Skip to main content

AUSvsSA : தொடரும் தென் ஆப்பிரிக்காவின் கனவு; இறுதியை உறுதி செய்த ஆஸ்திரேலியா!

Published on 16/11/2023 | Edited on 16/11/2023

 

Australia qualified for finals worldcup semi final

 

உலகக்கோப்பை கிரிக்கெட் போட்டியின் 2 வது அரையிறுதி ஆட்டம் கொல்கத்தா ஈடன் கார்டன் மைதானத்தில் ஆஸ்திரேலியா - தென்னாப்பிரிக்கா இன்று (16.11.2023) இடையே நடைபெற்றது. தென்னாப்பிரிக்க அணி டாஸ் வென்று முதலில் பேட்டிங்கை தேர்வு செய்தது. அதன்படி முதலில் பேட் செய்த தென்னாப்பிரிக்க அணி பேட்ஸ்மேன்கள் ஆஸ்திரேலிய அணி பந்து வீச்சை சமாளிக்க முடியாமல் திணறினர். தொடக்க ஆட்டக்காரர் டி காக் 3 ரன்னில் வெளியேற, கேப்டன் பவுமா 0 என மீண்டும் சொதப்பினார். டுசைன் 6, மார்க்ரம் 10 என வெளியேற 24-4 என தடுமாறியது. அடுத்து வந்த டேவிட் மில்லர், க்ளாசென் இணை நிதானமாக விளையாடி, அணி ஓரளவு நல்ல ஸ்கோர் பெற உதவினர்.

 

சிறப்பாக ஆடிய டேவிட் மில்லர் சதமடித்து 101 ரன்களுக்கு ஆட்டமிழந்தார். அவருக்கு கை கொடுத்த க்ளாசென் 47 ரன்களும், கோட்ஸி 19 ரன்களும் எடுத்தனர். இறுதியில் தென்னாப்பிரிக்க அணி 49.4 ஓவர்களில் அனைத்து விக்கெட்டுகளையும் இழந்து 212 ரன்கள் எடுத்தது. ஆஸ்திரேலிய அணி சார்பில் மிட்செல் ஸ்டார்க், பேட் கம்மின்ஸ் ஆகியோர் தலா 3 விக்கெட்டுகளை வீழ்த்தினர். ஹேசில்வுட், டிராவிஸ் ஆகியோர் தலா 2 விக்கெட்டுகளை வீழ்த்தினர்.

 

பின்னர் ஆடிய ஆஸ்திரேலிய அணிக்கு தொடக்க ஆட்டக்காரர்களான ஹெட், வார்னர் சிறப்பான துவக்கம் தந்தனர். முதல் விக்கெட்டுக்கு அந்த இணை 60 ரன்கள் எடுத்தது. வார்னர் 29 ரன்களில் ஆட்டமிழந்தார். அடுத்து வந்த மார்ஸ் ரன் ஏதும் எடுக்காமல் வெளியேறினார். அடுத்து வந்த ஸ்மித் நிதானமாக ஆடத் தொடங்கினார். சிறப்பாக ஆடிக் கொண்டிருந்த ஹெட் அரை சதம் அடித்து 62 ரன்களில் ஆட்டமிழந்தார். லபுசேன் 18 ரன்களில் ஆட்டமிழக்க, அடுத்து வந்த மேக்ஸ்வெல் 1 ரன்னில் வெளியேறினார். பொறுமையாக ஆடிய ஸ்மித் 30 ரன்களுக்கு ஆட்டமிழக்க ஆட்டம் சூடு பிடிக்க தொடங்கியது.

