Skip to main content

முதுகெலும்பு உடைஞ்சவன்தானேன்னு கேட்டாங்க... ஆனால் இன்று??! பியர் கிரில்ஸ் | வென்றோர் சொல் #22

 

Bear Grylls

 

'வல்லவனுக்குப் புல்லும் ஆயுதம்' என்பது தமிழில் பிரபலமான பழமொழிகளுள் ஒன்று. இதற்கு ஆகச்சிறந்த உதாரணமாக இந்த மனிதரைச் சொல்லலாம். இன்று நம் புழக்கத்தில் உள்ள ஒவ்வொரு பழமொழியும், சொலவடையும் ஒரே நாளில் உருவானவையல்ல. அது ஒவ்வொன்றுக்குப் பின்னும் நீண்ட நெடிய வரலாறும், உயிர் பிழைத்தலை உள்ளடக்கிய மனித வாழ்வியல் போராட்டங்களும் உள்ளன. அதற்கான உதாரணமாக இந்த மனிதர் செய்யும் செயல்களைச் சொல்லலாம்.

 

உயிர் பிழைத்தலின் அடிப்படை, சூழலோடு பொருந்திப் போதலே ஆகும். பூமிப்பந்தில் பல உயிரினங்கள் இவ்வாறுதான் வாழ்ந்து கொண்டிருக்கின்றன. ஆனால், பகட்டை விரும்பும் மனிதகுலத்திற்கு இது அத்தனை எளிதானது அல்ல. அடர் வனப்பகுதியோ, வறண்ட பாலைவனமோ, குளிர்ப் பிரதேசங்களோ எதுவாகியினும் அச்சூழலோடு பொருந்தி சவால்களும், ஆபத்துகளும் நிரம்பிய பகுதிகளைக் கடந்து வரும் இம்மனிதனின் பயணம் நமக்கு வெறும் ஆச்சரியமும், பொழுதுபோக்கும் அளிக்கக் கூடிய ஒன்று. ஆனால், உண்மையில் அது ஆதிகால மனிதனின் இடப்பெயர்வு வாழ்க்கையையும், அதில் நிரம்பியிருந்த சவால்களையும் தாங்கிய வரலாறு. சூழலோடு பொருந்தி ஆபத்தின் எல்லைகளை அளந்த சாதனை மனிதன் பியர் கிரில்ஸ் என்பதே இவருக்குப் பட்டம் சூட்டும் சந்தர்ப்பம் அமைந்தால் சூட்ட வேண்டிய பொருத்தமான பட்டமாக இருக்கும்.

 

அயர்லாந்து நாட்டில் எளிமையான நடுத்தரக் குடும்பத்தில் பிறந்தவர் பியர் கிரில்ஸ். அவரது தந்தை ஒரு சாகசப்பிரியர். அவர் அயர்லாந்து நாட்டில் இருந்த பிரபல பொழுபோக்கு கிளப்புகளில் உறுப்பினராக இருந்ததால் இளம் வயதிலேயே பியர் கிரில்ஸிற்கு மலையேறுவது, படகு ஓட்டம் செய்வது குறித்து கற்றுத்தருகிறார். சாகசங்களில் ஈடுபடுவது பியர் கிரில்ஸிற்கு பிடித்துப் போக, சந்தர்ப்பம் கிடைக்கும் போதேல்லாம் சுவர் ஏறிக் குதிப்பது, ஆபத்தான பள்ளங்களைத் தாண்டுவது போன்ற செயல்களில் ஈடுபட ஆரம்பிக்கிறார். ஒரு கட்டத்தில் இந்தியாவின் எல்லைப்பகுதியில் இருக்கும் எவரெஸ்ட் சிகரம் மீது அவருக்குத் தீராத காதல் ஏற்படுகிறது. அதை எப்படியாவது ஏறி அடைய வேண்டும் என்பதே அவரது சிறு வயது கனவு.

 

பிறகு, பிரிட்டிஷ் ராணுவத்தில் வான்படை வீரராகப் பணி செய்கிறார். ஆப்பிரிக்க பகுதியில் 16,000 அடி உயரத்தில் இருந்து குதிக்கும் போது, பாராசூட் செயலிழந்து, கீழே விழுந்ததில் முதுகுப்பகுதியில் மூன்று எலும்புகள் பலத்த சேதம் அடைகின்றன. இனி எழுந்து நடப்பது சிரமம் என மருத்துவர்கள் கூற, 18 மாதங்கள் கழித்து தன்னம்பிக்கையோடு எழுந்து, தன் சிறுவயது கனவான எவரெஸ்ட் சிகரத்தை வெற்றிகரமாக ஏறி சாதனை படைக்கிறார். அதன்பின், ஒரு தனியார் தொலைக்காட்சியில் அவர் தொகுத்து வழங்கிய மேன் வெர்சஸ் வைல்டு (Man Vs Wild) என்ற தொடர் பெற்ற வெற்றி உலகம் அறிந்ததே.

