Skip to main content

"பா.ம.க பகுதிக்குள் நீங்க போக வேண்டாம், அதை திமுக பார்த்துக் கொள்ளும்'' - எதற்காக சொன்னார் திருமா? கடந்த காலத் தேர்தல் கதைகள் #3

Published on 28/03/2019 | Edited on 28/03/2019

தமிழகத்தில் கவனிக்கப்படும் தொகுதிகளில் சிதம்பரம் தொகுதியும் ஒன்று. விடுதலை சிறுத்தைகள் கட்சித் தலைவர் திருமாவளவன் தொடர்ந்து போட்டியிடுவதால் இது ஸ்டார் தொகுதியாகியிருக்கிறது. கடந்த 2014ஆம் ஆண்டு பாராளுமன்றத் தேர்தலில் இதே திமுக கூட்டணியில் சிதம்பரம் தொகுதியில் திருமாவளவன் போட்டியிட்டு குறைந்த வாக்கு வித்தியாசத்தில் தோல்வி அடைந்தார். பிறகு, தனித்துப்போட்டி என தொண்டர்கள் முழக்கம், மக்கள் நலக் கூட்டணி அமைத்து சட்டமன்ற தேர்தலில் போட்டி என சென்ற பயணம் மீண்டும் தற்போது இந்த முறையும் திமுக கூட்டணியுடன் அதே சிதம்பரம் தொகுதியில் திருமாவளவன் போட்டியிடுகிறார். இவர் இந்தத் தொகுதியில் ஏற்கனவே ஒரு முறை நாடாளுமன்ற உறுப்பினராக  இருந்தவர் என்பது குறிப்பிடத்தக்கது . கடந்த தேர்தலில் சிதம்பரம் தேர்தல் களம் எப்படி இருந்தது? கொஞ்சம் சென்று பார்க்கலாம்.

அப்போதும் தமிழகத்தின் ஹாட்டஸ்ட் தொகுதிகளில் ஒன்றாக சிதம்பரம் தகித்தது. தொகுதியில், வன்னிய சமூக மக்களும், தலித் சமூக மக்களும் ஏறத்தாழ சம பலத்தில் இருக்க, இவர்களையடுத்து இஸ்லாமியத் தரப்பும், கிறிஸ்தவத் தரப்பும், மூப்பனார் சமூகத்தினரும் ஓரளவு கணிசமாக உள்ளனர். பிற சமூக மக்களும் கலந்துகட்டி இருக்கிறார்கள். 

 

thiruma



கடந்த 2014 பாராளுமன்றத் தேர்தலில் அரியலூரில் அறிமுகக் கூட்டத்தைக் கலக்கலாகத் தொடங்கிய திருமா, முதற்கட்டமாக தன் கட்சித் தொண்டர்களை அழைத்து "சாதீய மோதலுக்கு வழி வகுத்து, நம்மைப் பலிகடா ஆக்கப் பார்ப்பார்கள். அதனால் பா.ம.க.வினர் இருக்கும் வன்னியப் பகுதிகளுக்குள், நீங்கள் வாக்கு சேகரிக்கப் போக வேண்டாம். அதை சூரியத் தரப்பு பார்த்துக் கொள்ளும்'' என எச்சரிக்கையாகக் கடிவாளம் போட்டார். இதைத்தொடர்ந்து பல தொகுதிகளில் இருந்தும் திருமாவுக்காக களவேலை பார்க்கச் சென்றிருந்த சிறுத்தைப் பிரமுகர்கள், தலித் மக்கள் வாழும் பகுதிகளில் வீடு வீடாகச் சென்று "பா.ம.க.வில் சேர்ந்து சீட் வாங்கியிருக்கும் மணிரத்தினத்தை ஓரம்கட்டுங்க. அவருக்கு சரியான பாடம் புகட்டுங்க. அ.தி.மு.க. வேட்பாளரோ கரன்ஸியை மட்டுமே நம்பி நிக்கிறார். அவரையும் தோற்கடிச்சி அனுப்புங்க. ஈழத்தமிழர்களுக்காக உறுதியாக் குரல் கொடுக்கிறவர் நம்ம திருமாதான்'’ என்றெல்லாம் திண்ணைப் பிரச்சாரம் செய்தார்கள் . இந்த நிலையில் உ.பி.க்கள் திருமாவுக்கு ஒத்துழைப்பு கொடுக்கவில்லை என்று ஒரு தகவல் அப்போதும் கிளம்பியது. குன்னம் தேர்தல் அலுவலகத்தைத் திறந்து வைத்த திருமா "சிறுத்தைகள் போட்டியிடும் இரு தொகுதிகளிலும் தி.மு.க. சரியாக களப்பணி செய்யவில்லை என்று சிலர் வதந்தி பரப்புகிறார்கள். ஆனால் இங்கே பாருங்கள், தி.மு.க. எம்.எல்.ஏ.வும் மா.செ.வுமான சிவசங்கர், பெரம்பலூர் மா.செ.துரைசாமி போன்றோர் இங்கே வந்து, அந்த வதந்தியை முறியடித்துவிட்டார்கள்'' என்று  உற்சாகமாகப் பேசி அதை முடித்துவைத்தார்.

