Skip to main content

பூ என்பதும் சொல்தான், கு என்பதும் சொல்தான் - அவற்றுக்கு என்னென்ன பொருள்கள் தெரியுமா...? கவிஞர் மகுடேசுவரன் எழுதும் சொல்லேர் உழவு - பகுதி 26

Published on 24/11/2018 | Edited on 24/11/2018

தமிழில் ஓர் எழுத்தே ஒரு சொல்லாக வருவதைப் பார்க்கலாம். ஓர் எழுத்தே ஒரு சொல்லாகவும் பயிலுமானல் அதனை “ஓரெழுத்து ஒருமொழி” என்று வழங்குகிறார்கள். இவ்வாறு இலக்கணத்தில் வழங்கப்படும் பெயர்களுக்கு அப்பெயர்களிலேயே விளக்கம் பொதிந்திருப்பதை உணரலாம். ஓர் எழுத்தே ஒரு மொழியாக, சொல்லாகப் பயில்கிறது என்னும் பொருளில் அமைந்ததுதான் “ஓரெழுத்து ஒருமொழி”. 

 

 

ss

 

 

எடுத்துக்காட்டாக, பூ என்னும் எழுத்தை எடுத்துக்கொள்வோம். பூ என்பது உயிர்மெய் வரிசையில் நெடில் எழுத்து. அது செடிகொடிமரங்களின் உறுப்புகளில் ஒன்றாகிய மலர்களைக் குறிப்பிடும் பொருளில் வருகிறது. பூ என்பதற்கு பூப்பாயாக என்னும் வினைச்சொல்லாக ஏவல் பொருளும் உண்டு. அதனால்தான் “பூத்தது, பூக்கிறது, பூத்தாள்” என்று வினைமுற்றாக்குகிறோம்.

 

 

பூ என்கின்ற ஓரெழுத்தால் ஆன சொல்லுக்கு என்னென்ன பொருள்கள் உள்ளன என்பதை அறிந்தால் வியப்படைவீர்கள். 

 

பூ என்பது கொடிப்பூ, கோட்டுப்பூ, நீர்ப்பூ, புதற்பூ என்னும் நால்வகைப் பூக்களுக்கும் பெயராகும் என்கிறது அகராதி. கொடிகளில் பூப்பது கொடிப்பூ என்று தெரிகிறது. முல்லைப்பூ, பூசணிப்பூ போன்றவை கொடிகளில் பூக்கின்றன.  கோட்டுப்பூ என்பது என்ன ? மரங்களில் பூக்கும் பூக்களைக் குறிப்பதுதான் கோட்டுப்பூ என்னும் தொடர். பூவரசம்பூ, வேப்பம்பூ, மாம்பூ போன்றவை மரங்களில் பூக்கின்றன. தாமரையும் அல்லியும் நீர்ப்பூக்கள். புதற்பூ என்பது என்ன ? புதல் என்பது நிலத்தைக் குறிக்கும். நிலப்பூக்கள். செடிகளும் புதர்களும் நிலத்தையொட்டி இருப்பவை. அவற்றில் பூப்பவை புதற்பூக்கள். 

 

 

s

 

 

பூ என்பதற்கு அழகு, மென்மை, பொலிவு போன்ற பொருள்களும் இருக்கின்றன. பூக்களின் இயல்புகள் அவை என்பதால் அப்பொருள்களிலும் பூ என்னும் சொல் ஆளப்படும். சேவலின் கொண்டையையும் பூ என்று சொல்கிறோம். கொண்டைப்பூ. பூமியைக் குறிக்கும் தனித்தமிழ்ச் சொல் பூ என்பது. பூவுலகு என்பதில் உள்ள பூ பூமியைக் குறிப்பதுதான். பூதலம் என்பதும் புவிதான். 

 

 

இருப்பதிலேயே நுண்மையான துகள் பூக்களிலுள்ள மகரந்தத் துகள்தானே ? அதனால் மிகவும் நுண்ணிய துகள்களையும் பூ என்றிருக்கிறார்கள். கண்ணில் வெண்பொட்டு விழுந்துவிட்டால் “கண்ணுல பூ விழுந்துடுச்சு” என்கிறோம். பூ என்பது இங்கே கண் நோயைக் குறிக்கிறது. யானைக்கு நெற்றிப்பட்டம் கட்டுவதையும் பூ என்கிறார்கள். ஒரு போக விளைச்சலும் பூ எனப்பட்டது. 

