Skip to main content

டாஸ்மாக்கிற்கு இருக்கும் எதிர்ப்பு கூட இதற்கில்லை - மனநல மருத்துவர் ராதிகா முருகேசன் விளக்கம்

Published on 25/03/2024 | Edited on 25/03/2024
  Dr Radhika | Mobile phone | Youngsters

வாழ்வியல் மாற்றமும், தூக்கமின்மையும் மன அழுத்தத்திற்கு எவ்வாறு பங்கு விளைவிக்கிறது என்று மனநல மருத்துவர் ராதிகா முருகேசன் விளக்குகிறார்.

இன்றைய வாழ்வியல் மாற்றங்கள் தனி மனிதனுக்கு  மன அழுத்தம் கொடுக்கத்தான் செய்கிறது. முந்தைய காலத்தில் வேலை பார்க்கும் நடைமுறையே  நன்றாக இருந்தது. அலுவலகத்தில் கூட வேலை பார்ப்பவர்களுடன் இருக்கும் உறவு சிறப்பாக இருந்தது. ஆனால் தற்போது கொரோனா லாக்டவுனுக்கு பிறகே அது அப்படியே மாறி விட்டது. தனித்து வேலை பார்க்கும் சூழலில் நிறைய சிக்கலும் இருக்கிறது. மேலும், அலுவலகத்திலும் துன்புறுத்தல் மற்றும் பாலியல் தொந்தரவுகளை சந்திக்க வேண்டி இருக்கிறது. வழக்க நேரத்திற்கும் அதிகமாக வேலை பார்க்கும்படி அழுத்தம் கொடுக்கப்படுகிறது. உணவு முறை, சரியான உடற்பயிற்சி இல்லாமை போன்றவை டிப்ரெஷன் அதிகமாக காரணமாகிறது. வெளிநாடுகளில் தற்போது நிறைய ஆரோக்கிய மாற்றங்களை கொண்டு வந்து விட்டனர். பள்ளி அருகே பாஸ்ட் புட் கடைகளை வைக்க அனுமதிப்பதில்லை. 

நம் நாட்டில் டாஸ்மாக்கிற்கு காட்டும் எதிர்ப்பை இந்த ஜங்க் ஃபுட் கடைகளுக்கு காட்டுவதில்லை. ஜங்க் ஃபுட் உணவுகள் ஆரோக்கியமற்ற உடல்நிலையை கொண்டு வரும். தூக்கமற்ற சூழலும் மன அழுத்தத்திற்கு பெரும்பங்கு இருக்கிறது. குழந்தைகள் 16 மணி நேரம் உறங்கவேண்டும் என்றால் பெரியவர்கள் 6-7 மணி நேரம் தூங்குதல் அவசியம். இது போன்று குவாலிட்டி ஸ்லீப் பாதிக்கும் போது 'பிரைமரி இன்சோம்னியா' வருகிறது. நெடு நேரம் மொபைல் பார்த்துக் கொண்டிருப்பதால் உடனடியாக தூக்கத்திற்கு உடல் ஒத்துழைப்பதில்லை. நம் இயல்பு காலையில் விழித்து இரவில் தூங்க வேண்டும். அப்பொழுது தான் சரியான ஹார்மோன்ஸ் இயங்கி  நம் உடல் சரியாக பராமரிக்கும். 

ஆனால் இன்றைய சூழலில் உடல்நிலைக்கு எதிராக இரவில் வேலை பார்த்து பகலில் தூங்குகிறார்கள். இப்படியான சூழல் வரும் போது தான் உடல் பாதிப்பிற்கு உள்ளாகிறது. அன்றைய காலத்தில் 'இன்சோம்னியா' என்ற நோயே கிடையாது. இன்றைய காலத்தில் குழந்தைகள் கூட பெற்றோர்களின் முறையான வழிகாட்டுதல் இல்லாமல் இரவு ஒரு மணி வரை கூட விழித்து மொபைல் பார்க்கிறார்கள். குறைந்த வயதில் டிப்ரெஷன் வர இதுவும் ஒரு காரணம் தான்.  உணவுமுறை மாற்றம், இனிப்பு வகைகள் அதிகமாக எடுத்து கொள்வது, சரியான அளவில் நீர் பருகாமல் இருப்பது கூட இதுபோன்ற இன்னல்களை வரவைக்கிறது.

 

Next Story

அல்சரில் இருந்து எப்படி நம்மை தற்காத்து கொள்ள வேண்டும்? - உணர்வு நீக்கியல் மருத்துவ நிபுணர் கல்பனா விளக்கம்

Published on 22/07/2024 | Edited on 22/07/2024
Anesthesiologist Kalpana explains how protect from ulcers

அல்சரை ஆரம்பத்திலேயே கவனிக்காமல் விட்டால் என்ன நடக்கும், அல்சரில் இருந்து எப்படி நம்மை தற்காத்து கொள்ள வேண்டும் ஆகியவற்றை குறித்து உணர்வு நீக்கியல் மருத்துவ நிபுணர் கல்பனா நமக்கு விளக்குகிறார்.

வருமுன் காப்போம் என்பதை பற்றி பேசுவோம். வாழ்க்கையில் எல்லா விஷயமும் வருவதற்கு முன்னாடி தயாராக இருந்தால் அதை காப்பாற்றிக்கொள்ளலாம். இன்றைக்கு நிறைய இளைஞர்களுக்கு அல்சர் வருகிறது. வயிறு எரிச்சல், வயிறு புண் வருவதை நமது உணவு பழக்கம் அதிகப்படுத்தும். இதனால், ரொம்ப ரொம்ப தாங்கமுடியாத வலி வரும். இதற்கு சரியான நேரத்தில் வேளை வேளைக்கு சாப்பிட வேண்டும். 