முன்னாள் அமைச்சரும் தி.மு.க. மா.செ.வுமான எம்.ஆர்.கே.பன்னீர்செல்வம், அடிக்கடி தொகுதி முழுக்க விசிட் அடித்து, உ.பி.க்களை உசுப்பிவிட்டபடியே இருந்தாராம். ஒரு முறை குமராட்சி பகுதிக்கு திடீர் விசிட் அடித்த அவர், ஒ.செ. மாமல்லனைக் கூப்பிட்டு "நம்மக் கட்சியில் இருக்கும் வன்னிய வாக்குகளை இலைத் தரப்பு அறுவடை பண்ணலாம்னு பாக்குது. யாரும் ஜாதிப் பாசத்துக்கு இடம் கொடுத்துடாம பார்த்துக்கங்க. தேர்தல் முடிந்ததும் ஒன்றிய வாரியா, நமக்கு எவ்வளவு வாக்குன்னு பார்ப்பேன். ஓட்டு குறைஞ்சா யாரா இருந்தாலும், கட்சிப் பதவிக்கு ஆப்புதான்'' என செல்லமாக எச்சரித்துள்ளார். முஸ்லிம்கள் அதிகமுள்ள லால்பேட்டை, பரங்கிப் பேட்டை பகுதிகளில் ம.ம.க. ஜாகிர் உசேன் டீம், திருமாவுக்கு வாக்குகளை அறுவடை செய்தது. 
2014இல் இலைத்தரப்பில் நல்ல மனிதர் என்று பெயரெடுத்துள்ள சந்திரகாசு வரிந்து கட்டினார். "இங்கு திருமாவை தோற்கடித்துவிட்டு வாருங்கள்" என ஜெ., முன்னாள் அமைச்சர் செங்கோட்டையனை தேர்தல் பொறுப்பாளராக அனுப்பிவைக்க அவர், பர்ச்சேஸிங் பாலிஸியைக் கையில் எடுத்தார். தொகுதியில் இருக்கும் வன்னிய வாக்குகளைக் குறிவைத்த அவர், பா.ம.க.வில் இருந்து யார் யாரை இழுக்கலாம் என அண்ணாமலை நகர் வாடகை வீட்டில் ஆலோசனை நடத்தினார். முதலில் வன்னிய தலைவர்களில் முக்கியமானவரான பு.த.இளங்கோவனை ஜெ.’தலைமையில் ஐக்கியமாக்கினார். இளங்கோவன் மூலம் பாட்டாளிப் பிரமுகர்களை இழுக்க முயன்றார். டாக்டர் ராமதாஸுக்கு முதலில் அரசியல் அட்வைசராக இருந்த கங்கைகொண்ட சோழபுரம் பொறியாளர் கோமகனை சந்தித்த அதிமுக முக்கியஸ்தர்கள் "நீங்க எங்கக் கட்சிக்குக் கூட வர வேணாம். நீங்க தேர்தல் வேலை செய்யாமல் இருந்தாலே போதும்'’என்று கூற அவரும், "நான் ஒதுங்கிக்கிறேன்" என்று சொல்லிவிட்டார். செங்கோட்டையனின் ஆட்கள் சிதம்பரம் அ.தி.மு.க. பூத் ஏஜெண்டுகளை எல்லாம் செல்போனில் தொடர்புகொண்டு "உங்க பகுதியில் மாற்று கட்சிக்காரர்கள் யார் நம்ம பக்கம் வருவாங்க. பட்ஜெட் என்ன?" என தூண்டில் வீசியபடியே இருந்தார்கள்.

