Skip to main content

“டைவர்ஸ் ஆனதாக நாடகம் போட்டு ஏமாத்தியிருக்காங்க” -  டிடெக்டிவ் யாஸ்மின் புலனாய்வு: 03

Published on 11/05/2023 | Edited on 11/05/2023

 

Lady Detective Yasmin  Case Explanation  3

 

பல்வேறு சவால்களைக் கடந்து வெற்றிகரமாக இயங்கி வரும் பெண் துப்பறிவாளர் யாஸ்மின் அவர்கள் தன்னுடைய அனுபவங்களை நம்மோடு பகிர்ந்து கொள்கிறார்.

 

மூன்று வருடங்களுக்கு முன் நடந்த கேஸ் இது. ஒரு பெண் தன்னுடைய கணவரின் மீது தனக்கு சந்தேகம் இருப்பதாக நம்மிடம் வந்தாள். தன்னுடைய மாமியாரைப் பார்த்துக் கொள்வதற்கு தன்னுடன் படித்த ஒரு பெண்ணையே காலை நேரத்துக்கு மட்டும் ஹோம் நர்ஸாக சேர்த்தாள். அதன் பிறகு தன்னுடைய கணவர் அந்தப் பெண்ணிடம் ஃபோனில் அதிக நேரம் பேசுவது தெரிந்தது. இது குறித்த உண்மையைக் கண்டறிந்து தரவேண்டி நம்மிடம் அந்தப் பெண் வந்தாள்.

 

ஒரு பத்து நாட்கள் அவரை ஃபாலோ செய்த பிறகு அவரிடம் தவறான நடவடிக்கைகள் இருப்பது போல் எங்களுக்குத் தோன்றவில்லை. தொடர்ந்து அவரைப் பின்தொடர்ந்த போது அவர் அடிக்கடி ஒரு வீட்டுக்கு செல்வது தெரிந்தது. அந்த வீட்டுக்கு இந்த நர்ஸ் பெண்ணும் வந்தாள். அப்போது தான் தெரிந்தது இன்னொரு பெண்ணை இவர் ஏற்கனவே திருமணம் செய்துகொண்டார் என்று. அவர்களுக்குத் திருமணமாகிப் பத்து ஆண்டுகள் ஆகியிருந்தன. நம்மிடம் கேஸ் கொடுத்த பெண்ணோடு அவருக்குத் திருமணமாகி 5 ஆண்டுகள் தான் ஆகியிருந்தன.

 

அவருக்கு ஏற்கனவே திருமணம் ஆனது அவருடைய இரண்டாவது மனைவிக்கும் தெரிந்திருந்தது. தற்போது விவாகரத்து வழக்கு நடந்து கொண்டிருப்பதாக அவர் நம்பிக் கொண்டிருந்தார். ஆனால் உண்மையில் அந்த விவாகரத்து வழக்கு என்பது ஒரு நாடகம். அவருடன் திருமணம் நடந்ததாக நம்பப்படும் அந்தப் பெண்ணிற்கு பத்து வருடங்களுக்கு முன்பு திருமணம் நடந்தது இன்னொருவருடன். ஆனால் இவர்கள் இருவரும் தங்களுக்குள் விவாகரத்து வழக்கு நடந்து வருவது போல் அனைவரையும் ஏமாற்றி வந்தனர். இதன் மூலம் அவர்களுடைய உறவு தொடர்ந்து வந்தது.

 

இப்படியெல்லாம் ஏமாற்ற முடியுமா என்று ஆச்சரியப்பட வைத்த வழக்கு இது. அந்த நர்ஸ் பெண்ணுக்கும் பணம் தேவைப்பட்டதால் இவருக்கு அவள் உதவிகள் செய்து வந்தாள். சில வழக்குகளில் பாதிக்கப்பட்டவர்கள் போலீஸ் விசாரணைக்குப் பிறகும் நம்மிடம் வருவார்கள். பழைய வழக்குகளை விசாரிக்கும்போது சம்பந்தப்பட்ட நபர்களோடு பழகியவர்களை முதலில் நாங்கள் கண்டுபிடிப்போம். அவர்களிடம் விசாரணை மேற்கொள்வோம். பெரும்பாலும் குடும்பப் பிரச்சனைகள் குறித்த வழக்குகள் தான் நம்மிடம் அதிகம் வரும். 

