருவரையும் கைது செய்து அவர் மனைவியிடம் விசாரித்ததில் அவரிடம் பதிலன்றி மௌனமான திகைப்பு மட்டுமே கிடைத்தது.

பாலிசிக்கு உண்டான பணத்திற்கு, அவரது பெற்றோர் ஒரு கேஸ் போட்டார்கள். அவரது சட்ட வாரிசுக்கே அந்த பணத்தை கொடுக்குமாறு எங்களுக்கு உத்தரவு வந்ததின் பேரில், அப்படியே அதை செய்தோம். எனக்கு மிகவும் பாதித்த விஷயம் என்னவென்றால், ஒரு பாதுகாப்பு துறைக்கே பாதுகாப்பு இல்லை என்பதுதான். இந்த வழக்கிற்கு பின்னர் இந்த சம்பவத்தை எங்கள் நிறுவனத்தில் ஒரு கேஸ் ஸ்டெடியாகவே வைத்திருக்கிறோம்.

Next Story

நகைகளை வைத்து நூதன கொள்ளை; ஏமாந்த வங்கிகள் - ராஜ்குமார் பகிரும் சொல்ல மறந்த கதை: 20

Published on 29/01/2024 | Edited on 29/01/2024
 rajkumar-solla-marantha-kathai-20

இன்சூரன்ஸ் பெறுவதற்காக நடத்தப்படும் பல்வேறு மோசடி, திருட்டு குறித்து நம்மிடையே தொடர்ச்சியாக இன்சூரன்ஸ் நிறுவனத்தில் நீண்டகாலம் பணிபுரிந்த ராஜ்குமார் பகிர்ந்து வருகிறார். அந்த வகையில் ஆந்திராவைச் சேர்ந்த பல குடும்பங்கள் வங்கிகளை ஏமாற்றியது குறித்து விவரிக்கிறார்.

இந்திய ரிசர்வ் வங்கியின் வழிகாட்டுதலின்படி தனிநபருக்கு நகைக்கடன் வழங்குவது இங்கே வழக்கமாக இருந்து வருவது. வங்கிக்குச் சென்றால் உங்களது நகைகளை பரிசோதிக்க ஆள் இருப்பார்கள். நகைகளைப் பொறுத்தும், வங்கி கணக்கை நிர்வகிக்கும் முறையை வைத்தும் தொகை நிர்ணயிக்கப்படும்.

சென்னையில் ஈஞ்சம்பாக்கம் பகுதியில் உள்ள ஒரு வங்கிக்கு ஒரு குடும்பம் நகை அடகு வைக்க வருகிறது. நகை பரிசோதிப்பவரும் வாங்கி பரிசோதித்து முகவரியை உறுதி செய்து கடன் வழங்குகிறார். அதே போல 30-க்கும் மேற்பட்ட குடும்பங்கள் நகை அடகு வைத்து வருகிறார்கள். வட்டியும் மாதம் தவறாது கட்டுகிறார்கள்.

ஆறு மாதம் முடிந்து வட்டி கட்டுவது நின்று போகிறது. ஈஞ்சம்பாக்கம் பகுதிகளில் அதிகப்படியான சிறிய அளவிலான தொழில்கள் நடைபெறும். தொழில் முடக்கத்தால் கட்டமுடியாம போய் விட்டதோ என்று நேரே சென்று விசாரிக்கிறார்கள். எங்களால் அந்த நகைக்கு வட்டியும் கட்ட முடியவில்லை, முதலும் செலுத்த முடியவில்லை. நீங்கள் அந்த நகையை ஏலத்திற்கு விட்டு பணத்தை எடுத்துக்கொள்ளுங்கள் என்றிருக்கிறார்கள்.

வங்கி நிர்வாகத்திற்கோ இவ்வளவு நகைகளையும் வங்கிக்காக விற்றுக்கொடுத்தால் நன்றாகத்தான் இருக்கும் என்று அதற்கான வேலைகளில் ஈடுபடுகிறார்கள். ஏலம் அறிவிப்பினை பார்த்து நகைகளை வைத்து தொழில் செய்பவர்கள் வந்து நகைகளை பரிசோதித்து வாங்கும் போது அனைத்து நகைகளுமே போலியான நகைகள் என்பது தெரியவருகிறது.

நகையை அடகு வைத்த குடும்பத்தை விசாரித்தால் நாங்கள் ஆறு மாதத்திற்கு முன்பு நல்ல நகையைத்தானே கொடுத்தோம். இப்போது வந்து தங்க நகை இல்லை என்றால் நாங்கள் எப்படி பொறுப்பு ஏற்பது என்கிறார்கள். அதே சமயத்தில் அந்த குடும்பத்தில் ஒருவனை விசாரிக்கும் விதத்தில் விசாரித்த போது நாங்கள் இதை ஆந்திரா மாநிலத்து பக்கத்திலிருந்து குடிசை தொழிலாகவே செய்கிறோம் என்பதை சொல்கிறார்கள். அதாவது வெவ்வேறு வகை உலோகங்களால் தயாரிக்கப்பட்ட ஆபரணத்தில்  தங்கமுலாம் பூசி அதைத் தஙகம் போல மாற்றி பல மாநிலங்களில் இதை போல நகைக்கடன் வாங்கி நூதன மோசடியில் ஈடுபட்டுள்ளது தெரிய வந்தது.

இதையே தான் இந்த வங்கியிலும் செய்திருக்கிறார்கள். இதில் சம்பந்தப்பட்டவர்களை பண மோசடி வழக்கில் கைது செய்து சிறையில் அடைத்தார்கள். பல்வேறு வகையான மோசடிகளுக்கு மத்தியில் இப்படியுமான மோசடிகளும் கொள்ளைகளும் நடந்து கொண்டு தான் இருக்கிறது.