 

thiruma 1



காங்கிரஸில் பசை பார்ட்டியான தொழிலதிபர் மணிரத்தினம், சீட்டை பலமாக எதிர்பார்த்திருக்க, கட்சியோ எக்ஸ் எம்.பி. வள்ளல்பெருமானை அறிவித்தது. மணிரத்தினத்துக்கு காங்கிரஸில் சீட் இல்லை என்று தெரிந்ததும், சிறுத்தையினர் வெடிவெடித்தும் இனிப்பு வழங்கியும் கொண்டாடினர். காரணம் தலித் வாக்குகளை மணிரத்தினம் பிரிப்பார் என்று அவர்கள் நம்பினர். இதனால் டென்ஷனான மணிரத்தினம், பா.ம.க. காடுவெட்டி குருவைத் தொடர்புகொண்டு சீட்டுக்குப் பேசினார். க்ரீன் சிக்னல் கிடைக்க, 100 கார்கள் புடைசூழச் சென்று குருவைப் பார்த்தார். இவரைப் பார்த்ததும் குரு "என்னை காதலுக்கு எதிரின்னு எல்லோரும் நினைச்சிக்கிட்டிருக்கீங்க. நான் எதிரி இல்லை. ஏமாற்றுக் காதலைத்தான் எதிர்த்தேன்" என்றார். "தெரியும்ணே" என்ற மணி, குருவுக்கு சால்வை போட்டார். அங்கிருந்து டாக்டர் ராமதாஸை குரு தொடர்பு கொள்ள, அவரும் ஓ.கே. சொன்னார். இதைத்தொடர்ந்து, மணி வேட்பாளராக அறிவிக்கப்பட்டார்.

"சீட் கிடைக்காததால் இன்னொரு கட்சியில் சேர்வது சந்தர்ப்பவாதம் இல்லையா?' என மணிரத்தினத்திடம் அப்போது நக்கீரன் கேட்டபோது "விசுவாசமான தொண்டனின் முதுகில் கட்சியே குத்திவிட்டால் அது சரியா? உனக்குதான் சீட் என்று நம்பவைத்து கடைசி நேரத்தில் கட்சி, கழுத்தை அறுப்பது சரியா? சீட் தருவோம் என்ற பெயரில், காங்கிரஸ் தலைவர் ஞானதேசிகன் என்னிடம் எவ்வளவோ ஆதாயம் அடைந்தார். நான் மதித்த கட்சி என்னை மதிக்கவில்லை. என்னை மதித்த கட்சியை நான் மதித்து சேர்ந்திருக்கிறேன்'' என்றார் அதிரடியாகவே. ஞானதேசிகன், அப்போது தமிழ்நாடு காங்கிரஸ் தலைவராக சில காலம் இருந்தார். பின்னர், வாசன் அணி பிரிந்து மீண்டும் தமிழ் மாநில காங்கிரஸ் உருவானது. காங்கிரஸ் வள்ளல்பெருமானோ, சிதம்பரத்தில் செயல்வீரர் கூட்டத்தைக் கூட்டி "பா.ம.க.வுக்கு போன மணிரத்தினம் துரோகி" என ஆரம்பித்து ஒருமையில் அர்ச்சனை செய்தார். இலைத் தரப்போ "இங்கு நான்குமுனைப் போட்டி என்றபோதும், உச்ச ஃபைட் எங்களுக்கும் திருமாவுக்கும்தான்''’ என்றது அழுத்தமாக.

இப்படி வி.ஐ.பி. தொகுதியான சிதம்பரத்தில் 2014யிலும் சம பலத்தில் போட்டி நிலவியது. போட்டி என்பதைத் தாண்டி ஒவ்வொரு தொகுதியிலும் தேர்தல் என்பது போர் போலத்தான். வியூகங்கள், ஆக்ஷன், துரோகம், ட்விஸ்ட் எல்லாம் கலந்து தற்போதும் தகிக்கிறது தேர்தல் களம். மக்களுக்கு இந்த ஒரு மாதம் கேளிக்கைதான். அதன் பின்பு வென்றவர்களுக்கு கேளிக்கை. மக்களுக்கு வாடிக்கையான வாழ்க்கை.  

 

 

Next Story

விழுப்புரத்திலும் விஷ கள்ளச்சாராய விற்பனையா? - பாமக நிறுவனர் ராமதாஸ்  

Published on 22/06/2024 | Edited on 22/06/2024
ramadoss question illicit Liquor sale in Villupuram too?

