Skip to main content

வெளுத்து வாங்கும் சகோதரர்கள் vs வெளியேற்றப்படும் சகோதரர்கள் - இந்திய கிரிக்கெட்!  

Published on 26/02/2018 | Edited on 26/02/2018

2006ஆம் ஆண்டு நடந்த பாகிஸ்தானுக்கு எதிரான டெஸ்ட் போட்டியில் ஹாட்ரிக் விக்கெட் எடுத்தபோது, 'இந்தியாவுக்கு  அடுத்த  கபில்தேவ்  கிடைச்சுட்டாரு'னு எல்லோரும்  பேசினார்கள். பௌலிங்  மட்டும்  இல்லை பேட்டிங்கும் நல்லா பண்ணுவேனென்று  சில போட்டிகளில் ரன் அடிச்சும் காண்பித்தார் இர்பான் பதான். அவரது பேட்டிங் பார்த்து சில போட்டிகளில் தொடக்க ஆட்டக்காரராகவும் இறக்கி விட்டார்கள். அடைமழை போல இனி அடுத்த சில வருடங்கள் நிரந்தரமாக சாதிப்பாரென்று  பார்த்தால்,  பொசு பொசுவென தூறல் போல நின்று விட்டார். இவர் தான் இப்படியென்று பார்த்தால் இவரது அண்ணண் யூசுப் பதானும் ஆயிரம் வாலா பட்டாசு மாதிரி ஆரம்பத்தில்  சிக்ஸராக  பறக்க விட்டு பின்னர் ஓய்ந்துவிட்டார்.
 

pathan brothers


இர்பான் பதான் 2007ஆம் வருடம் நடந்த T20 தொடரின் இறுதி ஆட்டத்தில் சிறப்பாக செயல்பட்டு, இந்தியா கோப்பையை வெல்ல அடித்தளம் அமைத்து கொடுத்தார், ஆட்டநாயகன் விருதும் வென்றார். 2008 ஆம் வருடம் நடந்த ஆஸ்திரேலியாவிற்கு எதிரான 3வது டெஸ்ட் போட்டியில்  சிறந்த பேட்டிங் மற்றும் பௌலிங் செய்து ஆட்டநாயகன் விருதும் பெற்றார். இவரது சிறப்பான ஆட்டம் நீண்ட நாட்களுக்குப் பிறகு ஆஸ்திரேலிய மண்ணில்  டெஸ்ட் போட்டியில் இந்தியா வெல்ல உதவியது.

2007 -T20  உலககோப்பை , 2011- 50 ஓவர்  உலககோப்பை, 2013 சாம்பியன்ஸ் கோப்பை என்று வென்ற அணிகளில் இடம்பிடித்து பெயரெடுத்த பதான் சகோதரர்கள் தற்போது விளையாட இடம் கிடைக்காமல் காணாமல் போய்விட்டனர். இந்திய அணியில்விளையாடுவதைத் தாண்டி பரோடா அணியிலும் கூட  நீடிக்கமுடியாமல் கேப்டன் பதவி பறிக்கப்பட்டு, பின்பு அணியில் இருந்து வெளியேறி, 2017ஆம் ஆண்டு ரஞ்சி  சீசனை இர்பான் பதான் விளையாடவே இல்லை. அடுத்த வர உள்ள 2018 சீசனில் ஜம்மு அணிக்காக விளையாட உள்ளார். ஜம்மு அணிக்கு  இப்போது பயிற்சியாளர் பொறுப்பும் இர்பான் வசம் கொடுக்கப்பட்டுள்ளது. யூசுப் பதானும் உடல்நலக்குறைவால் விளையாடவில்லை. மேலும் தடை செய்யப்பட்ட ஊக்கமருந்தை உட்கொண்டதற்காக விளையாட்டிலுருந்தும்  ஐந்து மாதம் தடை செய்யப்பட்டார். சுவாசக் கோளாறு சிகிச்சையின் போது கொடுத்த மருந்தில் தெரியாமல் உட்கொண்டதாக ஒத்துக்கொண்டார். இதன் எதிரொலி ஐபிஎல் ஏலத்தில் எதிரொலித்தது, ஒரு காலத்தில் நட்சத்திர வீரராக இருந்த இர்பான் பதான் விலைபோகவில்லை. யூசுப் பதான் சற்று ஆறுதலாக சன் ரைசர்ஸ் அணியால் 1.90 கோடிக்கும் ஏலம் எடுக்கப்பட்டார்.