 

 

தீப்பொறி பறப்பதையும் மங்கலமாகக் கூறும்பொருட்டு “பூ” என்றிருக்கிறார்கள். தீயைப் பூ என்று சொல்லும் வழக்கு இன்றும் இருக்கிறது. அதனால்தான் திருவிழாவில் அமைக்கப்படும் தீக்குழிகளைப் “பூக்குழி” என்று வழங்குகிறோம். தீயில் இறங்குவதைப் பூமிதித்தல் என்பார்கள். தீச்சட்டியைப் பூச்சட்டி என்பார்கள். 

 

 

அகராதியில் பூ என்ற ஒற்றைச் சொல்லுக்கு இருபத்தெட்டுப் பொருள்கள் கூறப்பட்டிருக்கின்றன. அது மட்டுமின்றிப் பூ என்ற சொல் எச்சொல்லோடு முன்னே ஒட்டுகிறதோ அதன்வழியே நூற்றுக்கணக்கான சொற்கள் தோன்றியிருக்கின்றன.

 

 

ஒற்றை எழுத்தினால் அமைந்த சொல்லுக்கு இத்தனை பொருள்கள் வழங்கப்படும் எனில் அவ்வெழுத்து முன்னும் பின்னும் ஒட்டி எத்தனை சொற்கள் தோன்றக்கூடும் என்று எண்ணிப் பாருங்கள். பூக்காரன், பூக்குடலை, பூக்கூடம், பூங்கா, பூங்காவனம், பூங்காடு, பூங்கதிர், பூச்செண்டு, பூச்சூட்டு, பூஞ்சிட்டு, பூஞ்சிறகு, பூஞ்சோலை, பூந்தாது, பூந்தேன், பூநாகம், பூம்பிஞ்சு, பூமழை, பூமாரி, பூவரசு என்று நாம் கேள்வியுற்ற சொற்களே கைக்கடங்காத எண்ணிக்கையில் இருக்கின்றன.

 

 

தமிழிலுள்ள ஓரெழுத்து ஒருமொழிகள் அனைத்தும் அத்துணைச் சிறப்பு மிக்கவை. ஒற்றை எழுத்தினைக்கொண்டு பற்பல பொருள்களில் பயிலும்படி கைக்கொள்ளாத சொற்களாக்கி வைத்திருக்கிறோம். ஒரு சொல்லுக்கு முதலெழுத்தாக வரத்தக்க எல்லா எழுத்துகளும் நம் மொழியில் ஓரெழுத்து ஒருமொழியாகப் பயின்றிருக்கும் என்று நான் உறுதியாக நம்புகிறேன். 

 

 

ss

 

 

எடுத்துக்காட்டாக, கு என்னும் உகர உயிர்மெய்க்குறில் எழுத்தும்கூட ஓரெழுத்து ஒருமொழியாகப் பயின்றிருக்கிறது. கு என்றாலும் பூமிதான். கு என்னும் அச்சொல்லுக்கு இகழ்ச்சி, இன்மை, நீக்கம், நிறம், சிறுமை, தடை போன்ற பல பொருள்கள் காணப்படுகின்றன. இவ்வடிப்படையில் ஒவ்வோர் எழுத்திற்கும் வழங்கத்தக்க பொருள்களைத் தேடி ஆராய்ந்தால் விடுபட்ட பல சொற்களைக் கண்டுபிடித்துவிட முடியும்.  
 


முந்தைய பகுதி: 

சண்டமாருதம் என்றால் என்ன??? சரிகமபதநி-யின் தமிழ் பொருள் இதுதான்... கவிஞர் மகுடேசுவரன் எழுதும் சொல்லேர் உழவு - பகுதி 25

 

 

Next Story

நீதிபதி மகாதேவனுக்கு அன்புமணி ராமதாஸ் வாழ்த்து!

Published on 11/07/2024 | Edited on 11/07/2024
Anbumani Ramadoss wishes to Justice Mahadevan!

உச்ச நீதிமன்றத்தில் நீதிபதி பணியிடங்களில் காலியாக உள்ள 2 இடங்களுக்கு நீதிபதிகளை நியமிக்க கொலீஜியம் அமைப்பு பரிந்துரை செய்துள்ளது. அதன்படி சென்னை உயர் நீதிமன்ற பொறுப்பு தலைமை நீதிபதியாக பதவி வகித்து வரும் மகாதேவனை உச்ச நீதிமன்ற நீதிபதியாக நியமிக்க கொலீஜியம் பரிந்துரை செய்துள்ளது. அதே போன்று ஜம்மு - காஷ்மீர் நீதிமன்றத்தின் தலைமை நீதிபதியாக பணியாற்றி வரும் கோட்டீஸ்வர் சிங்கை உச்சநீதிமன்ற நீதிபதியாக நியமிக்கவும் கொலிஜியம் பரிந்துரை செய்துள்ளது. இந்த நியமனத்தின் மூலம் நீதிபதி கோட்டீஸ்வர் சிங் மணிப்பூர் மாநிலத்தில் இருந்து உச்ச நீதிமன்ற நீதிபதியாக நியமிக்கப்படும் முதல் நீதிபதி ஆவார் என்பதும் குறிப்பிடத்தக்கது.

