Skip to main content

மீண்டும் தங்கப் பதக்கம் வென்று வரலாறு படைத்த நீரஜ் சோப்ரா

Published on 28/08/2023 | Edited on 28/08/2023

 

Nirav Chopra made history by winning gold medal again

 

19வது உலக தடகள சாம்பியன்ஷிப் போட்டிகள் ஹங்கேரி தலைநகர் புடாபெஸ்டில் நடைபெற்று வந்தது. கடந்த 9 நாட்களாக நடந்து வந்த போட்டியில் நேற்று இரவு ஆண்களுக்கான ஈட்டி எறிதல் இறுதிச்சுற்று நடைபெற்றது. இந்தப் போட்டியில், பங்குபெற்ற 12 போட்டியாளர்களில் ஒலிம்பிக்கில் தங்கப் பதக்கம் வென்ற நீரஜ் சோப்ரா உட்பட 3 இந்தியர்கள் கலந்து கொண்டனர். அதனால், இந்தப் போட்டியை இந்திய ரசிகர்கள் ஆர்வமுடன் எதிர்பார்த்துக் காத்திருந்தனர். 

 

ரசிகர்களின் எதிர்பார்ப்புக்கு ஏற்றபடி 2 வது சுற்றில் நீரஜ் சோப்ரா 88.17 மீட்டர் தூரம் ஈட்டி எறிந்து தங்கப்பதக்கத்தை கைப்பற்றினார். இதன் மூலம் 40 ஆண்டுகால வரலாற்றில் உலக தடகள சாம்பியன்ஷிப் தொடரில் தங்கம் வென்ற முதல் இந்தியர் என்ற சாதனையையும் நீரஜ் சோப்ரா படைத்துள்ளார். அவரைத் தொடர்ந்து, பாகிஸ்தான் வீரர் அர்ஷத் நதீம் 87.82 மீட்டர் தூரம் ஈட்டியை எறிந்து 2வது இடத்தை கைப்பற்றினார். மற்ற இந்திய வீரர்களான கிஷோர் ஜெனா 84.77 மீட்டர் தூரம் ஈட்டியை எறிந்து 5வது இடத்தையும், டி.பி.மானு 83.72 மீட்டருடன் 6வது இடத்தையும் பிடித்தனர். 

 

நீரஜ் சோப்ராவின் பதக்கம், உலக தடகளத்தில் இந்தியாவுக்கு கிடைத்த 3வது பதக்கமாக அமைந்துள்ளது. இதற்கு முன்பு 2003 ஆம் ஆண்டில் அஞ்சு ஜார்ஜ் நீளம் தாண்டுதலில் வெண்கலப் பதக்கமும், கடந்த ஆண்டு இதே நீரஜ் சோப்ரா ஈட்டி எறிதலில் வெள்ளிப் பதக்கமும் வென்று இருந்தனர். தங்கம் வென்ற ஹரியானா மாநிலத்தை சேர்ந்த நீரஜ் சோப்ராவுக்கு பல்வேறு தரப்பில் இருந்து பாராட்டுகள் குவிந்து வருகின்றன.

 

முன்னதாக நேற்று முன்தினம் இரவு ஆண்கள் அணிகளுக்கான 4*400 மீட்டர் தொடர் ஓட்டபந்தயத்தின் தகுதி சுற்று நடந்தது. இதில் 17 அணியினர் இரு குழுவாகப் பிரிந்து தகுதி சுற்றில் ஓடினர். முகமது அனாஸ், அமோஜ் ஜேக்கப், முகமது அஜ்மல், ராஜேஷ் ரமேஷ் ஆகியோர் அடங்கிய இந்தியக் குழுவினர் 2 நிமிடம் 59.05 வினாடிகளில் இலக்கை அடைந்து 2வது இடத்தை பிடித்து 8 அணிகளில் ஒன்றாக இறுதி சுற்றில் நுழைந்தனர்.  2 நிமிடம் 58.47 வினாடிகளில் இலக்கை அடைந்து அமெரிக்கா முதல் இடத்தைப் பிடித்தது. இதற்கு முன்பு ஜப்பான் 2 நிமிடம் 59.51 வினாடிகளில் எட்டியதே ஆசிய சாதனையாக இருந்தது. அந்த சாதனையை இந்திய அணியினர் முறியடித்தனர். 

 

 

 

 

சார்ந்த செய்திகள்

 

Next Story

யூரோ கால்பந்து தொடர் 2024 : சாம்பியன் பட்டத்தை வென்றது ஸ்பெயின்! 