 

pandya brothers


பதான் சகோதரர்கள் இப்படி சரிவில் இருக்க மறுபக்கம் பாண்டியா சகோதரர்கள் கலக்கி வருகின்றனர். ஹர்டிக் பாண்டியா மற்றும் குர்னால் பாண்டியா இருவரும் ஐபிஎல் ஏலத்தில் கூட்டாக 20 கோடிக்கு ரூபாய்க்கு விலை போயுள்ளனர். இது வரையில் பெரிய சாதனைகள் செய்யாவிட்டாலும்  ஹர்டிக் பாண்டியாவின் சிக்ஸர் அடிக்கும் திறமையும் பௌலிங் செய்வார் என்ற நம்பிக்கையும் அவரை இந்த நிலைக்குக் கொண்டு சென்றுள்ளது. அதனாலேயே அவரை அடுத்த கபில் தேவ் என்று  ஒரு கூட்டம் கூற ஆரம்பித்துவிட்டது. 2017ஆம் ஆண்டு  ஐபிஎல் தொடரில் சிறப்பான பேட்டிங் செய்து அனைவரின் கவனத்தையும் ஈர்த்துள்ளார்.  250 ரன்கள் தான் என்றாலும் அதை வெவ்வேறு சூழ்நிலையில் 160 பந்துகளில் அடித்தார் என்பது தான் சிறப்பு. கூடவே 4 ஓவர்களை வீசக்கூடிய வீரர். குர்னால் பாண்டியாவும் சரிசமமான ஆட்டத்தைத் தான் ஆடியிருந்தார் என்றாலும் பந்துவீச்சில் அவர் ஒரு சுழல் பந்து வீச்சாளர். இந்திய அணிக்கு தேவைப்படுபவர் வேகப்பந்து வீசக்கூடிய ஆல்ரவுண்டர் என்பதால் அதிர்ஷ்டம் தம்பிக்கு அடித்தது. சர்வதேச போட்டிகளில் அவ்வளவாக விளையாடவில்லை என்றாலும், ஐபிஎல் நல்ல தளமாக அமைந்து விட்டது. இந்திய அணி மிகவும் எதிர்பார்க்கும் ஆல்ரவுண்டரை ஹர்டிக் பாண்டியாவிடம் தேடுகிறது. பதில் இனி வரும் போட்டிகளில் தெரியும்.

 

pandya brothers celebrating


'உங்களில் யார் அடுத்த பிரபுதேவா?' மாதிரி, 'உங்களில் யார் அடுத்த கபில்தேவ்?' என்ற மீடியா மற்றும் ரசிகர்களின் தேடலில் சிக்கி எத்தனை பேர் காணாமல் போகப்போறாங்களோ? பாண்டியா சகோதரர்கள் எப்படி இந்த புதிய அழுத்தத்தைத் தாங்கி தங்கள் திறமைகளை முழுமையாக வெளிக்கொண்டுவந்து இந்திய அணிக்கும் தங்கள் ஐபிஎல் அணிக்கும் வெற்றிகளை தேடித்தருவார்கள்  என்று பொறுத்து இருந்து தான் பார்க்கவேண்டும். பாண்டியா சகோதரர்களுக்கு சாதிப்பதற்கு வயதும் திறமையும் இருக்கிறது. வாழ்க்கை வட்டத்தில் இப்போது உள்ள உச்சத்தை தலைக்கேற்றாமல் சரியாக பயன்படுத்திக் கொண்டால்  இன்னும்  சிறப்பாக மிளிரலாம். பல உயரங்களைத் தொடலாம். பதான் சகோதரர்கள் 33 வயதை கடந்திருந்தாலும், மீண்டும் தங்களை சிறப்பாய் உலகிற்கு காட்டிக்கொள்ள, இன்னும் அவகாசம் உள்ளது. இப்போதுள்ள தடைகளைத் தாண்டி மீண்டு இன்னும் உள்ள சில வருடங்களை சிறப்பாய் விளையாடி விடைபெற வாழ்த்துவோம்.