இந்நிலையில் உச்சநீதிமன்ற நீதிபதியாக பரிந்துரைக்கப்பட்டுள்ள நீதிபதி மகாதேவனுக்கு பாமக தலைவர் அன்புமணி ராமதாஸ் தனது வாழ்த்துகளை தெரிவித்துள்ளார். இது தொடர்பாக அவர் தனது எக்ஸ் தளத்தில் வெளியிட்டுள்ள பதிவில், “சென்னை உயர்நீதிமன்றத்தின் பொறுப்பு தலைமை நீதிபதியாக பதவி வகித்து வரும் அரங்க. மகாதேவன் உச்சநீதிமன்றத்தின் நீதிபதியாக நியமிக்க உச்சநீதிமன்ற கொலீஜியம் பரிந்துரைத்திருப்பது மகிழ்ச்சியளிக்கிறது. அவருக்கு எனது வாழ்த்துகளைத் தெரிவித்துக் கொள்கிறேன். 

Anbumani Ramadoss wishes to Justice Mahadevan!

சென்னை உயர்நீதிமன்றத்தின் நீதிபதியாக கடந்த 2013ஆம் ஆண்டு நியமிக்கப்பட்ட மகாதேவன் அவர்கள் கடந்த 11 ஆண்டுகளில் சிறப்பான பல தீர்ப்புகளை வழங்கியுள்ளார். தமிழ் மொழி மீது மிகுந்த பற்றும், தமிழ் மொழியில் புலமையும் கொண்ட மகாதேவன், தமிழ் மொழி வளர்ச்சிக்காகவும் பல தீர்ப்புகளை வழங்கியுள்ளார். உச்சநீதிமன்றத்தில் 4 ஆண்டுகள் பணியில் இருக்கப் போகும் நீதிபதி மகாதேவன், சமூகநீதி, மொழி சார்ந்த சிறப்பான தீர்ப்புகளை வழங்கி நீதித்துறை வரலாற்றில் நீங்காத இடம் பிடிக்க வேண்டும் என்று வாழ்த்துகிறேன்” எனக் குறிப்பிட்டுள்ளார். 

Next Story

நக்கீரன் இணைய செய்தி எதிரொலி; மாற்றுத்திறனாளி ஆசிரியர் நெகிழ்ச்சி!

Published on 08/07/2024 | Edited on 08/07/2024
Nakiran Internet News Echo; Disabled teacher flexibility

தான் பார்வை மாற்றுத்திறனாளியாக இருப்பதால் நல்ல நூல்களைப் படிக்க ஆசைப்பட்ட போதெல்லாம் படிக்க முடியாமல் போனது. ஆனால் அந்த நூல்களைப் படித்தறிய வேண்டும் என்ற வேட்கை மட்டும் குறையவில்லை. பின் நாட்களில் அச்சு நூலை மின்னூலாக மாற்றும் தொழில்நுட்பம் வந்தவுடன் தான் படிக்கும் காலங்களில் படிக்க முடியாமல் விட்ட அத்தனை நூல்களையும் படித்து மகிழ்ந்த சிலட்டூர் அரசுப் பள்ளி தமிழாசிரியர் பொன்.சக்திவேல். தான் படித்தால் மட்டும் போதாது என்றெண்ணி அச்சு புத்தகங்களை மின்னூலாக மாற்றி பார்வை மாற்றுத்திறனாளிகளுக்கும் கொடுத்து வருகிறார். வாசிக்கத் துடித்த அத்தனை பேரையும் வாசிக்க வைத்துக் கொண்டிருக்கிறார்.

இதுவரை கலைஞரின் நெஞ்சுக்கு நீதி உள்பட சுமார் 1000 புத்தகங்களை சுமார் 10 லட்சம் பக்கங்களை மின்னூலாக்கி நண்பர்களுக்கும் கொடுத்திருக்கிறார் என்ற அவரது முகநூல் பதிவைப் பார்த்துத் தொடர்ந்து அவரிடமும் சில தகவல்களைப் பெற்று நக்கீரன் இணையத்தில் விரிவான கட்டுரை வெளியிட்டிருந்தோம். இந்த கட்டுரை தமிழ்நாடு அரசு தமிழ்வளர்ச்சித்துறை அமைச்சகம் வரை சென்று நெகிழ வைத்துள்ளது. மேலும் அவரை பாராட்டவும் செய்துள்ளது. 

