Skip to main content

இந்திய அணியில் தமிழக வீரருக்கு வாய்ப்பு?

Published on 16/09/2023 | Edited on 16/09/2023

 

 A chance for a Tamil Nadu player in the Indian team?

 

இந்திய அணியின் ஆல்-ரவுண்டர் அக்சர் படேல் காயம் காரணமாக ஆசியக் கோப்பையில் இருந்து வெளியேறியுள்ளார். இதனால் தமிழக வீரருக்கு வாய்ப்பு இருப்பதாகக் கூறப்படுகிறது.

 

இந்தியா, பாகிஸ்தான், இலங்கை, வங்கதேசம், ஆப்கானிஸ்தான், நேபாளம் ஆகிய அணிகள் பங்கேற்கும் ஆசியக் கோப்பை கிரிக்கெட் 2023 தொடர் நடைபெற்று வருகிறது. இதன் சூப்பர் 4 சுற்றின் கடைசி ஆட்டத்தில் நேற்று (15-09-2023) இந்தியா-வங்கதேச அணிகள் மோதின. இதில் இந்திய அணி 6 ரன் வித்தியாசத்தில் தோல்வியைத் தழுவியது. இருந்தாலும் இந்த ஆட்டத்தின் இறுதியில் இந்திய அணியை வெற்றிப் பாதைக்கு அழைத்துச் செல்லும் முனைப்பில் விளையாடிக் கொண்டிருந்தார் அக்சர் படேல். பின்னர், கேட்ச் கொடுத்து ஆட்டம் இழந்தார். இந்நிலையில், நேற்றைய ஆட்டத்தில் அக்சருக்கு தொடைப் பகுதியில் சில உள் காயங்கள் ஏற்பட்டது என்று சொல்லப்படுகிறது. ஆனால், காயத்திற்கான சிகிச்சை பற்றிய எந்த தகவலும் தற்போது வரை பிசிசிஐ சார்பில் வெளியிடப்படவில்லை. அக்சர் படேலின் இந்த வெளியேற்றம் இந்தியா அடுத்த மாதம் எதிர்கொள்ளவுள்ள உலகக் கோப்பையை பாதிக்குமா என்ற கேள்வியும் ரசிகர்களிடம் எழுந்துள்ளது. 

 

நாளை (17-09-2023), இந்தியா-இலங்கை ஆசியக் கோப்பை இறுதிப் போட்டியில் விளையாடவுள்ளது. இந்த ஆட்டம் இந்திய நேரப்படி மதியம் 3.00 மணிக்கு பிரேமதாசா ஸ்டேடியத்தில் நடைபெறும். எனவே, இந்த இறுதிப் போட்டியில் அக்சர் படேல் விளையாட முடியாத சூழல் உள்ளதாகக் கூறப்படுகிறது. அக்சரின் காயம் குறித்து பிசிசிஐ கூறுகையில், "அக்சர் தற்போது பல காயங்களால் அவதிப்பட்டு வருகிறார். அவரின் சுண்டு விரலில் காயம் ஏற்பட்டுள்ளது. மேலும் 'டீப்பாக' பந்து வீசியதால் அவரின் முன்கையிலும் காயம் இருக்கிறது. இதில், மிக முக்கியமாக தொடையில் தசைப்பிடிப்பும் உருவாகியுள்ளது" என்று தெரிவித்துள்ளது.

 

அவருக்குப் பதிலாகத் தமிழக வீரர் வாஷிங்டன் சுந்தர் அணியில் சேர்க்கப்பட உள்ளதாகவும் பிசிசிஐ தரப்பில் தகவல்கள் வெளிவந்தன. மேலும் பிசிசிஐ, வாஷிங்டன் சுந்தரை தொலைப்பேசியில் அழைத்ததாகவும் கூறப்படுகிறது. ஆனால், சுந்தர் சேர்க்கப்பட்டாலும் ப்ளேயிங் 11ல் இடம் பெறுவாரா என்பது சந்தேகம் தான்.

 

23 வயதான சுந்தர், 16 ஒருநாள் போட்டிகளில் விளையாடி 5.05 என்ற எகானமி ரேட்டில் 16 விக்கெட்டுகளை வீழ்த்தியிருக்கிறார். இதனுடன் ஒரு அரை சதத்தை சேர்த்து 233 ரன்கள் குவித்துள்ளார். ஒருவேளை ஆட்டத்தில் இக்கட்டான சூழல் ஏற்பட்டால் அவர் நம்பர் 8இல் பேட் செய்து உதவுவார். அக்சர் படேல் காயத்தில் இருந்து மீண்டு வரவில்லை என்றால் உலகக் கோப்பை அணியில் வாஷிங்டன் சுந்தர் சேர்க்கப்பட வாய்ப்பு உள்ளது. சமீபத்தில் தான் இந்திய அணியின் வேகப்பந்து வீச்சாளர் தமிழ்நாட்டைச் சேர்ந்த நடராஜன், "உலகக் கோப்பை அணியில் ஒரு தமிழர் கூட இல்லை" என வருந்தினார். இந்நிலையில் வாஷிங்டன் சுந்தர் பெயர் அடிபடுவது குறிப்பிடத்தக்கது.