Next Story

சாதனை படைத்த அஸ்வின்; “சென்னையின் மைந்தன்” - தமிழக முதல்வர் வாழ்த்து

Published on 16/02/2024 | Edited on 16/02/2024
Greetings from the Chief Minister of Tamil Nadu Accomplished by cricket player Ashwin

இங்கிலாந்து கிரிக்கெட் அணி இந்தியாவில் சுற்றுப்பயணம் மேற்கொண்டு 5 டெஸ்ட் போட்டிகள் கொண்ட தொடரில் விளையாடி வருகிறது. இதில், முதல் இரு டெஸ்ட் போட்டிகளிலும், இந்திய அணியும் இங்கிலாந்து அணியும் தலா ஒரு வெற்றியைப் பதிவு செய்தன. இதனையடுத்து, நேற்று (15ம் தேதி) குஜராத் மாநிலம், ராஜ்கோட் மைதானத்தில் மூன்றாவது டெஸ்ட் போட்டி துவங்கியது. இந்த போட்டியின் முதல் இன்னிங்ஸில் இங்கிலாந்து வீரர் ஜாக் கிராலியின் விக்கெட்டை இந்திய அணி வீரர் அஸ்வின் வீழ்த்தினார். 

இந்த விக்கெட்டை வீழ்த்தியதன் மூலம் டெஸ்ட் போட்டியில் 500 விக்கெட்களை வீழ்த்திய வீரர் என்ற வரலாற்றுச் சாதனையை அஸ்வின் படைத்துள்ளார். 87 இன்னிங்ஸ்களில் ஸ்ரீலங்கா வீரர் முரளிதரன் 500 விக்கெட்களை வீழ்த்தி சாதனை படைத்த நிலையில், தற்போது 98 இன்னிங்ஸ்களில் இந்திய வீரர் அஸ்வின் 500 விக்கெட்களை வீழ்த்தியுள்ளார். அஸ்வினின் இந்த சாதனைக்கு பலரும் தங்கள் வாழ்த்துகளைத் தெரிவித்து வருகின்றனர். 

அந்த வகையில் தமிழக முதல்வர் மு.க. ஸ்டாலின், இந்திய கிரிக்கெட் அணி வீரர் அஸ்வினுக்கு வாழ்த்துகளைத் தெரிவித்துள்ளார். இது குறித்து முதல்வர் மு.க. ஸ்டாலின் தனது எக்ஸ் (ட்விட்டர்) பக்கத்தில் தெரிவித்துள்ளதாவது, “டெஸ்ட் கிரிக்கெட் வரலாற்றில் தனது 500வது விக்கெட்டை பெற்ற அஸ்வினுக்கு வாழ்த்துகள். சாதனைகளை முறியடித்து கனவுகளை நனவாக்கியவர் சென்னையின் மைந்தன் அஸ்வின். அவரின் பந்துவீச்சில் திறமை, தீர்க்கமான இலக்கு வெளிப்படுகிறது. இது உண்மையான மைல்கல்லைக் குறிக்கிறது. அவரது மாயாஜால பந்துவீச்சு, 500வது விக்கெட்டை கைப்பற்ற உதவியுள்ளது. அவர் மேலும் ஏராளமான விக்கெட்டுகளை வீழ்த்தி வெற்றிகளைக் குவிக்க வாழ்த்துகள்’ என்று குறிப்பிட்டுள்ளார்.

Next Story

எட்டு வருட காத்திருப்புக்கு கிடைத்த வெற்றி; கையிலே ஆகாசமாய் கிடைத்த இந்திய அணி வாய்ப்பு

Published on 14/02/2024 | Edited on 14/02/2024
​  A victory after an eight-year wait; The Indian team got a chance in hand  ​​    ​

ஒரு வீரர் உள்ளூர் போட்டிகளில் 2014இல் ரஞ்சி போட்டிகளில் அறிமுகமாகி 14 சதங்கள், 11 அரை சதங்கள் என உள்ளூர் முதல்தர போட்டிகளில் ரன் மெஷினாக தன்னை மாற்றியுள்ளார். அரை சதங்களைக் காட்டிலும் சதங்களின் எண்ணிக்கை அதிகம். பேட்டிங் சராசரி 69.85ஐ வைத்துள்ளார். சிவப்பு நிற பந்துகளின் ஸ்ட்ரைக் ரேட் 70.48. இவ்வளவு சிறப்பாக விளையாடியும்  எட்டு வருடமாக இந்திய அணியில் இடம் என்பது எட்டாக்கனியாக இருந்தது அந்த இளம் வீரருக்கு. இருந்தும் மனம் தளராத அந்த வீரர் இந்த வருடம் கிடைத்த முதல் தர போட்டி வாய்ப்பிலும் முத்திரை பதிக்கும் அளவு தன்னுடைய பேட்டிங்கை மெருகேற்றி வந்தார்.

