தான் சந்தித்த வித்தியாசமான குடும்ப நல சிக்கல்கள் குறித்தும் அதைக் கையாண்ட விதம் குறித்தும் ‘வழக்கு எண்’ தொடர் வழியாக நமக்கு சொல்லப்பட்டு வருகிறது. அந்த வகையில் இன்று ஒரு வழக்கு குறித்த விவரங்களை வழக்கறிஞர் சாந்தகுமாரி நம்மோடு பகிர்ந்து கொள்கிறார்.

பாஸ்கர் என்பவருடைய வழக்கு இது. நல்ல வேலை, சமூகத்தில் பொறுப்பான இளைஞராகவும், குடும்பத்திற்கு சிறந்த பிள்ளையாகவும் இருந்து வருபவர். நிட்சய திருமணம்தான் நடக்கிறது. கல்யாணமானதிலிருந்தே கணவன் மீதான அதிகப்படியான அன்பினை எல்லோரின் முன்னிலும் தெரிய வைக்கிற பெண்ணாக இருக்கிறாள். அதாவது எல்லோரின் முன்னிலும் கட்டிப் பிடிப்பது, முத்தம் கொடுப்பது அவளது வழக்கமாக இருந்திருக்கிறது.

ஆனால் பாஸ்கருக்கோ படுக்கையறை தவிர மற்ற இடங்களிலோ, பெற்றோரின் முன்னிலையிலோ கட்டிப் பிடிப்பது, முத்தம் கொடுப்பதெல்லாம் அவருக்கு பிடிக்கவில்லை. இதை அவளிடம் எடுத்துச் சொன்னால் “என்னை பிடிக்கவில்லையா? என் மீது காதல் இல்லையா?” என்றெல்லாம் அழுது அடம்பிடிப்பவளாகவும், அறைக்கதவை சாத்திக்கொண்டு நீண்ட நேரமாகியும் கதவை திறக்காமலும் இருப்பவளாக இருந்திருக்கிறாள்.

இந்த நடவடிக்கையை கண்டிக்கும் விதமாக பாஸ்கரின் அம்மா பெண்ணின் அக்காவிடம், உங்க வீட்டு பிள்ளை இவ்வாறு நடந்து கொள்கிறார் என்று ஒரு புகாரை சொல்லி வைத்திருக்கிறார்கள். அந்த அக்காவும் தங்கையை அழைத்து கண்டித்திருக்கிறாள். இதற்கு பழிவாங்கும் விதமாக மாமியாரை பூரிக் கட்டையைக் கொண்டு அந்த பெண் ஒரு நாள் பலமாகத் தாக்கியிருக்கிறாள்.

அலுவலகம் சென்ற பாஸ்கர் பதறிப்போய் வீட்டிற்கு வந்து அம்மாவை மருத்துவமனை அழைத்து சென்றிருக்கிறார். மனைவியும் கொஞ்ச நாளைக்கு அவளது அம்மா வீட்டிலேயே இருக்கட்டும் என்று விட்டு வந்திருக்கிறார். அந்த பெண்ணின் தம்பி ஒருவர் அக்காவிற்காக பரிந்து பேசி பாஸ்கர் வீட்டில் விட்டுச் சென்றிருக்கிறார்.

அம்மாவை அடித்ததால் சில நாட்களாக வீட்டில் இருந்த மனைவியிடம் பேசாமல் இருந்திருக்கிறார் பாஸ்கர். ஆனால் அவரை கட்டாயப்படுத்தி உடலுறவுக்கு அழைத்திருக்கிறாள். ஆனால் அதற்கு விருப்பம் தெரிவிக்காத பாஸ்கரை மிரட்டும் விதமாக மொட்டை மாடிக்குச் சென்று கீழே குதித்து விடுவதாக கொலை மிரட்டலும் விட்டிருக்கிறாள்.

அக்காவை அழைத்து வந்த தம்பியிடம் சொல்லி சிறிது நாளைக்கு பிரிந்து இருக்கலாம் என்று முடிவெடுத்த பாஸ்கருக்கு ஒரு அதிர்ச்சி காத்திருக்கிறது. அந்த பெண், தன்னை அடித்து கொடுமைப்படுத்துவதாக காவல் நிலையத்தில் கணவர் மீது புகார் கொடுத்திருக்கிறாள். தன்னுடைய அம்மாவை பூரிக்கட்டையால் தாக்கினாள் என்று பாஸ்கர் தன் பங்கிற்கு சொல்ல, அவளோ பாஸ்கரின் அம்மா தானே தாக்கிக்கொண்டு பழியை தன் மீது போடுவதாக காவல்நிலையத்தில் சொல்லி இருக்கிறாள்.

இனிமேல் இவளோடு வாழ முடியாது என்று முடிவெடுத்த பாஸ்கர். டைவர்ஸ்க்கு அப்ளை செய்தார். ஆனால் இவள் செய்த எந்த குற்றத்தையும் அவள் ஒப்புக்கொள்ளவில்லை, நல்வாய்ப்பாக இவள் தற்கொலை முயற்சி செய்ததை பாஸ்கரின் அம்மா வீடியோ எடுத்து வைத்திருந்திருக்கிறார்கள். அதை ஆதாரமாகக் கொண்டு தற்கொலை செய்து கொள்வதாக மிரட்டுவதும் ஒரு வகை குற்றச்செயல் தான் என்று பாஸ்கருக்கு அந்த பெண்ணிடமிருந்து டைவர்ஸ் வாங்கி கொடுக்கப்பட்டது.

