ஐ.பி.எல் பரிசுத்தொகை விவரங்கள்!

அமீரகத்தில் நடைபெற்று வரும் 13-ஆவது ஐ.பி.எல் தொடரின் இறுதிப் போட்டி இன்று நடைபெற இருக்கிறது. மும்பை மற்றும் டெல்லி அணிகள் பலப்பரீட்சை நடத்த இருக்கிற இப்போட்டியில் வெல்லும் அணி 13-ஆவது ஐபிஎல் தொடருக்கான வெற்றி மகுடத்தைச் சூட உள்ளது.

நடப்பு ஐ.பி.எல் தொடரில், மும்பை அணி லீக் போட்டியில், 14 போட்டிகளில் விளையாடி 9 வெற்றிகள், 5 தோல்விகள் கண்டு முதல் அணியாக அடுத்த சுற்றுக்குள் நுழைந்தது. டெல்லி அணி, 14 போட்டிகளில் விளையாடி 8 வெற்றிகள், 6 தோல்விகள் கண்டு, தரவரிசைப்பட்டியலில் இரண்டாம் இடம் பிடித்து அடுத்த சுற்றுக்குள் நுழைந்தது.

மும்பை மற்றும் டெல்லி அணிகள் மோதிய முதல் தகுதிச்சுற்றில் வென்ற மும்பை அணி நேரடியாக, இறுதிப் போட்டிக்குள் நுழைந்தது. அதில், தோல்விகண்ட டெல்லி அணி, வெளியேற்றும் சுற்றில் வென்ற ஹைதராபாத் அணியுடன் இரண்டாம் தகுதிச்சுற்றில் மோதி, அதில் வெற்றி கண்டு இறுதிப்போட்டிக்குள் நுழைந்தது.

இன்றைய போட்டியில், வென்று சாம்பியன் பட்டம் வெல்லும் அணிக்கு, 10 கோடி ரூபாய் பரிசாக வழங்கப்படும். இரண்டாம் இடம் பிடிக்கும் அணிக்கு 6.25 கோடி ரூபாய் பரிசாக வழங்கப்படும். பிளே ஆஃப் சுற்றில் தோல்வியடைந்த பெங்களூரு மற்றும் ஹைதராபாத் அணிகளுக்கு தலா 4.5 கோடி ரூபாய் பரிசாக வழங்கப்படும்.

கரோனா நெருக்கடி காரணமாக, ரசிகர்களின்றி போட்டி நடைபெறுவது, விளம்பர ஒப்பந்தங்களில் குறைவான வருவாய் உள்ளிட்ட சில காரணங்களால்,இந்தாண்டு பரிசுத்தொகையானது பாதியாகக் குறைக்கப்பட்டுள்ளது குறிப்பிடத்தக்கது.