Skip to main content

வெற்றி பயணத்தை தொடருமா இந்திய அணி?

Published on 13/06/2019 | Edited on 13/06/2019


இங்கிலாந்தில் நடந்து வரும் உலக கோப்பை கிரிக்கெட் திருவிழாவில், 15-வது நாளான இன்று மாலை 03.00 நாட்டிங்காமில் நடைபெறும் 18-வது லீக் ஆட்டத்தில் முன்னாள் சாம்பியனான இந்திய அணி, நியூசிலாந்தை சந்திக்கிறது. இந்திய அணி தனது முதல் லீக் ஆட்டத்தில் 6 விக்கெட் வித்தியாசத்தில் தென்ஆப்பிரிக்காவையும், அடுத்த ஆட்டத்தில் 36 ரன்கள் வித்தியாசத்தில் ஆஸ்திரேலியாவையும் வீழ்த்தி வலுவான நிலையில் உள்ளது. உலக கோப்பை போட்டிகளில் விளையாடிய இரு ஆட்டங்களிலும் இந்திய அணி வெற்றி பெற்றுள்ளது. 

 

 

ICC WORLD CUP 2019 TODAY 15 LEAGUE MATCH INDIA VS NEW ZEALAND AT ENGLAND

 

 

ஆஸ்திரேலியாவுக்கு எதிரான ஆட்டத்தில் சதம் அடித்த இந்திய தொடக்க ஆட்டக்காரர் ஷிகர் தவான், வேகப்பந்து வீச்சாளர் கம்மின்ஸ் வீசிய பவுன்சர் பந்து தாக்கியதில் இடது கை பெருவிரலில் காயம் அடைந்தார். லேசான எலும்பு முறிவு ஏற்பட்டு இருப்பதால், அவர் இந்த ஆட்டம் மட்டுமின்றி அடுத்த சில போட்டிகளிலும் பங்கேற்க மாட்டார் என பிசிசிஐ தெரிவித்துள்ளது. இது இந்திய அணிக்கு பின்னடைவாக பார்க்கப்படுகிறது. ஷிகர் தவான் இல்லாததால் தொடக்க ஆட்டக்காரர்களாக லோகேஷ் ராகுல், ரோகித் சர்மாவுடன் இணைந்து களம் இறங்குகிறார்கள் என தகவல் வெளியாகியுள்ளது. லோகேஷ் ராகுல் ஆடிய 4-வது வரிசையில் தமிழகத்தை சேர்ந்த விஜய் சங்கர் அல்லது தினேஷ் கார்த்திக் ஆகியோரில் ஒருவர் களம் இறங்கக்கூடும்.

 

 

ICC WORLD CUP 2019 TODAY 15 LEAGUE MATCH INDIA VS NEW ZEALAND AT ENGLAND

 

 

இருப்பினும் விஜய் சங்கர் ஆல்-ரவுண்டர் என்பதால் அவருக்கு முன்னுரிமை அளிக்க வாய்ப்பு இருப்பதாக இந்திய அணியின் உதவி பயிற்சியாளர் சஞ்சய் பாங்கர் சூசகமாக தெரிவித்துள்ளார். ஆடுகளத்தின் தன்மையை பொறுத்து இந்த ஆட்டத்தில் வேகப்பந்து வீச்சாளர் முகமது ஷமி இடம் பெற வாய்ப்புள்ளது. அவர் சேர்க்கப்பட்டால் குல்தீப் யாதவுக்கு இடம் கிடைக்காது என்பது குறிப்பிடத்க்கது. இந்திய கேப்டன் விராட் கோலி சாதனையின் விளிம்பில் இருக்கிறார். அவர் இந்த ஆட்டத்தில் 57 ரன்கள் எடுத்தால் ஒரு நாள் போட்டியில் அதிவேகமாக 11 ஆயிரம் ரன்களை எட்டிய வீரர் என்ற பெருமையை பெறுவார். மொத்தத்தில் இந்திய அணி ‘ஹாட்ரிக்’ வெற்றியை பெறுமா? என்று ரசிகர்கள் ஆவலுடன் எதிர்நோக்கிக்காத்துக் கொண்டிருக்கிறார்கள்.

 

 

ICC WORLD CUP 2019 TODAY 15 LEAGUE MATCH INDIA VS NEW ZEALAND AT ENGLAND

 

 

நாட்டிங்காமில் இந்த வாரம் முழுவதுமே பலத்த மழை பெய்ய வாய்ப்பு இருப்பதாக அந்நாட்டு வானிலை ஆய்வு மையம் அறிவித்துள்ளது. இன்று 50 சதவீதம் மழை பெய்ய வாய்ப்பு இருப்பதாக கணிக்கப்பட்டுள்ளது. இதனால் இந்த ஆட்டம் குறைந்த ஓவர் கொண்டதாக மாற்றப்படலாம் என கூறப்படுகிறது. இருப்பினும் நாட்டிங்காமில் ட்ரெண்ட் பிரிட்ஜ் மைதானம் பேட்டிங்குக்கு சாதகமாகவே தான் இருக்கும் என்பது குறிப்பிடத்தக்கது. இந்திய அணியும், நியூசிலாந்து அணியும் பல ஆண்டுகளுக்கு பிறகு விளையாட உள்ளதால் இரு நாட்டு ரசிகர்களும் மிகுந்த எதிர்பார்ப்புடன் உள்ளன.

 


 

சார்ந்த செய்திகள்

Next Story

சாதனை வெற்றியுடன் டெஸ்ட் தொடரை கைப்பற்றியது இந்தியா!

