Skip to main content

இந்திய சுழலில் சரிந்த வங்கதேசம்; இந்தியா அபார வெற்றி

Published on 18/12/2022 | Edited on 18/12/2022

 

India won the first Test match against Bangladesh

 

வங்கதேசம் சென்றுள்ள இந்திய அணி மூன்று ஒருநாள் போட்டிகள் கொண்ட தொடர் மற்றும் இரண்டு டெஸ்ட் போட்டிகள் கொண்ட தொடரில் விளையாடி வருகிறது. ஒருநாள் போட்டித்தொடரை வங்கதேச அணி 2-1 என்ற கணக்கில் கைப்பற்றியுள்ள நிலையில் 2 டெஸ்ட் போட்டிகள் கொண்ட தொடரில் முதல் டெஸ்ட் சட்டோகிராமில் நடைபெற்றது.

 

இதில் டாஸ் வென்ற இந்திய அணி பேட்டிங் தேர்வு செய்தது. முதல் இன்னிங்ஸ் முடிவில் அனைத்து விக்கெட்களையும் இழந்து 404 ரன்களை இந்திய அணி குவித்தது. அதிகபட்சமாக புஜாரா 90 ரன்களையும் ஸ்ரேயாஸ் 86 ரன்களையும் எடுத்தனர்.

 

இதன்பின் களமிறங்கிய வங்கதேச அணி தனது முதல் இன்னிங்ஸில் மொத்தமாகவே 150 ரன்களை மட்டுமே சேர்த்தது. இந்திய அணியின் குல்தீப் யாதவ் 5 விக்கெட்களை வீழ்த்தினார். 

 

இதன்பின் களம் கண்ட இந்திய அணி இரண்டாவது இன்னிங்ஸில் 258 ரன்களுடன் டிக்ளேர் செய்தது. கிட்டத்தட்ட 52 இன்னிங்ஸ்களுக்கு பிறகு புஜாரா சதமடித்ததும் சுப்மன் கில் சதமடித்ததும் குறிப்பிடத்தக்கது.

 

இதன்பின் 513 ரன்களை இலக்காகக் கொண்டு தனது இரண்டாவது இன்னிங்ஸை துவங்கிய வங்கதேச அணி மூன்றாம் நாள் முடிவில் விக்கெட் இழப்பின்றி 42 ரன்களை எடுத்திருந்தது. இந்நிலையில் நேற்று துவங்கிய நான்காம் நாள் ஆட்டத்தில் வங்கதேச துவக்க ஆட்டக்காரர்கள் சிறப்பான ஆட்டத்தை வெளிப்படுத்தினர். ஷாண்டோ 67 ரன்களில் வெளியேற ஜாகீர் ஹாசன் 100 ரன்களை அடித்து அஸ்வின் பந்துவீச்சில் அவுட்டானார். பின் வந்த வீரர்கள் சொற்ப ரன்களில் வெளியேற முஷ்தபிஷுர் ரஹ்மான் 23 ரன்கள் எடுத்து ஆறுதல் அளித்தார். நான்காம் நாள் ஆட்ட முடிவில் வங்கதேச அணி 272 ரன்களுக்கு 6 விக்கெட்களை இழந்திருந்தது. 

 

இந்நிலையில் இன்று துவங்கிய 5 ஆம் நாள் ஆட்டத்தில் வங்கதேச அணி வேகமாக விக்கெட்களை பறிகொடுத்தது. நிலைத்து நின்று ஆடிய கேப்டன் ஷாகிப் அல் ஹசன் மட்டும் 84 ரன்களை எடுத்திருந்தார். இறுதியில் வங்கதேச அணி 324 ரன்களுக்கு அனைத்து விக்கெட்களையும் இழந்தது. இந்திய அணி 188 ரன்கள் வித்தியாசத்தில் அபார வெற்றி பெற்றது. இரண்டாவது இன்னிங்ஸில் அக்ஸர் படேல் 4 விக்கெட்களையும் குல்தீப் யாதவ் 3 விக்கெட்களையும் எடுத்தனர். ஆட்டநாயகனாக குல்தீப் யாதவ் தேர்வு செய்யப்பட்டார். அவர் இரு இன்னிங்ஸ்களையும் சேர்த்து மொத்தமாக 8 விக்கெட்களையும் முதல் இன்னிங்ஸில் 40 ரன்களையும் எடுத்தார் என்பது குறிப்பிடத்தக்கது.

