2வது ஒரு நாள் போட்டி; இந்தியா - இங்கிலாந்து அணிகள் இன்று மோதல்!

இந்தியாவிற்குச் சுற்றுப்பயணம் மேற்கொண்டிருக்கும் இங்கிலாந்து அணி 5 போட்டிகள் கொண்ட டி20 தொடர் மற்றும் 3 போட்டிகள் கொண்ட ஒரு நாள் தொடரில் விளையாடி வருகிறது. அந்த வகையில் 5 போட்டிகள் கொண்ட டி20 தொடரை 4க்கு 1 என இந்தியா அணி கைப்பற்றியது. இதனையடுத்து இந்தியா - இங்கிலாந்து அணிகள் மோதும் 3 போட்டிகள் கொண்ட ஒருநாள் கிரிக்கெட் தொடர் கடந்த 6ஆம் தேதி (06.02.2025) தொடங்கியது.

இந்த முதல் ஒருநாள் போட்டி மகாராஷ்டிரா மாநிலம் நாக்பூரில் உள்ள விதர்பா கிரிக்கெட் சங்க மைதானத்தில் நடைபெற்றது. இந்த போட்டியில் இந்திய அணி வெற்றி பெற்றது. இதன் மூலம் 3 போட்டிகள் கொண்ட தொடரில் 1க்கு 0 என்ற கணக்கில் இந்திய அணி முன்னிலை வகிக்கிறது. இந்நிலையில் ஒடிசா மாநிலம் கட்டாக்கில் இன்று (09.02.2025) பிற்பகல் 01.30 மணிக்கு இந்தியா - இங்கிலாந்து அணிகள் மோதும் 2வது ஒரு நாள் போட்டி நடைபெறுகிறது. காயம் காரணமாக முதல் போட்டியில் விளையாடாத விராட் கோலி இன்று களமிறங்குவார் என எதிர்பார்க்கப்படுகிறது.

சாம்பியன்ஸ் டிராபி தொடருக்கு முன்னதாக நடைபெறும் ஒரு நாள் தொடர் போட்டித் தொடர் இது என்பதால் இரு அணிகளும் வெற்றி பெறும் முனைப்பில் இன்று களமிறங்க உள்ளன. எனவே இந்த ஆட்டத்தில் பரபரப்புக்குப் பஞ்சம் இருக்காது என எதிர்பார்க்கப்படுகிறது. இந்த ஒரு நாள் தொடரை அடுத்து இந்த ஆண்டிற்கான சர்வதேச கிரிக்கெட் போட்டியின் சாம்பியன்ஸ் டிராபி தொடரானது பாகிஸ்தானில் நடைபெற உள்ளது. அதன்படி பிப்ரவரி 19ஆம் தேதி தொடங்கும் இந்த போட்டி மார்ச் 9ஆம் தேதி நிறைவடைய உள்ளது. அந்த வகையில் பிப்ரவரி 20ஆம் தேதி வங்கதேசத்தையும், பிப்ரவரி 23ஆம் தேதி பாகிஸ்தானையும், மார்ச் 2ஆம் தேதி நியூசிலாந்தையும் இந்திய அணி எதிர்கொள்கிறது. அதே சமயம் இந்தியா விளையாடும் அனைத்துப் போட்டிகளும் துபாயில் நடைபெற உள்ளது குறிப்பிடத்தக்கது.