2019 - 20 ரஞ்சி சீசன் முதல் இன்னும் சிறப்பாக விளையாடத் தொடங்கினார். இருப்பினும் இந்திய அணியில் தேர்வாகும் வாய்ப்பு தள்ளிக் கொண்டே போனது. காரணம் இவரின் ஃபிட்னஸ் என்று கூறப்பட்டது. ஆனால் அதற்கும் ரோஹித் சராசரி உடலமைப்போடு நன்றாக ஆடும்போது அவரால் ஆட முடியாதா என்று சமூக வலைத்தளங்களில் கேள்விகள் கேட்கப்பட்டு அதிர்வுகள் எழுந்தது. கடந்த ஒரு வருட காலமாக அணிக்கு இந்த வீரர் தேர்வு செய்யப்பட வேண்டும் என்று கிரிக்கெட் விமர்சகர்கள் உட்பட பலரும் கூறி வந்தனர்.

இடைவிடாமல் சிறப்பாக ஆடிய அவர் இங்கிலாந்து முதல் தர அணிக்கு எதிராக முத்தான சதத்தைக் கடந்தார். அதுவும் 100 ஸ்ட்ரைக் ரேட்டில். அதிரடியாக விளையாடி 161 ரன்கள் குவித்தார். அதன் பலனாக தற்போது அந்த இளம் வீரரின் 8 வருட உழைப்புக்கு பதில் கிடைத்துள்ளது. கோலியின் விருப்ப ஓய்வு, ராகுலின் காயம் என பல்வேறு காரணங்கள் சொல்லப்பட்டாலும், தன்னுடைய சிறப்பான ஆட்டத்தால் இந்திய அணிக்கு தேர்வாகி உள்ளார் அந்த வீரர்.

A victory after an eight-year wait; The Indian team got a chance in hand

எட்டு வருடமாக உழைத்த உழைப்புக்கு எட்டாக்கனியாக இருந்த இந்திய அணி வாய்ப்பு தற்போது கிட்டி உள்ளது. ராகுல் இல்லாததால் ஆடும் லெவனில் கண்டிப்பாக வாய்ப்பு கிடைக்கும் என்று எதிர்பார்க்கப்படுகிறது. அந்த வீரர் தான் சர்பிராஸ் கான். கடந்த சில ஆண்டுகளாக யாவரும் வியக்கும் வண்ணம் முதல் தர ரஞ்சி போட்டிகளில் தனது திறமையை நிரூபித்து வருகிறார். ஃபிட்னஸ் காரணமாக புறக்கணிக்கப்படுகிறார் என்று விமர்சனங்கள் எழுந்தாலும், தொடர்ச்சியான தனது சிறப்பான ஆட்டத்தாலும், பொறுமையாலும் தனது இந்திய அணிக்காக ஆடும் கனவை நினைவாக்கியிருக்கிறார்.

வெளிநாடுகளில் வேகப்பந்து வீச்சாளர்களை எதிர்கொள்ள இந்திய பேட்ஸ்மேன்கள் திணறுவார்கள் என்பது போய், வெளிநாடுகளின் சுழற்பந்து வீச்சாளர்களும் தற்போது ஐபிஎல் போட்டிகள் மூலமாக இந்திய பிட்சுகளில் சிறப்பாக விளையாடுகின்றனர். ஆனால், சுழற்பந்தை சிறப்பாக எதிர்கொள்ளும் இந்திய வீரர்களின் எண்ணிக்கை குறைந்து வருகிறது. ஆனால் சர்பிராஸ் கான் அதைப் போக்குவார் என்று நம்பலாம். வேகப்பந்து, சுழற்பந்து என இருவித பவுலர்களையும் சிறப்பாக எதிர்கொள்ளும் திறமை சர்பிராஸ் கானுக்கு உள்ளது. ஒரு சிறந்த டெஸ்ட் பேட்ஸ்மேனுக்கு உள்ள அனைத்து தகுதிகளும் உள்ளதால், இவர் கோலி பொன்று ஒரு சிறப்பான வீரராக உருவாக வாய்ப்புள்ளது என கிரிக்கெட் விமர்சகர்கள் புகழ்ந்து வருகின்றனர்.

சஞ்சு, சர்பிராஸ் கான் என்று வாய்ப்பு அரிதாக கிடைக்கும் வீரர்கள் மத்தியில் இஷான், க்ருனால் போன்ற வீரர்கள் கிடைத்த வாய்ப்பை விட்டுவிட்டு, ரஞ்சி போட்டிகளிலும் ஆட மாட்டேன் என்பது இளம் வீர்களுக்கு அழகல்ல என்று முன்னாள் வீரர்கள் பலரும் விமர்சித்து வருவது குறிப்பிடத்தக்கது.