 

குற்றவாளிகளின் கண்களைப் பார்த்து அவர்கள் பேசுவது உண்மையா என்று கண்டறிவது எல்லாம் இன்று கடினமாகிவிட்டது. நம்முடைய அனுபவத்தின் மூலம் ஒருவர் பேசுவது உண்மையா இல்லையா என்பதை நம்மால் அறிய முடியும்.

 

 

 

Next Story

கள்ளச்சாராய வியாபாரி கொடுத்த வாக்குமூலம்; மீண்டும் தோண்டி எடுக்கப்பட்ட உடல்

Published on 23/06/2024 | Edited on 23/06/2024
Confession given by liquor dealer; The body was exhumed again


கள்ளக்குறிச்சி மாவட்டம் கருணாபுரத்தில் கள்ளச்சாராயம் குடித்து 4 பெண்கள் உட்பட 50க்கும் மேற்பட்டோர் உயிரிழந்த சம்பவம் நாட்டையே உலுக்கிக் கொண்டிருக்கிறது. சிகிச்சையில் இருப்பவர்களில் பலர் சிகிச்சை பலனின்றி உயிரிழந்து வருகின்றனர். இதனால் இறப்புகளின் எண்ணிக்கையும் தொடர்ந்து அதிகரித்து வருகிறது. அதே சமயம் கள்ளச்சாராயம் குடித்து பாதிக்கப்பட்டவர்களுக்கு கள்ளக்குறிச்சி, சேலம் மற்றும் விழுப்புரம் அரசு மருத்துவமனை, புதுச்சேரி ஜிப்மர் மருத்துவமனையில் தொடர்ந்து தீவிர சிகிச்சை அளிக்கப்பட்டு வருகிறது.

இந்தநிலையில் கள்ளக்குறிச்சி மாவட்டம் சின்னசேலம் பகுதியைச் சேர்ந்த ஜெயமுருகன் என்பவர் கடந்த 18 ஆம் தேதி அதே பகுதியைச் சேர்ந்த ராமர் என்பவர் விற்பனை செய்த சாராயத்தை வாங்கி குடித்துள்ளார். பின்னர் உடல்நலக்குறைவு ஏற்பட்டு மருத்துவமனைக்கு செல்லும் வழியிலேயே அவர் உயிரிழந்தார். இதனால் மீண்டும் உடலை வீட்டுக்கு எடுத்து வந்த ஜெயமுருகனின் உறவினர்கள் அவரது உடலை மறுநாள் அடக்கம் செய்தனர். ஆனால் ஜெயமுருகன் கள்ளச்சாராயம் குடித்து உயிரிழந்தது அவருடைய வீட்டாருக்கு தெரியவில்லை என்று கூறப்படுகிறது. இந்த நிலையில் கள்ளக்குறிச்சியில் கள்ளச்சாராயம் உயிரிழப்பு பரபரப்பை ஏற்படுத்தியது.

போலீசார் தொடர்ந்து கள்ளச்சாராய வியாபாரிகளை கைது செய்த நிலையில் ராமர் என்பவரையு விசாரித்த போது அதே ஊரில் உயிரிழந்த ஜெயராமன், ஜெயமுருகன் உட்பட பலர் தன்னிடம் சாராயம் வாங்கிக் குடித்ததாக வாக்குமூலத்தில் தெரிவித்தார். இதனையடுத்து ஜெயராமன், ஜெயமுருகன் ஆகியோர் வீட்டிற்குச் சென்ற போலீசார் இது குறித்து விசாரணை நடத்தினர். விசாரணையில் அவர்கள் கள்ளச்சாராயம் அருந்தியதால்தான் உயிரிழந்தார்களா என்பதை உறுதிசெய்ய உடல்கள் தோண்டி எடுக்க முடிவு செய்யப்பட்டது. அதன்படி இன்று மதியம் வருவாய் வட்டாட்சியர் கமலக்கண்ணன், காவல் ஆய்வாளர் கந்தகுமார் ஆகியோர் முன்னிலையில் தோண்டி எடுக்கப்பட்ட உடல் விழுப்புரம் முண்டியம்பாக்கம் அரசு மருத்துவக் கல்லூரி மருத்துவமனைக்கு பிரேதப் பரிசோதனைக்காக அனுப்பி வைக்கப்பட்டுள்ளது.