திருமண வாழ்க்கை பல சமயம் ஆண்களால் பெண்களுக்கு கொடுமை நிகழ்த்தப்பட்டு நரக வாழ்க்கை ஆகிறது என்று கேள்விப்பட்டிருக்கிறோம், பார்த்திருப்போம். ஆனால் இப்பொழுதெல்லாம் பெண்களால்தான் சில ஆண்களின் வாழ்க்கை நரகமாக்கப்படுகிறது என்பதற்கு இந்த வழக்கு ஒரு எடுத்துக்காட்டாகும்.

தான் சந்தித்த பல்வேறு வகையான வழக்குகள் குறித்தும் அதை நடத்திய விதம் குறித்தும் பிரபல வழக்கறிஞர் சாந்தகுமாரி நம்மோடு பகிர்ந்து கொள்கிறார்.

ஜேம்ஸ் என்பவருடைய வழக்கு இது. முதல் திருமணமாகி டைவர்ஸ் ஆனவர். இரண்டாவது திருமணம் செய்து கொள்ளலாம் என முடிவெடுத்து சர்ச் வழியாக பெண் தேடியபோது ஒரு பெண் கிடைக்கிறாள். அவளுக்கு இது முதல் திருமணம். பெண்ணை நேரில் சந்தித்து நான் ஏற்கனவே திருமணமாகி டைவர்ஸ் ஆனவன். உனக்கு முதல் திருமணம். ஆட்சேபனை ஏதுமில்லையா என்றதற்கு இதெல்லாம் வாழ்க்கையில் சகஜம் தானே என்று சாதாரணமாக எடுத்துக் கொண்டாள் அந்த பெண்.

சர்ச் உதவியோடு இருவீட்டாரின் சம்மதத்தோடு தான் திருமணம் நடக்கிறது. ஜேம்ஸ் காலையில் வேலைக்கு போய்விட்டு இரவு வீட்டிற்கு திரும்புகிறவன். ஆனால் அந்த பெண் ஐடி நிறுவனத்தில் வெளிநாட்டு கம்பெனிக்கு வேலை செய்கிறவள். இரவு தான் வேலையே ஆரம்பிப்பாள். ஜேம்ஸ் இரவு தூங்கும் முன் கணவன், மனைவி மகிழ்ச்சியாக இருந்துவிட்டு தூங்கலாம் என்று காத்திருந்தால் வரமாட்டாள். நன்றாக தூங்கிக்கொண்டிருக்கும் விடியற்காலையில் வேலை எல்லாம் முடித்துவிட்டு வந்து மகிழ்ச்சியாக இருக்கலாம் என்று எழுப்புவாள். அந்த நேரத்தில் தனக்கு விருப்பமில்லை என்று ஜேம்ஸ் சொல்லிவிடுவான்.

இது ஒருபுறம் இருக்க, ஒரு நாள் அளவுக்கு அதிகமான எண்ணெய் ஊற்றி சமைத்திருக்கிறாள். வீட்டில் வயதான பெற்றோர்கள் இருக்கிறார்கள் இப்படி சமைக்காதே என்றதற்கு கோபித்துக் கொண்டு இரவில் அவளது அம்மா வீட்டிற்கு சென்றிருக்கிறாள். சின்ன கோபம் தானே திரும்பி வருவாள் என்று எதிர்பார்த்திருந்தால் காவல் நிலையத்திலிருந்து ஜேம்ஸை அழைத்திருக்கிறார்கள்.

முதல் திருமணம் நடந்தது தெரியாமல் ஏமாற்றி தன்னை திருமண மோசடி செய்ததாக புகார் கொடுத்திருக்கிறாள். வழக்கு நடந்து சர்ச்சிலிருந்து ஆதாரங்கள் திரட்டி கொடுக்கப்பட்டது. கிறித்துவ திருமணங்களில் அனைத்து ஆதாரங்களும், விவரங்களும் சர்ச்சில் ஒப்படைக்கப்பட வேண்டும். அப்படி ஒப்படைத்தது ஜேம்ஸ்க்கு உதவியாகவும் அந்த பெண்ணுக்கு பின்விளைவாகவும் ஆகிவிட்டது.

சிறிது காலம் சேர்ந்து வாழ்ந்தவள், என்னை வீட்டிலிருந்து வெளியே தள்ளி பூட்டி விடுகிறார் என்று புகார் கொடுத்திருக்கிறாள். அவசரமாக சாவியை எடுத்துக் கொண்டு ஜேம்ஸ் போனதை திரித்திருக்கிறாள். இப்படியே எதற்கெடுத்தாலும் பொய், அம்மா வீட்டிற்கு கோபித்துக் கொண்டு போவது, காவல் நிலையத்தில் புகார் கொடுப்பது என்று அந்த பெண் தொடர்ச்சியாக செய்து வந்ததால் ஜேம்ஸ் தரப்பிலிருந்து டைவர்ஸ்க்கு அப்ளை செய்தார்கள். 

மூன்று முறை அழைப்பு விடுத்தும் அந்த பெண் தரப்பு நியாயத்தை சொல்ல கோர்ட்டிற்கு வராததால் ஜேம்ஸ்க்கு டைவர்ஸ் கொடுத்து தீர்ப்பு வழங்கியது நீதிமன்றம். இல்லற வாழ்வில் உண்மையாகவும் நேர்மையாகவும் உறவுக்கு முக்கியத்துவம் தந்து வாழ வேண்டும்.