 

AUSvsSA : Australia advanced to the finals

 

இங்லிஸ், ஸ்டார்க் இணை வெற்றியை நோக்கி நடைபோடத் தொடங்கிய நிலையில் இங்லிஸ் 28 ரன்களில் ஆட்டமிழந்தார். தென்னாப்பிரிக்க அணிக்கு மேலும் 3 விக்கெட்டுகள் தேவைப்பட, ஆஸ்திரேலிய அணிக்கோ 20 ரன்கள் தேவைப்பட்டது. ஸ்டார்க், கேப்டன் கம்மின்ஸ் இணை நிதானமாக ஆட ஆஸ்திரேலிய அணி 47.2 ஓவர்களில் 215 ரன்கள் எடுத்து வெற்றி பெற்றது. தென்னாப்பிரிக்க அணி சார்பில் கோட்ஸி, ஷம்ஸி தலா 2 விக்கெட்டுகளும், மார்க்ரம், ரபாடா, மஹராஜ் தலா ஒரு விக்கெட்டும் எடுத்தனர். ட்ராவிஸ் ஹெட் ஆட்ட நாயகனாகத் தேர்ந்தெடுக்கப்பட்டார். இதன் மூலம் 8 ஆவது முறையாக ஆஸ்திரேலிய அணி உலகக்கோப்பை இறுதிப்போட்டிக்கு தகுதி பெற்றுள்ளது. வரும் நவம்பர் 19 ஆம் தேதி அகமதாபாத் நரேந்திர மோடி மைதானத்தில் நடைபெறும் இறுதிப் போட்டியில் இந்தியாவை எதிர்த்து விளையாட உள்ளது. 

 

மற்ற ஆட்டங்களில் எல்லாம் சிறப்பாக விளையாடி உலகக் கோப்பை போன்ற முக்கியமான தொடர்களில் தென் ஆப்பிரிக்க அணி அவ்வளவு சிறப்பாக விளையாடாது எனும் வரலாறு தொடர்கிறது. 1999 இல் இங்கிலாந்தில் நடைபெற்ற உலகக் கோப்பை அரையிறுதியில், இதே ஆஸ்திரேலிய அணியிடம் தென்னாப்பிரிக்க அணியின் ஆட்டம் டையில் முடிந்தது. லீக் போட்டியில் ஆஸ்திரேலியா, தென்னாப்பிரிக்க அணியை வெற்றி பெற்றிருந்ததன் அடிப்படையில், ஆஸ்திரேலிய அணி இறுதிப் போட்டிக்கு தகுதி பெற்றது. அந்த போட்டியில் ஆஸ்திரேலிய அணி 213 ரன்களை எடுத்தது. இந்த போட்டியிலும் ஆஸ்திரேலிய அணிக்கு இலக்காக 213 ரன்களை தென் ஆப்பிரிக்க அணி நிர்ணயித்தது சுவாரசியமாக அமைந்தது. 2007 உலகக் கோப்பை அரையிறுதியிலும் ஆஸ்திரேலிய அணியிடம், தென் ஆப்பிரிக்க அணி தோற்று வெளியேறியது குறிப்பிடத்தக்கது.

- வெ.அருண்குமார்

 

 

 

 

 

Next Story

குடியாத்தம் கிரிக்கெட் பிரீமியர் லீக்; ‘ஐபிஎல்’க்கு டஃப் கொடுக்கும் ‘ஜிசிபிஎல்’

Published on 24/06/2024 | Edited on 24/06/2024
Just like the IPL, the GCPL is an auction for players

உலக புகழ் பெற்ற ஐபிஎல் கிரிக்கெட் அணிகள்  போல் வேலூர் மாவட்டம் குடியாத்தத்தில், குடியாத்தம் கிரிக்கெட் பிரீமியர் லீக் ( ஜி சி பி எல் ) எனப் பெயரிட்டு கிரிக்கெட் அணிகள் தொடங்கப்பட்டு, 14 அணிகள் ஏலம் எடுக்கப்பட்டு போட்டிகள் நடைபெற்று பரிசுகள் வழங்கப்பட்டது. இறுதி போட்டியில் பல்வேறு துறை பிரபலங்கள் கலந்து கொண்டனர்.