 

 

 

Next Story

குடியாத்தம் கிரிக்கெட் பிரீமியர் லீக்; ‘ஐபிஎல்’க்கு டஃப் கொடுக்கும் ‘ஜிசிபிஎல்’

Published on 24/06/2024 | Edited on 24/06/2024
Just like the IPL, the GCPL is an auction for players

உலக புகழ் பெற்ற ஐபிஎல் கிரிக்கெட் அணிகள்  போல் வேலூர் மாவட்டம் குடியாத்தத்தில், குடியாத்தம் கிரிக்கெட் பிரீமியர் லீக் ( ஜி சி பி எல் ) எனப் பெயரிட்டு கிரிக்கெட் அணிகள் தொடங்கப்பட்டு, 14 அணிகள் ஏலம் எடுக்கப்பட்டு போட்டிகள் நடைபெற்று பரிசுகள் வழங்கப்பட்டது. இறுதி போட்டியில் பல்வேறு துறை பிரபலங்கள் கலந்து கொண்டனர்.

Just like the IPL, the GCPL is an auction for players

இதனிடையே சீசன் 2 போட்டிகளுக்காண அணிகள் வீரர்களை ஏலம் எடுக்கும் நிகழ்ச்சி குடியாத்தம் அருகே உள்ள தனியார் மகளிர் கல்லூரியில் நடைபெற்றது. ஐபிஎல் போட்டிக்கு அணிகள் ஏலம் எடுப்பதைப் போன்று 16 அணிகள் உருவாக்கப்பட்டது. இந்த அணிகளுக்கு வீரர்கள் ஏலம் விடுகின்றனர். இதற்காக வேலூர் மாவட்டத்தைச் சேர்ந்த 350 விளையாட்டு வீரர்கள் பதிவு செய்துள்ளனர். கிரிக்கெட் வீரர்களை தேர்வு செய்ய ஒரு அணிக்கு முப்பதாயிரம் பாயிண்ட்டுகள் வழங்கப்பட்டுள்ள நிலையில் வீரர்கள் தேர்வு செய்யும் நிகழ்ச்சி நடைபெற்றது. 

Just like the IPL, the GCPL is an auction for players

இது குறித்து ஜிசிபிஎல் ஒருங்கிணைப்பாளர் சதிஷ் கூறும் போது,  மாநிலத்தின் கடைக்கோடி நகரமான குடியாத்தம் நகரம் மற்றும் சுற்றுவட்டார கிராமப் பகுதிகளில் இருந்து திறமை வாய்ந்த விளையாட்டு வீரர்களை வெளி உலகத்திற்கு எடுத்துச் செல்லவே இந்த ஜிசிபிஎல் அமைப்பு உருவாக்கப்பட்டது. முதல் சீசனில் நடைபெற்ற விளையாட்டுகளில் பங்கேற்ற சித்து என்ற மாணவன் தற்போது மாநில அளவிலான அண்டர் 19 லீக் போட்டிக்கு தேர்வு ஆகி உள்ளதாகவும் எந்த விதமான வியாபார நோக்கமும் இல்லாமல் கிரிக்கெட் விளையாட்டு வீரர்களின் திறமைகளை வெளி கொள்வதற்காகவே இந்தப் போட்டி நடத்தப்படுவதாகவும் தெரிவித்தார். ஏலம் முடித்து விரைவில் போட்டிகள் தொடங்க உள்ளது.

Next Story

கலைந்த கனவு - பரிதாபமாக உயிரிழந்த சிறுவன்!

Published on 08/05/2024 | Edited on 08/05/2024
 boy who played cricket passed away tragically after being hit by a ball

மகாராஷ்டிர மாநிலம், புனே அடுத்துள்ளது லோஹிகன். இப்பகுதியைச் சேர்ந்தவர் 'ஷம்பு காளிதாஸ் காண்ட்வே' என்ற ஷவுரியா. 11 வயதான இவர், ராமன்பாக் நகரில் உள்ள நியூ இங்கிலீஷ் பள்ளியில் 6 ஆம் வகுப்பு படித்து வந்தார். தற்போது, அவருக்கு தேர்வுகள் முடிந்து கோடை விடுமுறை என்பதால் நண்பர்களுடன் சிறுவன் விடுமுறையைக் கழித்து வந்தார்.