 

 

 

Next Story

வங்காள தேச எம்.பி கொலை வழக்கு; விசாரணையில் வெளிவந்த திடுக்கிடும் தகவல்!

Published on 24/05/2024 | Edited on 24/05/2024
Shocking information revealed in the investigation on  Bangladesh MP case

வங்காள தேச நாட்டில் ஷேக் ஆளும் அவாமி லீக் ஆட்சி ந கட்சியின் எம்.பியாக பொறுப்பு வகித்து வந்தவர் அன்வருல் அசிம். இவர், கடந்த 12ஆம் தேதி மருத்துவ சிகிச்சைகாகக் கொல்கத்தாவுக்கு வந்து, பாராநகர் பகுதியில் தனது நண்பர் வீட்டில் தங்கியிருந்தார். இதனையடுத்து, அடுத்த நாள் வெளியே சென்ற அன்வருல் அசிமி பின்னர் வீடு திரும்பவில்லை. இது குறித்து அசிமின் நண்பர், அவரின் செல்போன் எண்ணை தொடர்புகொண்டு அழைத்த போது எந்தவித பதிலும் வரவில்லை. இதில் அதிர்ச்சியடைந்த அவரது நண்பர், இந்த சம்பவம் குறித்து போலீசாரிடம் புகார் அளித்தார். மேலும், இந்த சம்பவம் குறித்து வங்காளதேச தூதரகம் போலீசில் புகார் அளித்திருந்தது. அதன்படி, வங்காள தேச எம்.பி அன்வருல் அசிம்மை கண்டுபிடிக்க போலீசார் தீவிர வேட்டையில் இறங்கி வந்தனர். இந்த நிலையில், கொல்கத்தா நியூ டவுன் பகுதியில் அன்வருல் அசிம் சடலமாக மீட்கப்பட்டார். 

இந்த சம்பவம் தொடர்பாக வங்காளதேச உள்துறை அமைச்சர் அசாதுஸ்மான் கான் கூறுகையில், ‘இதுவரை, சம்பந்தப்பட்ட கொலையாளிகள் அனைவரும் வங்கதேசத்தை சேர்ந்தவர்கள் என்று தெரிய வந்துள்ளது. இது திட்டமிட்ட கொலை. இதுவரை வங்கதேசத்தில் மூன்று பேர் கைது செய்யப்பட்டுள்ளனர். இந்த சம்பவத்தில் இந்தியர் எவருக்கும் தொடர்பு இல்லாததால், இந்தியாவுடனான உறவில் மோசமடையும் வகையில் எதுவும் இங்கு நடக்கவில்லை’ என்றார். 

இந்த கொலை சம்பவம் தொடர்பாக மேற்கு வங்க போலீசாருடன், வங்காளதேஷ் போலீசார் இணைந்து விசாரணை நடத்தி வருகின்றனர். இந்த விசாரணையில் பல திடுக்கிடும் தகவல் கிடைத்ததாக போலீசார் தெரிவிக்கின்றனர். இது குறித்து சி.ஐ.டி போலீஸ் ஐ.ஜி. அகிலேஷ் சதுர்வேதி கூறுகையில், ‘இது திட்டமிடப்பட்ட கொலை. பங்களாதேஷ் வம்சாவளியைச் சேர்ந்த அமெரிக்க குடிமகன் அக்தருஸ்ஸாமான், அன்வருல் அசிமை கொலை செய்வதற்காக அவர் ரூ.5 கோடி கொடுத்திருக்கிறார். கொலையாளிகள், அசிம்மின் கழுத்தை அறுத்து கொலை செய்து, உடலை துண்டுத்துண்டாக வெட்டி பிளாஸ்டிக் கவர்களில் கட்டி வைத்து பல இடங்களில் வீசி எறிந்திருக்கலாம். 