Just like the IPL, the GCPL is an auction for players

இதனிடையே சீசன் 2 போட்டிகளுக்காண அணிகள் வீரர்களை ஏலம் எடுக்கும் நிகழ்ச்சி குடியாத்தம் அருகே உள்ள தனியார் மகளிர் கல்லூரியில் நடைபெற்றது. ஐபிஎல் போட்டிக்கு அணிகள் ஏலம் எடுப்பதைப் போன்று 16 அணிகள் உருவாக்கப்பட்டது. இந்த அணிகளுக்கு வீரர்கள் ஏலம் விடுகின்றனர். இதற்காக வேலூர் மாவட்டத்தைச் சேர்ந்த 350 விளையாட்டு வீரர்கள் பதிவு செய்துள்ளனர். கிரிக்கெட் வீரர்களை தேர்வு செய்ய ஒரு அணிக்கு முப்பதாயிரம் பாயிண்ட்டுகள் வழங்கப்பட்டுள்ள நிலையில் வீரர்கள் தேர்வு செய்யும் நிகழ்ச்சி நடைபெற்றது. 

Just like the IPL, the GCPL is an auction for players

இது குறித்து ஜிசிபிஎல் ஒருங்கிணைப்பாளர் சதிஷ் கூறும் போது,  மாநிலத்தின் கடைக்கோடி நகரமான குடியாத்தம் நகரம் மற்றும் சுற்றுவட்டார கிராமப் பகுதிகளில் இருந்து திறமை வாய்ந்த விளையாட்டு வீரர்களை வெளி உலகத்திற்கு எடுத்துச் செல்லவே இந்த ஜிசிபிஎல் அமைப்பு உருவாக்கப்பட்டது. முதல் சீசனில் நடைபெற்ற விளையாட்டுகளில் பங்கேற்ற சித்து என்ற மாணவன் தற்போது மாநில அளவிலான அண்டர் 19 லீக் போட்டிக்கு தேர்வு ஆகி உள்ளதாகவும் எந்த விதமான வியாபார நோக்கமும் இல்லாமல் கிரிக்கெட் விளையாட்டு வீரர்களின் திறமைகளை வெளி கொள்வதற்காகவே இந்தப் போட்டி நடத்தப்படுவதாகவும் தெரிவித்தார். ஏலம் முடித்து விரைவில் போட்டிகள் தொடங்க உள்ளது.

Next Story

கலைந்த கனவு - பரிதாபமாக உயிரிழந்த சிறுவன்!

Published on 08/05/2024 | Edited on 08/05/2024
 boy who played cricket passed away tragically after being hit by a ball

மகாராஷ்டிர மாநிலம், புனே அடுத்துள்ளது லோஹிகன். இப்பகுதியைச் சேர்ந்தவர் 'ஷம்பு காளிதாஸ் காண்ட்வே' என்ற ஷவுரியா. 11 வயதான இவர், ராமன்பாக் நகரில் உள்ள நியூ இங்கிலீஷ் பள்ளியில் 6 ஆம் வகுப்பு படித்து வந்தார். தற்போது, அவருக்கு தேர்வுகள் முடிந்து கோடை விடுமுறை என்பதால் நண்பர்களுடன் சிறுவன் விடுமுறையைக் கழித்து வந்தார்.

இந்த நிலையில், கடந்த மே 2 ஆம் தேதி சிறுவன் ஷவுரியா லோஹேகான் பகுதியில் தன் நண்பர்களுடன் கிரிக்கெட் விளையாடச் சென்றார். விடுமுறை என்பதால் கூட்டாக கிரிக்கெட் விளையாடச் சென்றவர்கள், டர்ஃப் விக்கெட் ஒன்றை தேர்ந்தெடுத்து குழுவாக சேர்ந்து கிரிக்கெட் விளையாடினர். அப்போது, சிறுவன் ஷவுரியா எதிர்முனையில் நின்ற பேட்டருக்குப் பந்து வீசினார். அந்தப் பந்தை எதிர்கொண்ட பேட்டர் அதை நேராக ஓங்கி அடித்துள்ளார். பந்தானது, பேட்டர் அடித்த வேகத்தில் கண்இமைக்கும் நொடியில் சிறுவன் ஷவுரியாவின் பிறப்புறுப்பைப் பலமாகத் தாக்கியது. இதனால், சிறுவன் வலியால் துடித்துள்ளார். உடனே, பந்தை அடித்த பேட்டர் ரன் எடுக்க பவுலிங் எண்டுக்கு ஓடிய நேரத்தில் வலியால் துடித்த ஷவுரியா, நிலைதடுமாறி மைதானத்திலேயே சுருண்டு விழுந்துள்ளார்.