இந்த நிலையில், கடந்த மே 2 ஆம் தேதி சிறுவன் ஷவுரியா லோஹேகான் பகுதியில் தன் நண்பர்களுடன் கிரிக்கெட் விளையாடச் சென்றார். விடுமுறை என்பதால் கூட்டாக கிரிக்கெட் விளையாடச் சென்றவர்கள், டர்ஃப் விக்கெட் ஒன்றை தேர்ந்தெடுத்து குழுவாக சேர்ந்து கிரிக்கெட் விளையாடினர். அப்போது, சிறுவன் ஷவுரியா எதிர்முனையில் நின்ற பேட்டருக்குப் பந்து வீசினார். அந்தப் பந்தை எதிர்கொண்ட பேட்டர் அதை நேராக ஓங்கி அடித்துள்ளார். பந்தானது, பேட்டர் அடித்த வேகத்தில் கண்இமைக்கும் நொடியில் சிறுவன் ஷவுரியாவின் பிறப்புறுப்பைப் பலமாகத் தாக்கியது. இதனால், சிறுவன் வலியால் துடித்துள்ளார். உடனே, பந்தை அடித்த பேட்டர் ரன் எடுக்க பவுலிங் எண்டுக்கு ஓடிய நேரத்தில் வலியால் துடித்த ஷவுரியா, நிலைதடுமாறி மைதானத்திலேயே சுருண்டு விழுந்துள்ளார்.

இதையடுத்து, ஷவுரியா சுருண்டு விழுந்ததைப் பார்த்து பதறிப்போன சக நண்பர்கள் ஷவுரியாவை எழுப்ப முயற்சித்தனர். ஆனால், அவரை எழுப்ப முடியவில்லை. இதனால், செய்வதறியாமல் திகைத்தவர்கள் உடனே அருகில் இந்தப் பெரியவர்களிடம் தகவல் தெரிவித்தனர். அதன்பேரில் அருகிலிருந்தவர்கள் ஓடிவந்து ஷவுரியாவை மீட்டு மருத்துவமனைக்கு அனுப்பிவைத்தனர். ஆனால், அவரை பரிசோதனை செய்த மருத்துவர்கள், ஷவுரியா ஏற்கெனவே உயிரிழந்து விட்டதாக தகவல் தெரிவித்தனர்.

இதைக் கேட்டு அவரது குடும்பத்தினர்களும் நண்பர்களும் அதிர்ச்சி அடைந்தனர். இந்தச் சம்பவம் குறித்து லோஹிகன் காவல் நிலைய போலீசார் வழக்குப்பதிவு செய்து விசாரணை  நடத்தி வருகின்றனர். கிரிக்கெட் விளையாடிய சிறுவன் திடீரென பந்து தாக்கி உயரிழந்தாக கூறப்படும் நிலையில், விபத்து தொடர்பான சிசிடிவி காட்சிகள் சமூக வலைத்தளங்களில் வைரலாகி வருகிறது. அதில், சிறுவன் ஷவுரியா பந்து வீசும் காட்சிகள் இடம்பெற்றுள்ளது. அப்போது, திடீரென பேட்டர் அடித்த பந்து ஷவுரியாவின் பிறப்புறுப்பைப் பலமாக தாக்குகிறது.

அடுத்த சில நிமிடங்களிலேயே சிறுவன் சுருண்டு விழுகிறார். பின்னர், அவரை நண்பர்கள் எழுப்ப முயற்சிக்கின்றனர். முடியாததால் அருகில் இருந்தவர்களிடம் தகவல் தெரிவிக்க, அவர்கள் வந்து சிறுவன் ஷவுரியாவை மருத்துவமனைக்கு தூக்கிச் செல்லும் காட்சிகள் சிசிடிவியில் இடம்பெற்றுள்ளது. இதன் மூலம், நடந்த சம்பவம் விபத்து எனத் தெரியவந்து இருப்பதாக போலீசார் தகவல் தெரிவிக்கின்றனர். தொடர்ந்து, விசாரணை  நடைபெற்று வருவதாக தகவல் வெளியாகியுள்ளது. இதனிடையே, சிறுவன் ஷவுரியா உயிரிழப்பு குறித்து அவரின் நண்பர்கள் மற்றும் உறவினர்கள் தெரிவிக்கையில், " ஷவுரியா 6 ஆம் வகுப்பு படித்து வந்தார். ஆனால், அவருக்கு  விளையாட்டு மீதே அதிக ஆர்வம் இருந்தது. அவர் கனவே மல்யுத்த வீரராக வேண்டும் என்பதுதான். அதற்கான பயிற்சியும் எடுத்து வந்தார். இப்படியான சூழலில் சிறுவன் ஷவுரியா மரணம் எங்களால் தாங்கிக்கொள்ளவே முடியவில்லை. அவரின் இழப்பு மிகுந்த மனவருத்தத்தை தருகிறது..'' எனக் கூறினர்.

புனே அருகே விளையாடச்சென்ற இடத்தில் 11 வயது சிறுவனின் பிறப்புறுப்பில் பகுதியில் பந்து தாக்கி சுருண்டு விழுந்து உயரிழந்த சம்பவம் நாடுமுழுவதும் அதிர்ச்சியை ஏற்படுத்தியுள்ளது.