Nakiran Internet News Echo; Disabled teacher flexibility

இது பற்றி பொன்.சக்திவேல் தனது முகநூல் பக்கத்தில் நெகிழ்ச்சியான பதிவு இதோ, “தமிழ் வளர்ச்சித் துறை அமைச்சர், பார்வையற்றோருக்கு மின்னூலாக மாற்றித்தரும் எனது பணி பற்றிய செய்தியைப் படித்திருக்கிறார். அவரது அறிவுறுத்தலின்படி, புதுக்கோட்டை மாவட்ட தமிழ் வளர்ச்சித் துறை உதவி இயக்குநர் என் பள்ளிக்கே வந்து என்னைக் கௌரவித்தார். தமிழ் வளர்ச்சித் துறை இயக்குநர் காணொளி அழைப்பின் வாயிலாக எனக்கு வாழ்த்துக்களைத் தெரிவித்தார்.

வாசித்துக் காட்ட ஆள் இல்லாமல் கல்லூரி காலங்களில் நான் சிரமப்பட்டுக் கொண்டிருந்த பொழுது, வளர்ந்து வந்த தமிழ் ஓ.சி.ஆர்  தொழில்நுட்பம், ஜே.ஆர்.எஃப் தொகையில் வாங்கிய உயர் ரக ஸ்கேனரும் மின்னூலாக்கத்திற்கு உதவி செய்தன. அது என் வாசிப்பிற்கான பாதையைத் திறந்தது. என்னைப்போலவே, அச்சு நூல்களைப் படிக்கச் சிரமப்படும் பார்வை மாற்றுத் திறனாளிகள் அச்சுனூலை வாங்கி அனுப்பி வைத்தால் மின்னூலாக மாற்றித் தருகிறேன் என்று அறிவித்த பொழுது, பல பார்வை மாற்றுத்திறனாளிகளும் பயன்பெறும் வாசிப்பு நெடுஞ்சாலையாக அது விரிந்தது. வாசிப்பது எனக்கு மிகவும் பிடித்த செயல் என்பதால் மிகுந்த மகிழ்ச்சியோடு இப்பணியை செய்து வந்தேன். அறிவார்ந்த நண்பர்கள் அரிய நூல்களின் அறிமுகம் என இதன் வாயிலாக நான் பெற்ற பயன்கள் ஏராளம். அதைத் தாண்டி அங்கீகாரத்தை பற்றியெல்லாம் ஒருபோதும் நினைத்துக்கூடப் பார்த்ததில்லை. 

Nakiran Internet News Echo; Disabled teacher flexibility

எனது முகநூல் பதிவொன்றைப் பார்த்துவிட்டு புதுக்கோட்டை நிருபர்களான பகத்சிங், சுரேஷ் அதனைச் செய்தியாக வெளியிட எனது மின்னூல் உருவாக்கம் தொடர்பான விவரங்கள் குறித்துக் கேட்டனர். விவரங்களைச் சொல்லும்போது இந்தச் செய்தி பத்தோடு பதினொன்றாகக் கடந்து சென்றுவிடும் என்றுதான் மனதிற்குள் நினைத்தேன். செய்தி வெளியான பிறகு, அதனைப் பார்த்துவிட்டு தமிழகத்தின் பல பகுதிகளிலிருந்து வாட்ஸ் ஆப்பில் தொடர்பு கொண்டு வாழ்த்தினர். பத்திற்கும் மேற்பட்டோர் எனது என்னைக் கண்டறிந்து தொலைப்பேசியிலும் நேரடியாக அழைத்து வாழ்த்து தெரிவித்திருந்தனர். அனைத்திற்கும் உச்சமாக இது அரசின் கவனத்தையும் எட்டி இருக்கிறது. இவற்றையெல்லாம் எண்ணி இத்தருணத்தில் மகிழ்ந்தும் நெகிழ்ந்தும் போயிருக்கிறேன் நண்பர்களே.

கொஞ்சக் காலமாகவே முகநூலைக் கரித்துக்கொட்டிக்கொண்டிருந்தாலும் இத்தகைய நிகழ்வுகள் நடக்கக் காரணமான முகநூலுக்கு இன்று நன்றியைக் கூறிக்கொள்ளக் கடமைப்பட்டிருக்கிறேன்” எனக் குறிப்பிட்டுள்ளார். புதுக்கோட்டை மாவட்டம் கத்தக்குறிச்சி உலக சாதனையாளர்களை உருவாக்கும் சின்னக் கிராமம் என்பதைத் தொடர்ந்து உறுதிப்படுத்தி வருகிறது. முதலில் தடகள வீராங்கனை சாந்தி, அடுத்து பொன்.சக்திவேல் ஆசிரியர், அடுத்து இன்னும் பலரை உருவாக்கும் என்ற நம்பிக்கை உள்ளது.