Skip to main content

‘ஆச்சி’க்கு இத்தனை அர்த்தமா??? கவிஞர் மகுடேசுவரன் எழுதும் சொல்லேர் உழவு - பகுதி 24

Published on 01/11/2018 | Edited on 17/11/2018
soller ulavu


எந்தச் சொல்லாயினும் அச்சொல்லானது ஏதேனும் ஒரு பொருளைக் குறித்தே தோன்றுகிறது. சொல் என்பது பொருளுணர்த்துவது. பொருளுணர்த்தாத எவ்வொன்றும் சொல்லாகாது. இதனை இத்தொடரின் தொடக்கத்திலேயே கூறியிருக்கிறேன். ஒரு சொல்லுக்கு ஒரு பொருளுண்டு என்பது திண்ணம். அச்சொல் ஒற்றைப்பொருளோடு நின்றுவிடுவதுமில்லை. தொடர்ந்து வெவ்வேறிடங்களில் பொருளுணர்த்தும் உயிர்ப்போடு விளங்குகிறது.
 

ஒரு சொல்லுக்கு ஒரேயொரு பொருள் மட்டுமே உள்ளதா ? அல்லது ஒன்றுக்கும் மேற்பட்ட பொருள்கள் வழங்கப்படுமா ? ஒரு சொல்லுக்கு ஒரு பொருளேனும் உண்டு. அதற்கு மேலும் பல பொருள்கள் வழங்கப்படுவதும் உண்டு.  
 

ஒரு சொல்லானது ஓரிடத்தில் தோன்றி அவ்வோரிடத்திலேயே வழங்கப்படுவதைல்லையே. எவ்வொரு சொல்லும் தான் தோன்றிய இடத்திலிருந்து பரவி பன்னிலங்களில் வழங்கப்படுவது. அதன் தோற்றுவாயே கூட பற்குழுக்களிடையே வெவ்வேறு பொருள்களோடு தோன்றியதாய் இருக்கக்கூடும். இவ்வேறுபாட்டினை மக்களின் பேச்சுத் தமிழிலேயே நாம் உணரலாம்.
 

தமிழகத்தின் தென்புலத்தில் ‘ஆச்சி’ என்னும் சொல் பழுத்த மூதாட்டியைக் குறிக்கிறது. மேற்கு மாவட்டங்களில் அச்சொல் ‘ஆயிற்று’ என்ற வினைப்பொருளின் கொச்சையாக வழங்கப்படுகிறது. நெல்லையில் “என்ன ஆச்சி ?” என்றால் “என்ன அம்மையே ?” என்பது பொருள். கோவையில் “என்ன ஆச்சி ?” என்றால் “என்ன ஆயிற்று?” என்பது பொருள். ஒரே சொல்தான். அதற்கு ஒவ்வோரிடத்திலும் ஒவ்வொரு மக்கள் திரளிடையேயும் ஒவ்வொரு பொருள் வழங்கப்படும் என்பது நாம் விளங்கிக்கொள்ளக் கூடியதே.
 

மொழியறிவும் புலமையும் மேம்படுகையில் ஒரு சொல்லுக்கு வழங்கப்பட்ட எல்லாப் பொருள்களும் தொகுக்கப்பட்டன. மொழிப்புலவர்களின் வேலையே இதுதான். எளியவர்களுக்கு ஒரு சொல்லின் ஒரு பொருள்தான் தெரிந்திருக்கும். மொழியின் ஆழங்கால் பட்டவர்க்கே ஒரு சொல்லுக்கு வழங்கப்படும் பற்பல பொருள்களும் தெரிந்திருக்கும்.
 

ஊசி என்ற சொல்லை எடுத்துக்கொள்வோம். ஊசி என்ற சொல்லைக் கேள்வியுற்றவுடன் நமக்குத் தோன்றும் பொருள் என்ன? துணிப்பிரிவுகளை நூல்கொண்டு தைத்து இணைக்கும் கூர்மையானதும் மெலிதானதுமான குத்து பொருள். ஊசி என்ற சொல்லுக்கு வழங்கப்படும் இப்பொருளை நாம் அனைவரும் அறிந்திருக்கிறோம். ஊசி என்பதற்கு அஃதொன்றே பொருளா ?
 

