Skip to main content

களத்தில் வேகப்பந்து வீச்சாளர்.. விபத்தென்றால் தீயணைப்பு அதிகாரி!

Published on 26/02/2018 | Edited on 26/02/2018

நியூசிலாந்து அணியில் வேகப்பந்து வீச்சாளராக இருக்கும் சேத் ரான்ஸ், தீவிபத்துக் காலங்களில் தீயணைப்பு அதிகாரியாக செயல்பட்டு, பலரை விபத்துகளில் இருந்து காத்து வருகிறார்.

 

களத்தில் அனல்பறக்கும் வேகத்தில் பந்துவீசி எதிரணியினரைத் திணறடிக்கும் இவர்தான், மளமளவென எரிந்துகொண்டிருக்கும் தீயினை சமயத்தில் சென்று அணைக்கிறார்.

 

seth

 

சேத் ரான்ஸ் நியூசிலாந்து அணிக்காக இரண்டு ஒருநாள் மற்றும் நான்கு டி20 போட்டிகளில் களமிறங்கியவர். மிகப்பெரிய வாய்ப்புகள் இவருக்கு வழங்கப்படவில்லை என்றாலும், உள்ளூர் கிரிக்கெட் போட்டிகளில் பல சாதனைகளை ரான்ஸ் படைத்திருக்கிறார்.

 

சமீபத்தில் தி ஒயிட் ஸ்வான் பகுதியில் உள்ள வைரரப்பா எனும் உணவுவிடுதியில் ஏற்பட்ட தீவிபத்தினை சரியான நேரத்தில் சென்று அணைத்திருக்கிறார். முன்கூட்டியே அழைப்பு வந்ததால் மிகப்பெரிய விபத்து தவிர்க்கப்பட்டிருக்கிறது எனக்கூறும் ரான்ஸ், ‘கட்டிடத்தின் தெற்கு மூலையில் தீவிபத்து ஏற்பட்டது. கட்டுமானம் மற்றும் நீர்க்குழாய்ப் பகுதிகளில் சிறிதளவு சேதம் மட்டுமே ஏற்பட்டிருக்கிறது’ என தெரிவித்திருக்கிறார்.

 

 

 

 

இதற்குமுன், நியூசிலாந்து அணியில் வேகப்பந்து வீச்சாளராக இருந்த ஷேன் பாண்ட் கிரிக்கெட் வீரராக இருந்துகொண்டே, தீயணைப்பு அதிகாரியாக செயல்பட்டது குறிப்பிடத்தக்கது. 

Next Story

ஜெய்ஸ்வால் அதிரடியால் அதிர்ந்த ராஜ்கோட்; ரன்களை வாரிக் குவித்த இந்திய அணி!

Published on 18/02/2024 | Edited on 18/02/2024
ind vs eng third test match live score update jaiswal double century

இந்தியா மற்றும் இங்கிலாந்து அணிகளுக்கிடையிலேயான மூன்றாவது டெஸ்ட் போட்டி ராஜ்கோட்டில் நடைபெற்று வருகிறது. இதில் டாஸ் வென்ற இந்திய அணி முதல் இன்னிங்சில் 445 ரன்கள் குவித்தது. அதிகபட்சமாக கேப்டன் ரோஹித் 131 ரன்களும், ஜடேஜா 112 ரன்களும்,  சர்பராஸ் கான் 62 ரன்களும் எடுத்தனர்.  இங்கிலாந்து சார்பில் மார்க் வுட் அதிகபட்சமாக 4 விக்கெட்டுகளை வீழ்த்தினார். பின்னர் ஆடிய இங்கிலாந்து அணி 319 ரன்களுக்கு அனைத்து விக்கெட்டுகளையும் இழந்தது. அந்த அணியில் அதிகபட்சமாக பென் டக்கெட் 153 ரன்கள் குவித்தார். இந்திய அணி சார்பில் அதிகபட்சமாக  சிராஜ் 4 விக்கெட்டுகளை வீழ்த்தினார். 

126 ரன்கள் முன்னிலையுடன் இரண்டாவது இன்னிங்சை துவங்கிய இந்திய அணிக்கு துவக்கம் சரியாக அமையவில்லை.  கேப்டன் ரோஹித் 19 ரன்களில் ஆட்டமிழந்தார். பின்னர் இணைந்த ஜெய்ஸ்வால், கில் இணை சிறப்பாகவும், பொறுப்பாகவும் ஆடியது. அதிரடியாக ஆடிய ஜெய்ஸ்வால் டெஸ்ட் போட்டிகளில் தனது 3 ஆவது சதத்தைப் பதிவு செய்தார்.  கில் அரை சதம் கடந்தார். 102 ரன்கள் இருந்தபோது ரிட்டையர்டு ஹர்ட் முறையில் ஜெய்ஸ்வால் 102 ரன்னில் வெளியேறினார். பின்னர் வந்த பட்டிதார் ரன் எதுவும் எடுக்காமல் ஆட்டமிழந்தார். அதனால் நைட் வாட்ச்மேனாக குல்தீப் வந்தார். குல்தீப் 3, கில் 65 ரன்கள் எடுத்து இந்திய அணியின் ஸ்கோர் 196-2 என மூன்றாவது நாள் ஆட்டம் முடிந்தது.