 

"சிறு வயதாக இருக்கும் போது என் தந்தையுடன் மலையேற்றம், படகு ஓட்டம் செய்யப் போவேன். அதில் மலையேற்றம் செய்வது எனக்கு மிகவும் பிடித்துப் போனது. அது மிகவும் சிறிய மலைதான். ஆனால், அதை ஏறி முடித்த பின் உலகத்தில் உள்ள ஏதோ ஒரு பெரிய மலையை ஏறியது போல உணர்ந்தேன். அந்தச் சமயத்தில் எனக்குள் தன்னம்பிக்கையும், தைரியமும் அதிகமானது. எப்படியாவது எவரெஸ்ட் சிகரத்தில் ஏறிவிட வேண்டும் என்று தீர்மானித்தேன். என்னுடைய அறையின் சுவர்களில் எவரெஸ்ட் சிகரத்தின் படங்கள்தான் நிரம்பியிருக்கும். எதிர்பாராத விதமாக நடந்த விபத்தில் 18 மாதங்கள் படுத்த படுக்கையாக இருந்தேன். மருத்துவர்கள் எழுந்து நடக்கவே முடியாது என்று என் குடும்பத்தினரிடம் கூறினார்கள். நான் நம்பிக்கை கொண்டு எழுந்தேன். எவரெஸ்ட் ஏறுவதற்காக ஸ்பான்ஸர்ஷிப் கேட்டு சென்ற இடங்களில் எல்லாம் நீ முதுகு எலும்பு உடைந்தவன் தானே... உன்னால் எப்படி எவரெஸ்ட் ஏற முடியும் என்றார்கள். நான் நம்பிக்கையை சிறிதும் இழக்கவில்லை. மிக இளம்வயதில் எவரெஸ்ட் ஏறி சாதனை படைத்தேன்".

 

பியர் கிரில்ஸை உலகப் புகழின் உச்சத்திற்குக் கொண்டு சென்ற மேன் வெர்சஸ் வைல்டு (Man Vs Wild) என்ற நிகழ்ச்சியில், உயிர் பிழைத்தலுக்காக அவர் கற்றுத்தரும் வழிமுறைகள் அனைத்தும் விசித்திரமானவை. நீர் கிடைப்பதற்கு சந்தர்ப்பம் இல்லாத நேரத்தில், விலங்குகளின் சாணத்தைப் பிழிந்து அதில் இருந்து கிடைக்கும் நீரைப் பயன்படுத்துவது, இறந்து கிடக்கும் மிருகங்களின் இரைப்பையில் இருக்கும் நீரை எடுத்துப் பயன்படுத்துவது, கிடைக்கும் சுள்ளிகளை வைத்து எளிமையாக நெருப்பு உருவாக்குவது, மிருகங்களிடமிருந்து தற்காத்துக் கொள்ளும் வழிமுறை, ஆபத்தான பகுதிகளைக் கடப்பது எனச் சவால்கள் நிறைந்த அவரது பயணம் நாமே காடுகளுக்குள் உலவுகிற ஒரு அனுபவத்தினையும், உயிர் பிழைத்த உணர்வையும் கொடுக்கும்.    

 

Ad

 

"வாழ்க்கை நமக்கு எப்போதும் ஒரு வாய்ப்பினை மட்டுமே வழங்கும். அதைச் சரியாகப் பயன்படுத்திக்கொள்ள வேண்டும். வாழ்விற்கும் சாவிற்கும் இடைப்பட்ட கோடு நம் வாழ்க்கையில் நாம் என்ன செய்ய விரும்புகிறோம் என்பதை வைத்து தீர்மானிக்கப்படுகிறது" இவை தான் பியர் கிரில்ஸை படுக்கையில் இருந்து எழ வைப்பதற்கும், இன்று வரை மலைகள், காடுகள் எனப் பயணத்தைத் தொடர்வதற்குமான ரகசிய மந்திரமாகும்.

 

எழுந்து நடக்கவே வாய்ப்பில்லை என்று முடிவு எழுதப்பட்ட நபர், இன்று மலைகள், காடுகள், பாலைவனங்கள், குளிர்ப் பிரதேசங்கள் என இயற்கையின் அத்தனை கைவண்ணங்களையும் அலசி ஆராய்வதற்கான ஊக்கம் அவர் மீது அவர் கொண்ட நம்பிக்கையே எனலாம். கனவினை நோக்கித் தொடர்ந்து ஓடுவோம்! 

 

 

 

உங்கள் கருத்தைப் பதிவு செய்யுங்கள்