அக்காலத்தில் ஊசியின் முதன்மைப் பணிகளில் ஒன்று ஓலைச்சுவடிகளில் எழுதுவது. எழுத்தாணியை ஊசி என்று வழங்கியிருக்கின்றனர். காலில் முள் தைத்தால் அதனைக் கிழித்து அகற்றுவதற்கும் ஊசி பயன்பட்டிருக்கிறது. கிழிபட்ட துணியைத் தைப்பதற்குப் பயன்பட்ட அதே ஊசிதான் முள்ளேறிய கால் பகுதியின் மேல் தோலைக் கிழிப்பதற்கும் பயன்பட்டிருக்கிறது. இப்படி அப்பொருளின் பயன்பாடு அதன் தோற்ற நோக்கத்தைத் தாண்டி விரிவடைகிறது. தராசு எனப்படும் எடைக்கோலின் நடுமுள் நேராக நிற்றல் வேண்டும். அம்முள்ளையும் ஊசி என்றே வழங்கியிருக்கின்றனர்.
 

ஊசி என்பது சின்னஞ்சிறு பொருள் ஆயிற்றே. சின்னஞ்சிறு பொருளாயினும் அதன் செயலில் வன்மையுடையது. அத்தன்மையைக் கொண்டு அத்தன்மையுடைய வேறு பொருள்கள் சிலவற்றுக்கும் ஊசி என்ற முன்னொட்டைச் சேர்த்துக்கொண்டனர். எடுத்துக்காட்டாக, வயிற்றைக் குடையும் புழுவுக்கு ‘ஊசிப்புழு’ என்று பெயர். செடிகொடிகளில் சின்னஞ்சிறிதாய்க் காணப்படும் சல்லிவேர்கள்தாம் பாறையை முதலில் துளைத்துச் செல்பவை. அதனால் அவற்றை ஊசிவேர்கள் என்றார்கள். மல்லிகையில்கூட ஊசிபோல் மெலிதாயும் நீண்டுமுள்ளது ஊசிமல்லிகை எனப்பட்டது.
 

வடதிசைக்கும் ஊசி என்ற பெயர் வழங்கப்பட்டிருக்கிறது. வடதிசைக்கு அச்சொல் எப்படி ஏற்பட்டிருக்கக்கூடும் என்று எண்ணிப் பாருங்கள். காந்த ஊசி எப்போதும் வடதிசையைக் காட்டி நிற்கும். “ஊசி காட்டும் திசை வடக்கு” என்பதன் சுருக்கமாக அத்திசையைக் காட்டும் பொருளைக் கொண்டே திசைக்கும் பெயர் வைத்துவிட்டனர். ஒரு சொல் இப்படித்தான் அதன் வடிவத்தை, வன்மையை, தன்மையை, ஒன்றோடொன்று தொடர்புடைய இயல்பினைக்கொண்டு அடுத்தடுத்த பொருளழகினை ஏற்றுக்கொள்கிறது. “ஒரு சொல்லுக்கு இத்தனை பொருள்களா? இவற்றையெல்லாம் யார் நினைவிற்கொள்ள முடியும் ?” என்று நாம் தேவையின்றி அஞ்சுகிறோம். ஆனால், அப்பொருளின் ஏதோ ஓர் ஒற்றுமை அடுத்தடுத்த பொருளாட்சியை ஏற்று நகர்கிறது. இச்செயல் பன்னெடுங்காலமாக நடந்தது. இன்றைக்கு அவற்றைத் தொகுத்துப் பார்க்கும்போது நமக்கு வியப்பூட்டுகிறது.   
 

சிறிய கருவிதான். அதற்கு வழங்கப்படும் ஒற்றைப் பொருள், அதன் ஒவ்வோர் இயற்கையைக்கொண்டு ஒவ்வோரிடமாக நகர்ந்து செல்கிறது. ஒரு சொல்லுக்குப் பல பொருள்கள் தோன்றுவது இப்படித்தான்.


முந்தைய பகுதி:
 

“இதற்குப் பெண்பால் என்ன ?’ கவிஞர் மகுடேசுவரன் எழுதும் சொல்லேர் உழவு - பகுதி 23

 

அடுத்த பகுதி:

 

 சண்டமாருதம் என்றால் என்ன??? சரிகமபதநி-யின் தமிழ் பொருள் இதுதான்... கவிஞர் மகுடேசுவரன் எழுதும் சொல்லேர் உழவு - பகுதி 25

 

 

 

 

Next Story

சாகித்ய அகாடமி விருது; எழுத்தாளர்களுக்கு முதல்வர் மு.க. ஸ்டாலின் வாழ்த்து!

