Skip to main content

சச்சினை தோளில் சுமந்த தருணம்... பிரபல விருதை வென்ற சச்சின்!

விளையாட்டு உலகின் மிகப்பெரிய அங்கீகார விருதுகளில் ஒன்றாக இருக்கிறது லாரியஸ் விருது. விளையாட்டுத் துறையில் சிறந்து விளங்குபவர்களுக்கு ஆண்டுதோறும் லாரியஸ் விருதுகள் வழங்கப்படுகின்றன. அதன்படி, 2019 ஆம் ஆண்டில் விளையாட்டில் சிறந்து விளங்கியவர்களுக்கான விருது வழங்கும் விழா, ஜெர்மனி தலைநகர் பெர்லினில் கோலாகலமாக நடைபெற்றது. 
 

sachin tendulkar

 

 

இதில் விளையாட்டில் சிறந்த தருணத்திற்கான லாரியஸ் விருதினை முன்னாள் இந்திய கிரிக்கெட் வீரர் சச்சின் டெண்டுல்கருக்கு வழங்கப்பட்டுள்ளது.

1983ஆம் ஆண்டிற்கு பிறகு தோனி தலைமையிலான இந்திய கிரிக்கெட் அணி 2011ஆம் ஆண்டு கிரிக்கெட் உலகக்கோப்பையை வென்றது. இலங்கையுடனான அந்த இறுதிப்போட்டியுடன் சர்வதேச கிரிக்கெட்டிலிருந்து ஓய்வுபெறுவதாக இருந்த சச்சினை மேட்ச்சில் வெற்றிபெற்றவுடன் இந்திய வீரர்கள் தோளில் சுமந்து மைதானத்தை சுற்றி வலம் வந்தனர். இந்த தருணத்தை கடந்த 20 ஆண்டுகளில் நடைபெற்ற சிறந்த தருணம் என்று குறிப்பிட்டு அதற்காக சச்சினிற்கு விருதும் வழங்கியுள்ளது லாரியஸ் விருது குழு.

சிறந்த வீரருக்கான விருது, ஃபார்முலா ஒன் கார் பந்தயத்தில் ஆறு முறை சாம்பியனான லீவிஸ் ஹேமில்டனுக்கும், நட்சத்திர கால்பந்து வீரர் லயோனல் மெஸ்ஸிக்கும் பகிர்ந்து அளிக்கப்பட்டது. இதன்மூலம், லாரியஸ் விருதை வென்ற முதல் கால்பந்து வீரர் என்ற சாதனைக்கு மெஸ்ஸி சொந்தக்காரர் ஆனார்.

சிறந்த விளையாட்டு வீராங்கனைக்கான விருதை, அமெரிக்க ஜிம்னாஸ்டிக்ஸ் ஜாம்பவானும், உலக சாம்பியன்ஷிப் தொடரில் அதிக பதக்கங்களை வென்றவருமான சிமோன் பைல்ஸ் தட்டிச் சென்றார்.

கடந்தாண்டு நடைபெற்ற ஆடவருக்கான ரக்பி உலகக்கோப்பையை வென்ற தென்னாப்பிரிக்கா, சிறந்த அணிக்கான விருதை வென்றது. லாரியஸ் வாழ்நாள் சாதனையாளர் விருதினை ஜெர்மனி நாட்டைச் சேர்ந்த கூடைப்பந்து ஜாம்பவான் டிர்க் நோவிட்ஸ்கி வென்றார்.

 

 

உங்கள் கருத்தைப் பதிவு செய்யுங்கள்