Published on 15/07/2024 | Edited on 15/07/2024
Euro Football Series 2024: Spain wins the Champions League

ஜெர்மனி தலைநகர் பெர்லினில் யூரோ கால்பந்து தொடரின் இறுதிப்போட்டி நேற்று (14.07.2024) இரவு நடைபெற்றது. இதில் இங்கிலாந்து - ஸ்பெயின் அணிகள் மோதின. அப்போது ஸ்பெயின் அன்னிக்கு நிக்கோ வில்லியம்ஸ் மைக் ஓயர்சபால் ஆகியோர் தலா ஒரு கோல் அடித்து அசத்தினர். அதே சமயம் இங்கிலாந்து அணியின் நட்சத்திர வீரர்களுக்குள் ஒருவரான பாலிமர் மட்டுமே 1 கோல் அடித்தார். இதன் மூலம் யூரோ கால்பந்து போட்டியின் இறுதிப் போட்டியில் இங்கிலாந்து அணியை 2 - 1 என்ற கோல் கணக்கில்  வீழ்த்தி ஸ்பெயின் அணி சாம்பியன் பட்டம் வென்று சாதனை படைத்துள்ளது.

இந்த வெற்றியின் மூலம் யூரோ கால்பந்து தொடரில் நான்காவது முறையாக சாம்பியன் பட்டத்தைக் கைப்பற்றி ஸ்பெயின் சாதனை படைத்துள்ளதும் குறிப்பிடத்தக்கது. முன்னதாக கடந்த 1964, 2008, 2012 மற்றும் நடப்பு (2024) யூரோ கால்பந்து போட்டியில் ஸ்பெயின் அணி சாம்பியன் பட்டத்தைப் பெற்றுள்ளது அதே சமயம் இங்கிலாந்து அணி இதுவரையில் பெரிய கால்பந்து தொடர்களில் கோப்பையை வெல்ல முடியாத 58 ஆண்டுக்கால சோதனை தொடர்ந்து கொண்டிருக்கிறது.

மேலும் யூரோ கால்பந்து தொடரில் 7 போட்டிகளில் தொடர்ச்சியாக வெற்றி பெற்று சாம்பியன் பட்டத்தையும் வென்ற முதல் அணி என்ற சாதனையையும் ஸ்பெயின் அணி படைத்துள்ளது. இந்த தொடரில் மொத்தம் 15 கோல்களை ஸ்பெயின் அணி பதிவு செய்துள்ளது. இந்த தொடரின் சிறந்த இளம் வீரருக்கான விருதை ஸ்பெயின் அணியின் 16 வயது வீரர் லாமின் யாமல் வென்றார். அதே போன்று தொடரின் சிறந்த வீரருக்கான விருதை ஸ்பெயின் அணியில் ரோட்ரி வென்றார். 

Next Story

விம்பிள்டன் டென்னிஸ்; சாம்பியன் பட்டம் வென்றார் அல்காரஸ்!

Published on 14/07/2024 | Edited on 14/07/2024
Wimbledon Tennis; Algaras wins the championship

விம்பிள்டன் டென்னிஸ் போட்டியில் ஆடவர் ஒற்றையர் பிரிவில் ஸ்பெயின் வீரர் அஸ்காரஸ் சாம்பியன் பட்டம் வென்று அசத்தியுள்ளார்.

விம்பிள்டன் டென்னிஸ் தொடரின் இறுதிப்போட்டி இன்று (14.07.2024) நடைபெற்றது. இதில் செர்பியாவின் ஜோகோவிச் - ஸ்பெயின் நாட்டைச் சேர்ந்த அல்காரஸ் மோதினர். அதிக முறை பட்டம் வென்ற ஜோகோவிச்சை 6 - 2, 6 - 2 மற்றும் 7 - 6 என்ற கணக்கில் வீழ்த்தி இளம் வீரர் அல்காரஸ் சாம்பியன் பட்டத்தை வென்றுள்ளார். விம்பிள்டனில் சாம்பியன் பட்டம் வென்றதன் மூலம் அல்காரஸ் பெறும் நான்காவது கிராண்ட்ஸ்லாம் பட்டம் இதுவாகும்.

விம்பிள்டன் தொடரின் இறுதிப்போட்டியில் ஜோகோவிச்சை வீழ்த்தி ஸ்பெயின் வீரர் அல்காரஸ் சாதனை படைத்துள்ளார். கடந்த ஆண்டு முதல்முறையாக விம்பிள்டன் பட்டத்தை வென்ற அல்காரஸ் தொடர்ந்து 2வது முறையாக வென்று புதிய சாதனை படைத்துள்ளது குறிப்பிடத்தக்கது. அதோடு விம்பிள்டன் பட்டத்தைத் தொடர்ந்து 2வது முறையாக வென்ற 4வது வீரர் என்ற சாதனையையும் அல்காரஸ் படைத்துள்ளார்.