Published on 16/06/2024 | Edited on 16/06/2024
Sahitya Akademi Award; CM MK Stalin Greetings 

ஒவ்வொரு ஆண்டும் சாகித்ய பால புரஸ்கார் விருது மற்றும் சாகித்ய யுவ புராஸ்கார் விருது எனச் சிறந்த எழுத்தாளர்களுக்கு விருதுகள் வழங்கப்பட்டு வருகிறது. இந்த விருதுகள் இலக்கியத்துறையில் தேசிய அளவில் வழங்கப்படும் உயர்ந்த விருதுகளில் ஒன்றாகக் கருதப்படுகிறது. அதன்படி தமிழ், ஆங்கிலம், இந்தி, அசாமி, பெங்காலி, குஜராத்தி உள்ளிட்ட 23 இந்திய மொழிகளில் வெளிவந்த சிறந்த படைப்புகளுக்கு இந்த விருதுகள் வழங்கப்படுகின்றன.

இந்த ஆண்டுக்கான (2024) விருதுகள் தற்போது அறிவிக்கப்பட்டுள்ளன. அந்த வகையில் தமிழ் மொழியில் வெளியான படைப்புகளுக்கும் விருதுகள் அறிவிக்கப்பட்டுள்ளன. அந்த வகையில் பாரதி புத்தகாலயம் வெளியிட்ட ‘தன்வியின் பிறந்தநாள்’ என்ற சிறார் கதைக்காக எழுத்தாளர் யூமா வாசுகிக்கு பால புரஸ்கார் விருது அறிவிக்கப்பட்டுள்ளது. அதே போன்று சால்ட் பதிப்பகம் வெளியிட்ட ‘விஷ்ணு வந்தார்’ என்ற சிறுகதை தொகுப்பிற்காக லோகேஷ் ரகுராமனுக்கு யுவ புரஸ்கார் விருது அறிவிக்கப்பட்டுள்ளது. 

Sahitya Akademi Award; CM MK Stalin Greetings 

இந்நிலையில் இரு எழுத்தாளர்களுக்கும் பல்வேறு தலைவர்களும் தங்களது வாழ்த்துகளை தெரிவித்து வருகின்றனர். அந்த வகையில் தமிழக முதல்வர் மு.க. ஸ்டாலின் எக்ஸ் சமூக வலைத்தளத்தில் வெளியிட்டுள்ள பதிவில், “நாவல், கவிதை, சிறுகதை என அனைத்து வடிவங்களிலும் தமிழிலக்கியத்தில் தனி அடையாளத்துடன் பயணித்து வருபவர் யூமா வாசுகி. ஏற்கெனவே சிறந்த மொழிபெயர்ப்பிற்கான சாகித்ய அகாதமி விருது வென்றுள்ள அவர், தற்போது ‘தன்வியின் பிறந்தநாள்’ நூலுக்காக பால புரஸ்கார் விருதுக்கும் தேர்வாகியிருப்பது மகிழ்ச்சியளிக்கிறது. 

Sahitya Akademi Award; CM MK Stalin Greetings 

தமிழில் இன்னும் வளம்பெற வேண்டிய சிறார் இலக்கிய வகைமைக்கு அவர் ஆற்றிவரும் பாராட்டுக்குரிய பங்களிப்புக்கான உரிய அங்கீகாரம் இது! வாழ்த்துகள்!. காவிரிக்கரையில் இருந்து மற்றுமொரு இலக்கிய வரவாகத் தடம் பதித்து, ‘விஷ்ணு வந்தார்’ சிறுகதைத் தொகுப்பிற்காக யுவ புராஸ்கார்  விருதுக்குத் தேர்வாகியுள்ள நம்பிக்கைக்குரிய இளைஞர் லோகேஷ் ரகுராமன் அவர்களுக்கும் எனது பாராட்டுகள்!” எனக் குறிப்பிட்டுள்ளார். 