Next Story

போக்சோ வழக்கு; எடியூரப்பாவிடம் விசாரணை!

Published on 17/06/2024 | Edited on 17/06/2024
Former Karnataka CM BS Yediyurappa POCSO case

கர்நாடகா மாநிலத்தின் முன்னாள் முதல்வரும், பா.ஜ.க மூத்த தலைவருமான எடியூரப்பா 17 வயது சிறுமிக்கு பாலியல் தொல்லை கொடுத்ததாக குற்றச்சாட்டு எழுந்தது. இது தொடர்பாக இவர் மீது கடந்த மார்ச் 15 ஆம் தேதி பாதிக்கப்பட்ட சிறுமியின் தாயார் பெங்களூர் சதாசிவ நகர் காவல் நிலையத்தில் புகார் கொடுத்தார். இந்தப் புகாரின் அடிப்படையில், பெங்களூர் சதாசிவ நகர் காவல்நிலையத்தில், எடியூரப்பா மீது போக்சோ சட்டத்தின் கீழ் வழக்குப்பதிவு செய்யப்பட்டு விசாரணை நடைபெற்று வருகிறது.

அதே சமயம் நாடு முழுவதும் மக்களவைத் தேர்தல் நடைபெற இருந்த நிலையில் எடியூரப்பா மீது போக்சோ வழக்கு பதிவு செய்யப்பட்டிருந்தது அரசியல் வட்டாரத்தில் பெரும் பரபரப்பை ஏற்படுத்தியிருந்தது. இதற்கிடையே, எடியூரப்பா மீது போக்சோ வழக்கு தொடர்ந்த 17 வயது சிறுமியின் தாயாரான 54 வயது பெண் கடந்த மே மாதம் 26 ஆம் தேதி திடீரென்று நுரையீரல் புற்றுநோயால் உயிரிழந்தார். இது குறித்தும் சதாசிவ நகர் போலீசார் தொடர்ந்து விசாரணை நடத்தி வருகின்றனர். 

Former Karnataka CM BS Yediyurappa POCSO case

இந்த வழக்கில் விசாரணைக்கு ஆஜராகுமாறு எடியூரப்பாவுக்கு சிஐடி சம்மன் அனுப்பியிருந்த நிலையில், ஜூன் 17 ஆம் தேதி சிஐடி முன்பு விசாரணைக்கு ஆஜராவதாக எடியூரப்பா தரப்பில் தெரிவிக்கப்பட்டது. இதனைத் தொடர்ந்து, இது தொடர்பான வழக்கில் எடியூரப்பாவை கைது செய்ய சிஐடி வாரண்ட் பிறப்பித்தது. இதனையடுத்து சிஐடி விசாரிக்கப்பட்டு வரும் புகாரை ரத்து செய்யக் கோரி நீதிமன்றத்தில் மனு தாக்கல் செய்தார்.

அந்த மனுவை விசாரித்த நீதிமன்றம், ‘அவர் முன்னாள் மாநில முதல்வர். அவர் நாட்டை விட்டா ஓடிவிடுவார்?. பெங்களூரில் இருந்து டெல்லிக்கு கிளம்பி அவரால் என்ன செய்ய முடியும்?. உடல் நலக்குறைவு உள்ள மனுதாரரான முன்னாள் முதல்வரை கைது செய்து காவலில் வைக்கும் முடிவுக்கு நாம் உடனடியாகச் உத்தரவிட முடியாது. அதனால் ஜூன் 17ஆம் தேதி அன்று அடுத்த விசாரணை நடைபெறும். அதுவரை அவரை கைது செய்ய முடியாது’ என்று கூறி, எடியூரப்பா கைதுக்கு இடைக்கால தடை விதித்திருந்தது. இந்நிலையில் இந்த வழக்கு தொடர்பாக சிஐடி அதிகாரிகள் முன்பு இன்று (17.06.2024) காலை 10:50 மணிக்கு ஆஜரானர். இதனையடுத்து எடியூரப்பாவிடம் சிஐடி அதிகாரிகள் 3 மணி நேரமாக தொடர்ந்து விசாரணை நடத்தி வருகின்றனர்.