ind vs eng third test match live score update jaiswal double century

தொடர்ந்து 4ஆவது நாள் ஆட்டத்தைத் தொடர்ந்த இந்திய அணிக்கு கில் மற்றும் குல்தீப் சிறப்பாக ஆடினர். சதம் அடிப்பார் என எதிர்பார்க்கப்பட்ட கில் 91 ரன்களில் எதிர்பாராத விதமாக ரன் அவுட் ஆனார். பின்னர் ரிட்டையர்டு ஹர்ட் ஆன ஜெய்ஸ்வால் மீண்டும் ஆடக் களமிறங்கினார். சிறப்பாக நைட் வாட்ச்மேன் இன்னிங்ஸ் ஆடிய குல்தீப் 27 ரன்களில் ஆட்டமிழந்தார். அதன் பிறகு ஜெய்ஸ்வாலுடன் சர்பிராஸ் கான் இணைந்தார். இந்த இணை அதிரடி ஆட்டத்தில் கவனம் செலுத்தியது. சிறப்பாக மற்றும் அதிரடியாக ஆடிய ஜெய்ஸ்வால் மற்றும் சர்பிராஸ் கான் இணை பவுண்டரி மற்றும் சிக்ஸர்களையும் அடித்து ரசிகர்களுக்கு விருந்து படைத்தனர்.

தொடர்ந்து சிறப்பாக ஆடிய ஜெய்ஸ்வால் டெஸ்ட் போட்டிகளில் தனது இரண்டாவது இரட்டை சதத்தைப் பதிவு செய்தார். மறுமுனையில் சர்பிராஸ் கானும் அரைசதம் கடந்தார். இந்திய அணி 4 விக்கெட்டுகளை மட்டும் இழந்து 430 ரன்களுக்கு இரண்டாவது இன்னிங்சை டிக்ளேர் செய்தது.  557 ரன்கள் எடுத்தால் வெற்றி என்ற இமாலய இலக்குடன் இங்கிலாந்து அணி இரண்டாவது இன்னிங்சை ஆடத் தொடங்கியது. தொடக்க வீரர் க்ராவ்லி 11 ரன்களிலும், டக்கெட் 4 ரன்களிலும் ஆட்டம் இழந்தனர். தேநீர் இடைவேளையின் போது 8.2 ஓவர்களில் 18-2 என இங்கிலாந்து ஆடி வருகிறது.  

- வெ.அருண்குமார்

Next Story

சாதனை படைத்த அஸ்வின்; பிரதமர் மோடி வாழ்த்து

Published on 16/02/2024 | Edited on 16/02/2024
Greetings Prime Minister Modi for Ashwin's record of taking 500 wickets

இங்கிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டு 5 டெஸ்ட் போட்டிகள் கொண்ட தொடரில் விளையாடி வருகிறது. இதில், முதல் இரு டெஸ்ட் போட்டிகளிலும், இந்திய அணியும் இங்கிலாந்து அணியும் தலா ஒரு வெற்றியைப் பதிவு செய்தன. இதனையடுத்து, நேற்று (15ம் தேதி) குஜராத் மாநிலம், ராஜ்கோட் மைதானத்தில் மூன்றாவது டெஸ்ட் போட்டி துவங்கியது. இந்த போட்டியின் முதல் இன்னிங்ஸில் இங்கிலாந்து வீரர் ஜாக் கிராலியின் விக்கெட்டை இந்திய அணி வீரர் அஸ்வின் வீழ்த்தினார். 

இந்த விக்கெட்டை வீழ்த்தியதன் மூலம் டெஸ்ட் போட்டியில் 500 விக்கெட்களை வீழ்த்திய வீரர் என்ற வரலாற்றுச் சாதனையை அஸ்வின் படைத்துள்ளார். 87 இன்னிங்ஸ்களில் ஸ்ரீலங்கா வீரர் முரளிதரன் 500 விக்கெட்களை வீழ்த்தி சாதனை படைத்த நிலையில், தற்போது 98 இன்னிங்ஸ்களில் இந்திய வீரர் அஸ்வின் 500 விக்கெட்களை வீழ்த்தியுள்ளார். அஸ்வினின் இந்த சாதனைக்கு பலரும் தங்கள் வாழ்த்துகளைத் தெரிவித்து வருகின்றனர். 

அந்த வகையில் பிரதமர் மோடி, அஸ்வினுக்கு தனது வாழ்த்துகளைத் தெரிவித்துள்ளார். இது குறித்து அவர் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “டெஸ்ட் போட்டிகளில் 500 விக்கெட்டுகளை வீழ்த்திய அசாதாரண மைல்கல்லை எட்டிய ரவிச்சந்திரன் அஸ்வினுக்கு வாழ்த்துகள். அவரது பயணம் மற்றும் சாதனைகள் அவரது திறமை, விடாமுயற்சிக்கு சான்றாகும். அவர் மேலும் பல சாதனைகளை படைக்க என் மனமார்ந்த வாழ்த்துகள்” என்று குறிப்பிட்டுள்ளார்.