இதையடுத்து, ஷவுரியா சுருண்டு விழுந்ததைப் பார்த்து பதறிப்போன சக நண்பர்கள் ஷவுரியாவை எழுப்ப முயற்சித்தனர். ஆனால், அவரை எழுப்ப முடியவில்லை. இதனால், செய்வதறியாமல் திகைத்தவர்கள் உடனே அருகில் இந்தப் பெரியவர்களிடம் தகவல் தெரிவித்தனர். அதன்பேரில் அருகிலிருந்தவர்கள் ஓடிவந்து ஷவுரியாவை மீட்டு மருத்துவமனைக்கு அனுப்பிவைத்தனர். ஆனால், அவரை பரிசோதனை செய்த மருத்துவர்கள், ஷவுரியா ஏற்கெனவே உயிரிழந்து விட்டதாக தகவல் தெரிவித்தனர்.

இதைக் கேட்டு அவரது குடும்பத்தினர்களும் நண்பர்களும் அதிர்ச்சி அடைந்தனர். இந்தச் சம்பவம் குறித்து லோஹிகன் காவல் நிலைய போலீசார் வழக்குப்பதிவு செய்து விசாரணை  நடத்தி வருகின்றனர். கிரிக்கெட் விளையாடிய சிறுவன் திடீரென பந்து தாக்கி உயரிழந்தாக கூறப்படும் நிலையில், விபத்து தொடர்பான சிசிடிவி காட்சிகள் சமூக வலைத்தளங்களில் வைரலாகி வருகிறது. அதில், சிறுவன் ஷவுரியா பந்து வீசும் காட்சிகள் இடம்பெற்றுள்ளது. அப்போது, திடீரென பேட்டர் அடித்த பந்து ஷவுரியாவின் பிறப்புறுப்பைப் பலமாக தாக்குகிறது.

அடுத்த சில நிமிடங்களிலேயே சிறுவன் சுருண்டு விழுகிறார். பின்னர், அவரை நண்பர்கள் எழுப்ப முயற்சிக்கின்றனர். முடியாததால் அருகில் இருந்தவர்களிடம் தகவல் தெரிவிக்க, அவர்கள் வந்து சிறுவன் ஷவுரியாவை மருத்துவமனைக்கு தூக்கிச் செல்லும் காட்சிகள் சிசிடிவியில் இடம்பெற்றுள்ளது. இதன் மூலம், நடந்த சம்பவம் விபத்து எனத் தெரியவந்து இருப்பதாக போலீசார் தகவல் தெரிவிக்கின்றனர். தொடர்ந்து, விசாரணை  நடைபெற்று வருவதாக தகவல் வெளியாகியுள்ளது. இதனிடையே, சிறுவன் ஷவுரியா உயிரிழப்பு குறித்து அவரின் நண்பர்கள் மற்றும் உறவினர்கள் தெரிவிக்கையில், " ஷவுரியா 6 ஆம் வகுப்பு படித்து வந்தார். ஆனால், அவருக்கு  விளையாட்டு மீதே அதிக ஆர்வம் இருந்தது. அவர் கனவே மல்யுத்த வீரராக வேண்டும் என்பதுதான். அதற்கான பயிற்சியும் எடுத்து வந்தார். இப்படியான சூழலில் சிறுவன் ஷவுரியா மரணம் எங்களால் தாங்கிக்கொள்ளவே முடியவில்லை. அவரின் இழப்பு மிகுந்த மனவருத்தத்தை தருகிறது..'' எனக் கூறினர்.

புனே அருகே விளையாடச்சென்ற இடத்தில் 11 வயது சிறுவனின் பிறப்புறுப்பில் பகுதியில் பந்து தாக்கி சுருண்டு விழுந்து உயரிழந்த சம்பவம் நாடுமுழுவதும் அதிர்ச்சியை ஏற்படுத்தியுள்ளது.