கள்ளக்குறிச்சியில் கள்ளச்சாராயம் குடித்து 50க்கும் மேற்பட்டோர்கள் உயிரிழந்த நிலையில் நேற்று சென்னை சேர்ந்த ஒருவர் கள்ளச்சாராயம் குடித்து ராயாப்பேட்டை மருத்துவமனையில் அனுமதிக்கப்பட்டுள்ளார். இந்த நிலையில் பாமக நிறுவனர் ராமதாஸ் வெளியிட்டுள்ள அறிக்கையில், “விழுப்புரம் பழைய பேருந்து நிலையத்தில் விற்பனை செய்யப்பட்ட கள்ள சாராயத்தை வாங்கி குடித்த சென்னையைச் சேர்ந்த தொழிலாளி கண் பார்வை பாதிக்கப்பட்ட நிலையில் சென்னை இராயப்பேட்டை மருத்துவமனையில் சிகிச்சைபெற்று வருவது அதிர்ச்சி அளிக்கிறது. நச்சு சாராயம் எங்கும் நீக்கமற நிறைந்திருப்பதையே இது காட்டுகிறது.

சென்னை கே.கே.நகர் அடுத்த எம்.ஜி.ஆர் நகரைச் சேர்ந்த கிருஷ்ணசாமி என்ற சுமை தூக்கும் தொழிலாளி சென்னையிலிருந்து  சரக்குந்தில் சரக்கு ஏற்றிக்கொண்டு கடந்த 17-ஆம் தேதி விழுப்புரம் சென்றுள்ளார். அங்கு சரக்கு இறக்கி முடித்த பிறகு, விழுப்புரம் பழைய பேருந்து நிலையத்தில் விற்பனை செய்யப்பட்ட கள்ளச்சாராயத்தை வாங்கி குடித்த அவர் இரு சாராய பாக்கெட்டுகளை வாங்கிக் கொண்டு சென்னை திரும்பியுள்ளார்.

வீட்டில் வைத்து அந்த கள்ள சாராய பாக்கெட்டுகளை 20-ஆம் தேதி குடித்த கிருஷ்ணசாமி கடுமையான வயிற்று வலி மற்றும் கண் எரிச்சல் காரணமாக சென்னை கே.கே.நகரில் உள்ள இ.எஸ்.ஐ மருத்துவமனையிலும் பின்னர் இராயப்பேட்டையில் உள்ள அரசு பொது மருத்துவமனையிலும் சிகிச்சைக்காக சேர்க்கப்பட்டுள்ளார். அங்கு அவரது உயிரை மருத்துவர்கள் காப்பாற்றி விட்டாலும் கண்பார்வை பாதிக்கப்பட்டிருப்பதாக கூறப்படுகிறது. அவருக்கு மருத்துவர்கள் தொடர்ந்து சிகிச்சை அளித்து வருகின்றனர்.

கள்ளச்சாராயம் குடித்த கூலி தொழிலாளி கிருஷ்ணசாமிக்கு ஏற்பட்ட பாதிப்பு பல்வேறு ஐயங்களை ஏற்படுத்தியுள்ளது. விழுப்புரம் பழைய பேருந்து நிலையத்திலும் நச்சு சாராயம் தயாரித்து விற்பனை செய்யப்பட்டதா? அல்லது கள்ளக்குறிச்சியில் விற்பனை செய்யப்பட்ட நச்சு சாராயத்தை எவரேனும் விழுப்புரம் பழைய பேருந்து நிலையத்தில் வைத்து தொழிலாளி கிருஷ்ணசாமிக்கு கொடுத்தார்களா என்ற வினா எழுகிறது. இதற்கு விடை காணப்பட வேண்டியது அவசியம் ஆகும்.

கள்ளக்குறிச்சியில் மட்டுமின்றி, தமிழ்நாடு முழுவதும் இத்தகைய நச்சு சாராயம் விற்கப்படுவதைத் தான் இந்த நிகழ்வு உறுதி செய்கிறது. தமிழ்நாட்டில் கள்ள சாராயத்தை தடுக்க எந்த நடவடிக்கையும் மேற்கொள்ளப்படவில்லை என்பதையே இது காட்டுகிறது. கள்ள சாராயத்தை கட்டுப்படுத்துவதில் தமிழக அரசு தோல்வி அடைந்துவிட்டது என்பது ஒருபுறமிருக்க, விழுப்புரத்திலும் நச்சு சாராயம் விற்பனை செய்யப்பட்டிருந்தால் அதனால் எவரும் பாதிக்கப்படாத வகையில் நடவடிக்கை எடுக்க வேண்டியது அவசியம் ஆகும்.