Sahitya Akademi Award; CM MK Stalin Greetings 

மேலும் மக்கள் நீதி மய்யம் கட்சியின் தலைவர் கமல்ஹாசன் எக்ஸ் மூக வலைத்தளத்தில் வெளியிட்டுள்ள பதிவில், “நீண்ட காலமாகத் தமிழ் நவீன இலக்கியத்தில் இயங்கிவருபவர் யூமா வாசுகி. அடிப்படையில் ஓவியராக இருந்து இவர் இயற்றிய கவிதைகளும், எழுதிய நாவல்களும் தமிழ்ப் பரப்பில் பரவலான வரவேற்பைப் பெற்றவை. மலையாளத்திலிருந்து சிறார் கதைகளை மொழிபெயர்த்துவந்த இவர், தனது நேரடி சிறுவர் கதைக்கொத்தான ‘தன்வியின் பிறந்தநாள்’ நூலுக்கு, சாகித்ய அகாடெமியின் பால புரஸ்கார் விருது பெற்றிருக்கிறார். இவருக்கும், ‘விஷ்ணு வந்தார்’ சிறுகதைத் தொகுப்பிற்காக சாகித்ய யுவ புரஸ்கார் விருது பெற்றிருக்கும் இளைஞர் லோகேஷ் ரகுராமனுக்கும் என் மனமார்ந்த வாழ்த்து” எனத் தெரிவித்துள்ளார். 

Next Story

மதுரையில் ‘தமிழ்க் கவிஞர் நாள்’ கொண்டாட்டம் - தமிழக அரசு தகவல்!

Published on 28/04/2024 | Edited on 28/04/2024
'Tamil Poet's Day' Celebration in Madurai - Tamil Nadu Government Information!

தமிழ் வளர்ச்சித் துறையின் சார்ப்பில் பாவேந்தர் பாரதிதாசனின் 133 ஆம் பிறந்தநாள் நிகழ்வு தமிழ்க் கவிஞர் நாளாக நாளை (29.04.2024) காலை 10.30 மணிக்கு மதுரை உலகத் தமிழ்ச் சங்கப் பெருந்திட்ட வளாக அரங்கில் நடைபெறவுள்ளது. இந்நிகழ்வு தமிழ்நாடு இயல், இசை, நாடகமன்றம் வழங்கும் கலை நிகழ்ச்சியோடு நிகழ்வு தொடங்குகிறது. தொடக்க விழாவில் தமிழ் வளர்ச்சித் துறை இயக்குநர் ஔவை அருள் நோக்கவுரை ஆற்றவுள்ளார். இந்நிகழ்விற்கு மதுரை மாவட்ட ஆட்சியர் மா.சௌ.சங்கீதா தலைமையுரை வழங்கவுள்ளார்.

பேராசிரியர் கு.ஞானசம்பந்தன் தலைமையில் 'பாரதிதாசன் படைப்புகளில் விஞ்சி நிற்பது தமிழ் உணர்வே! சமுதாய உயர்வே' என்ற தலைப்பில் பட்டிமன்றமும், புலவர் செந்தலை கவுதமன் தலைமையில் 'பாவேந்தர் கண்ட படைப்புக்களங்கள்' என்ற தலைப்பில் கருத்தரங்கமும் முனைவர் சந்திர புஸ்பம் இசையரங்கமும் கவிஞர் நெல்லை ஜெயந்தா  தலைமையில் 'பாவேந்தரின் பார்வைகள்' என்ற தலைப்பில் கவியரங்கமும் நடைபெறவுள்ளது. மதுரை குரு மருத்துவமனையின் மருத்துவர் ச.கு.பாலமுருகன் நிறைவுரை வழங்கவுள்ளார். இந்நிகழ்வில் தமிழறிஞர்களும் பேராசிரியர்களும் அரசுப்பணியாளர்களும் தமிழார்வலர்களும் கல்லூரி மாணவர்களும் கலந்து கொண்டு சிறப்பிக்கவுள்ளனர் என அரசு சார்பில் வெளியிடப்பட்டுள்ள செய்திக்குறிப்பில் தெரிவிக்கப்பட்டுள்ளது.

“தமிழுக்கும் அமுதென்று பேர், அந்தத் தமிழின்பத் தமிழெங்கள் உயிருக்கு நேர்” என்ற பாடல் வரிகளுக்கு சொந்தக்காரர் பாரதிதாசன். பெரும் புகழ் படைத்த பாவலரான பாரதிதாசன் புரட்சிக்கவி என்றும், பாவேந்தர் என்றும் அழைக்கப்பட்டார். தமிழ் இலக்கியம், தமிழ் இலக்கணம் மற்றும் சைவ சித்தாந்த வேதாந்தங்களை முறையாகக் கற்று, தமிழ் மொழிக்கு அருட்தொண்டாற்றியவர் ஆவார். தமிழாசிரியர், கவிஞர், திரைக் கதாசிரியர், எழுத்தாளர், கவிஞர், என்று பல்வேறு துறைகளில் தமிழ் மொழியின் இனிமையை மக்களிடம் எடுத்துச் சென்றவர் ஆவார்.