Published on 06/12/2021 | Edited on 06/12/2021

 

india vs newzealand

 

இந்தியா - நியூசிலாந்துக்கு இடையே நடைபெற்ற முதலாவது டெஸ்ட் போட்டி ட்ராவில் முடிவடைந்த நிலையில், இரு அணிகளுக்கும் இடையேயான இரண்டாவது மற்றும் கடைசி டெஸ்ட், மும்பை வான்கடே மைதானத்தில் கடந்த மூன்றாம் தேதி தொடங்கி நடைபெற்றுவந்தது.

 

இந்தப் போட்டியில் முதலில் பேட்டிங் செய்த இந்திய அணி, 325 ரன்கள் எடுத்தது. இதனைத்தொடர்ந்து களமிறங்கிய நியூசிலாந்து அணி, 62 ரன்களுக்கு சுருண்டது. இதன்பின்னர் ஃபாலோ ஆன் தர வாய்ப்பிருந்தும் மீண்டும் பேட்டிங் செய்த இந்திய அணி, 276 ரன்கள் எடுத்து டிக்ளர் செய்தது.

 

இதன் காரணமாக 540 ரன்கள் எடுத்தால் வெற்றி என்ற இமாலய இலக்கோடு களமிறங்கிய நியூசிலாந்து அணி, நேற்றைய (05.12.2021) ஆட்ட நேர முடிவில் 140 ரன்களுக்கு ஐந்து விக்கெட்டுகளை இழந்திருந்தது. இந்தநிலையில், இன்று ஆட்டம் தொடங்கியதிலிருந்தே நியூசிலாந்து பேட்ஸ்மேன்கள் அடுத்தடுத்து ஆட்டமிழந்தனர். இறுதியில் நியூசிலாந்து அணி, 167 ரன்களுக்கு ஆட்டமிழந்தது. இதன்மூலம், இந்தியா 372 ரன்கள் வித்தியாசத்தில் வெற்றி பெற்றுள்ளது.

 

ரன்களின் அடிப்படையில் இந்திய அணியின் மிகப்பெரிய வெற்றி இதுவாகும். இந்த வெற்றியின் மூலம் இரண்டு போட்டிகள் கொண்ட டெஸ்ட் தொடரை இந்திய அணி 1-0 என்ற கணக்கில் கைப்பற்றியுள்ளது. இது இந்திய அணி, சொந்த மண்ணில் தொடர்ச்சியாக பெறும் 14வது டெஸ்ட் தொடர் வெற்றியாகும் என்பது குறிப்பிடத்தக்கது.

 

 

Next Story

இரட்டை இலக்கத்தை தொட்ட இரண்டே வீரர்கள்... 70 ரன்களை கூட தொடாத நியூசிலாந்து! 

Published on 04/12/2021 | Edited on 04/12/2021

 

india vs newzealand

 

இந்தியா - நியூசிலாந்துக்கு இடையே நடைபெற்ற முதலாவது டெஸ்ட் போட்டி ட்ராவில் முடிவடைந்த நிலையில், இரு அணிகளுக்கும் இடையேயான இரண்டாவது மற்றும் கடைசி டெஸ்ட், மும்பை வான்கடே மைதானத்தில் நேற்று (03.12.2021) தொடங்கி நடைபெற்றுவருகிறது.

 

இந்தப் போட்டியில் டாஸ் வென்று பேட்டிங் செய்த இந்திய அணி 325 ரன்களுக்கு ஆட்டமிழந்துள்ளது. இந்திய அணி சார்பில் மயங்க் அகர்வால் 150 ரன்களும், சுப்மன் கில் 44 ரன்களும், அக்ஸர் படேல் 52 ரன்களும் எடுத்து ஆட்டமிழந்தனர். இந்தப் போட்டியில் இந்திய அணியின் அனைத்து விக்கெட்டுகளையும் நியூசிலாந்து அணியின் அஜாஸ் படேல் வீழ்த்தி வரலாறு படைத்தார். இதன்மூலம் அவர், ஒரே இன்னிங்சில் 10 விக்கெட்டுகளையும் வீழ்த்திய மூன்றாவது பந்துவீச்சாளர் என்ற பெருமையைப் பெற்றுள்ளார்.

 

இதனைத்தொடர்ந்து இரண்டாவது இன்னிங்சை தொடங்கிய நியூசிலாந்து அணி, அடுத்தடுத்து விக்கெட்டுகளைப் பறிகொடுத்து 62 ரன்களுக்கு ஆட்டமிழந்தது. அந்த அணியில் டாம் லாதமும், ஜேமிசனும் மட்டுமே இரட்டை இலக்க ரன்களை எடுத்தனர்.

 

நியூசிலாந்து எடுத்த 62 ரன்கள், இந்தியாவில் நடைபெற்ற போட்டியில் ஒரு இன்னிங்சில் எடுக்கப்பட்ட குறைந்தபட்ச ஸ்கோராக பதிவாகியுள்ளது. மேலும், இந்தியாவுக்கு எதிராக ஒரு அணி ஒரு இன்னிங்சில் எடுத்த குறைந்தபட்ச ஸ்கோராகவும் இது பதிவாகியுள்ளது. இதனைத்தொடர்ந்து ஃபாலோ ஆன் தர வாய்ப்பிருந்தும் இந்திய அணி மீண்டும் பேட்டிங் செய்ய களமிறங்கியுள்ளது. ஃபீல்டிங்கின்போது காயமடைந்த சுப்மன் கில்லுக்கு பதிலாக புஜாரா, மயங்க் அகர்வாலோடு இணைந்து களமிறங்கியுள்ளார்.