இதனையடுத்து, சம்பந்தப்பட்ட குடியிருப்பில் உள்ள சி.சி.டி.வி கேமரா காட்சிகளை ஆய்வு செய்த போது, அசிமுடன் ஒரு பெண் உட்பட அடையாளம் தெரியாத 2 ஆண்கள் என மூன்று பேர் வருவதைக் காட்டுகிறது. அடுத்த சில நாட்களில் அவருடன் வந்தவர்கள் வெவ்வேறு தேதிகளில் வளாகத்தை விட்டு வெளியேறுவதைக் கண்டாலும் அசிம் வெளியே வரவே இல்லை. அசிம், சி.சி.டி.வி காட்சியில் தோன்றிய அந்தப் பெண்ணால் ஈர்க்கப்பட்டதாகத் தெரிகிறது. அவர் குடியிருப்புக்கு சென்ற உடனேயே அவர் கொலை செய்யப்பட்டிருக்கலாம் என நாங்கள் சந்தேகிக்கிறோம். இந்தக் கொலையைச் செய்த ஒருவரான ஹவ்ல்தாரையும், கைது செய்து விசாரணை நடத்தி வருகிறோம்’ எனத் தெரிவித்ததாகக் கூறப்படுகிறது.  

Next Story

இந்தியாவில் மாயமான வங்கதேச எம்.பி சடலமாக மீட்பு!

Published on 22/05/2024 | Edited on 22/05/2024
Mysterious Bangladeshi MP recovered in India

வங்காள தேச நாட்டில் ஷேக் ஹசீனா தலைமையில் அவாமி லீக் ஆட்சி நடைபெற்று வருகிறது. இந்த கட்சியின் எம்.பியாக பொறுப்பு வகித்து வருபவர் அன்வருல் அசிம். 

இந்த நிலையில், அன்வருல் அசிம் கடந்த 12ஆம் தேதி மருத்துவ சிகிச்சைக்காக கொல்கத்தாவுக்கு வந்து, பாராநகர் பகுதியில் தனது நண்பர் வீட்டில் தங்கியுள்ளார். இதனையடுத்து, அடுத்த நாள் வெளியே சென்ற அன்வருல் அசிமி பின்னர் வீடு திரும்பவில்லை. இது குறித்து அசிமின் நண்பர், அவரின் செல்போன் எண்ணை தொடர்புகொண்டு அழைத்துள்ளார். ஆனால், எந்தவித பதிலும் வராததால், அதிர்ச்சியடைந்த அவரது நண்பர், இந்த சம்பவம் குறித்து போலீசாரிடம் புகார் அளித்துள்ளார். 

மேலும், இந்த சம்பவம் குறித்து வங்காளதேச தூதரகம் போலீசில் புகார் அளித்திருந்தது. அதன்படி, வங்காள தேச எம்.பி அன்வருல் அசிம்மை கண்டுபிடிக்க போலீசார் தீவிர வேட்டையில் இறங்கி வந்தனர். இந்த நிலையில், கொல்கத்தா நியூ டவுன் பகுதியில் அன்வருல் அசிம் சடலமாக மீட்கப்பட்டார். 

இந்த சம்பவம் குறித்து போலீசார் தெரிவிக்கையில், ‘நாங்கள் பலரை விசாரித்து, விரிவான சிசிடிவி காட்சிகளை ஆய்வு செய்துள்ளோம், அதன் மூலம்தான் அவர் கொலை செய்யப்பட்டதை உறுதிப்படுத்த முடியும்’ எனக் கூறுகின்றனர். மேலும், இது தொடர்பாக வங்காளதேச உள்துறை அமைச்சர் அசாதுஸ்மான் கான் கூறுகையில், ‘இதுவரை, சம்பந்தப்பட்ட கொலையாளிகள் அனைவரும் வங்கதேசத்தை சேர்ந்தவர்கள் என்று தெரிய வந்துள்ளது. இது திட்டமிட்ட கொலை. இதுவரை வங்கதேசத்தில் மூன்று பேர் கைது செய்யப்பட்டுள்ளனர். இந்த சம்பவத்தில் இந்தியர் எவருக்கும் தொடர்பு இல்லாததால், இந்தியாவுடனான உறவில் மோசமடையும் வகையில் எதுவும் இங்கு நடக்கவில்லை’ என்றார்.