போல்ட் வீசிய 5 ஓவர்கள்; கெத்து காட்டிய ராஜஸ்தான்; வெற்றி பெற்ற லக்னோ

16 ஆவது ஐபிஎல் சீசனின் 26 ஆவது லீக் போட்டி ஜெய்ப்பூரில் நடைபெற்றது. இதில் லக்னோ அணியும் ராஜஸ்தான் அணியும் மோதின. டாஸ் வென்ற ராஜஸ்தான் அணி பந்துவீச்சை தேர்வு செய்தது. முதலில் பேட் செய்த லக்னோ அணி 20 ஓவர்களில் 7 விக்கெட்கள் இழப்பிற்கு 154 ரன்களை எடுத்தது. அதிகபட்சமாக கெயில் மேயர்ஸ் 51 ரன்களை எடுத்தார்.

தொடர்ந்து களமிறங்கிய ராஜஸ்தான் அணி 20 ஓவர்களில் 6 விக்கெட் இழப்பிற்கு 144 ரன்களை மட்டுமே எடுத்து தோல்வியுற்றது. அதிகபட்சமாக ஜெய்ஸ்வால் 44 ரன்களையும் பட்லர் 40 ரன்களையும் எடுத்தனர்.

நடப்பு ஐபிஎல் தொடரில் ராஜஸ்தான் அணிக்காக முதல் ஓவரை வீசும் போல்ட் 5 முறை முதல் ஓவரை வீசி இதுவரை 13 ரன்களை மட்டுமே விட்டுக்கொடுத்துள்ளார். இதில் 5 விக்கெட்களையும் எடுத்துள்ளார். மொத்தமாக 30 பந்துகளில் 26 பந்துகளை டாட் பந்துகளாக வீசியுள்ளார். நேற்றைய போட்டியில் முதல் ஓவரை மெய்டன் ஆக்கியதும் குறிப்பிடத்தக்கது.

லக்னோ அணி தற்போது வரை 11 போட்டிகளில் முதலில் பேட் செய்து எதிரணிக்கு இலக்கை நிர்ணயித்துள்ளது. இதில் 9 முறை வெற்றி பெற்று 2 முறை மட்டுமே தோல்வி அடைந்துள்ளது. ஜெய்ப்பூர் மைதானத்தில் நடந்த கடைசி 7 ஐபிஎல் போட்டிகளில் 6ல் இரண்டாவது பேட் செய்த அணியே வெற்றி பெற்றுள்ளது. நேற்று நடந்த போட்டியில் மட்டுமே ராஜஸ்தான் அணி தோல்வி அடைந்தது.

முதல் 11 ஓவர்களை சிறப்பாக ஆடிய ராஜஸ்தான் அணி இறுதி 9 ஓவர்களில் நிலை குலைந்தது. 11 ஓவர்களில் விக்கெட்கள் இழப்பின்றி 81 ரன்களைக் குவித்திருந்தது. 12 முதல் 17 வரையிலான இடைப்பட்ட 5 ஓவர்களில் அந்த அணி மொத்தமாக 32 ரன்களை மட்டுமே எடுத்து 4 விக்கெட்களை இழந்திருந்தது. 18 முதல் 20 வரையிலான இறுதி 3 ஓவர்களில் 31 ரன்களை எடுத்து 2 விக்கெட்களை இழந்திருந்தது.

நேற்றைய போட்டியில் ராகுல் கொடுத்த 2 கேட்ச்களை ராஜஸ்தான் அணி வீரர்கள் தவற விட்டனர். முதல் கேட்சினை ஜெய்ஸ்வாலும் இரண்டாவது கேட்சினை ஹோல்டரும் தவறவிட்டனர். நேற்றைய போட்டியில் லக்னோ அணி விக்கெட்கள் இழக்காமல் இருந்தும் பவர்ப்ளேவில் குறைவான ரன்களை எடுத்த அணி என்ற சாதனையை படைத்தது.