விழுப்புரத்தில் எவரேனும் கள்ளச்சாராயம் குடித்தார்களா? அவர்களில் எவருக்கேனும் வயிற்று வலி கண் எரிச்சல் போன்ற பாதிப்புகள் உள்ளனவா? என்பது குறித்து விரிவான விசாரணை நடத்தப்பட வேண்டும். எவருக்கேனும் பாதிப்புகள் இருந்தால் உடனடியாக மருத்துவமனையில் சேர்த்து மருத்துவம் அளிக்க ஏற்பாடு செய்ய வேண்டும். அதேபோல் தமிழ்நாடு முழுவதும் எந்த பகுதியிலும் கள்ளச்சாராயம் விற்கப்படாமல் தடுக்கவும் அரசு நடவடிக்கை எடுக்க வேண்டும் என்று வலியுறுத்துகிறேன்.” எனக் குறிப்பிட்டுள்ளார். 

Next Story

பா.ம.க. தலைவர்களுக்கு திமுக எம்.எல்.ஏ.க்கள் பகிரங்க சவால்!

Published on 22/06/2024 | Edited on 22/06/2024
DMK MLAs open challenge to PMK leaders

கள்ளக்குறிச்சியில் கள்ளச்சாராயம் குடித்து 54 உயிரிழந்த சம்பவம் நாட்டையே உலுக்கிக் கொண்டிருக்கிறது. சிகிச்சையில் இருப்பவர்களில் பலர் சிகிச்சை பலனின்றி உயிரிழந்து வருகின்றனர். இதனால் இறப்புகளின் எண்ணிக்கையும் தொடர்ந்து அதிகரித்து வருகிறது. அதே சமயம் கள்ளச்சாராயம் குடித்து பாதிக்கப்பட்டவர்களுக்கு கள்ளக்குறிச்சி, சேலம் மற்றும் விழுப்புரம் அரசு மருத்துவமனை, புதுச்சேரி ஜிப்மர் மருத்துவமனையில்  தொடர்ந்து தீவிர சிகிச்சை அளிக்கப்பட்டு வருகிறது. கள்ளச்சாராயம் அருந்திய 4 பெண்கள் உட்பட 54 பேர் இதுவரை உயிரிழந்துள்ளனர். மேலும் சிகிச்சையில் இருக்கும் 10 பேர் முழுமையாக கண்பார்வையை இழந்திருப்பதாக மருத்துவர்கள் தகவல் தெரிவித்துள்ளனர்.

முன்னதாக கள்ளச்சாராய மரணங்களுக்கு திமுக எம்எல்ஏக்கள் தான் காரணம் என பாமக நிறுவனர் ராமதாஸ் குற்றம் சாட்டியிருந்தார். இந்நிலையில் இது தொடர்பாக சட்டப்பேரவை வளாகத்தில் சங்கராபுரம் திமுக எம்எல்ஏ உதயசூரியன், ரிஷிவந்தியம் திமுக எம்எல்ஏ வசந்தம் கார்த்திகேயன் ஆகியோர் கூட்டாக செய்தியாளர்களுக்கு பேட்டி அளித்தனர். அப்போது கள்ளக்குறிச்சி விவகாரம் தொடர்பாக வசந்தம் கார்த்திகேயன் எம்.எல்.ஏ. பேசுகையில், “எங்கள் மீது வைத்துள்ள குற்றச்சாட்டுகள் நிரூபிக்கப்பட்டால் பொது வாழ்வில் இருந்து விலக தயார். அப்படி நிரூபிக்கப்படாவிட்டால் பாமக நிறுவனர் ராமதாஸ் மற்றும் அக்கட்சியின் தலைவர் அன்புமணி ராமதாஸ் ஆகியோர் பொது வாழ்வில் இருந்து விலக தயாரா?.

கள்ளக்குறிச்சி விவகாரத்தில் கைதானவர் திமுக நிர்வாகி இல்லை. நாடாளுமன்ற மக்களவைத் தேர்தல் நேரத்தில் வாக்காளர்களுக்கு வழங்கப்படும் கட்சி ஸ்டிக்கர்கள் தான் அவரது வீட்டில் ஒட்டப்பட்டுள்ளது” எனத் தெரிவித்தார். மேலும் இது தொடர்பாக உதயசூரியன் எம்.எல்.ஏ. பேசுகையில், “கள்ளக்குறிச்சி காவல் நிலையத்தில் கள்ளச்சாராயம் தொடர்பாக அதிமுக எம்எல்ஏ அரசியல் ஆதாயம் வேண்டி புகார் தெரிவித்துள்ளார். எங்கள் மீது பொய்யான குற்றச்சாட்டை பாமக தலைவர்கள் வைத்துள்ளனர். 37 ஆண்டுகால பொது வாழ்க்கைக்கு குந்தகம் ஏற்படுத்தும் வகையில் பாமக தலைவர்கள் பேசியுள்ளனர்” எனத் தெரிவித்தார்.