டியோடினல் அல்சர், காஸ்டிரிக் அல்சர் என இரண்டு வகையான அல்சர் இருக்கிறது. அல்சர் உள்ள ஒரு நபர், சாப்பிட உடன் வயிற்று வலி கம்மி ஆகிவிடும். ஆனால், இந்த டியோடினல் அல்சர் அதிகமாகி, நடு ராத்திரி பயங்கரமான வலியோடு எழுவோம். அந்த வலி 10/10 அளவுக்கு இருக்கும். இதை எப்படி தற்காத்து கொள்ள வேண்டும் என்பதை பார்ப்போம். நமது உணவு பழக்கத்தை மாற்றிக்கொள்ளலாம். நாம் சாப்பிடுற உணவு சீக்கிரம் செரிமானம் ஆகும் உணவை சாப்பிட வேண்டும். நமது வாழ்க்கை முறை மாற வேண்டும். இந்த அல்சர் வருவதற்கு முன்பு, வயிற்று எரிச்சல், வயிற்று வலி போன்ற அறிகுறிகள் தெரியவரும். சில சமயம் மாரடைப்பு வருவது போல் வலி ஏற்படும். இது வரும் போது தண்ணீர் குடித்தாலோ அல்லது தயிர் பருகினாலோ, பயோடிக் பானங்கள் குடித்தாலோ வலி கம்மி ஆகும்.

அதிகளவு மன அழுத்தம், காபி போன்ற பானங்கள், காரமான உணவுகள் போன்றவற்றை பயன்படுத்தினால் தான் இந்த அல்சர் வருகிறது. சில பேருக்கு கோதுமை சப்பாத்தி சாப்பிட்டால் வயிற்று எரிச்சல் வரும். நிறைய பேருக்கு இது அல்சராக இருக்க வேண்டும் என்ற அவசியம் இல்லை. ஆரம்பக்கட்டத்திலேயே அல்சர் வராது. வயிற்று பகுதியில் சில இடங்களில் வீக்கம் இருக்கும், அது தான் வயிற்று எரிச்சலுக்கான காரணம். அந்த அசிட்டிட்டியை நடுநிலைப்படுத்தினால், வலி கம்மி ஆகிடும். அதற்கு தான் ஜெலுசில் போன்ற மருந்தை நாம் குடிப்போம். 

வலி எல்லோருக்கும் இருக்கும். ஆனால், அந்த வலியினால் நாம் பாதிப்படையுறோமா, இல்லையா என்பது நம் கையில் தான் இருக்கிறது. அதற்கான மருத்துவம் எடுத்துக்கலாம். அதை தடுப்பதற்கான யுக்திகளை கையாளுவதை நாம்தான் பார்த்துக் கொள்ள வேண்டும். இந்த அல்சரை சரிசெய்யவில்லை என்றால், அது நாள் ஆக ஆக சிலசமயம் புற்று நோயாக மாறுவதற்கான வாய்ப்பும் உண்டு. அதனால், இது வருவதற்கு முன்னாடியே நாம் காப்பாற்றிக்கொள்வது நல்லது. இந்த அல்சரால், புளிச்ச ஏப்பம் போன்றவை வரும். ஒரு பொது இடத்தில் இந்த மாதிரி ஏப்பம் விட்டால், சங்கடமான நிலை ஏற்படும். இதனால், வெளியே செல்வதற்கே பயம் ஏற்பட்டு மன அழுத்தம் ஏற்படும். இதற்கான வழி என்னவென்றால், நமது உணவு பழக்கத்தை மாற்றிக்கொள்ளம்லாம். நமக்கு ஒவ்வாத விஷயங்களை நாம்தான் கண்டுபிடிக்க வேண்டும். சரியான நேரத்தில் சாப்பிட வேண்டும். வலி மாத்திரை சாப்பிடுகிறோம் என்றால் அதுவும் அல்சரில் கொண்டு சேர்க்கும். வலிக்கான மாத்திரைகளை நீங்களே முடிவு செய்து வெளியே வாங்கி சாப்பிடுவதை கண்டிப்பாக தவிர்க்க வேண்டும். 

இது போன்ற அல்சர் இருக்கும் போது ஒரு மன உளைச்சலில் கொண்டு சேர்க்கும். மன அழுத்தம் போன்றவற்றை தவிர்க்க வேண்டும் என்றால், ஒழுங்குமுறையான உணவு பழக்கத்தை கொண்டு வர வேண்டும். உணவு என்பது மிக மிக முக்கியமான விடயம். அந்த உணவை எப்படி, எந்த நேரத்தில் சாப்பிடுகிறோம் என்பதில் தான் இந்த அல்சரில் இருந்து நம்மை காப்பாற்றும். வலிக்குண்டான மாத்திரைகளை தயவுசெய்து சாப்பிட வேண்டாம். ஒரு வேளை அதை சாப்பிட்டால், உணவு உண்ட பிறகு இந்த மாத்திரைகளை சாப்பிடுங்கள். ஏனென்றால், இந்த மாத்திரைகள் வயிற்றை மட்டும் பாதிக்காது, சில நேரங்களில் சிறுநீரகத்தையும் பாதிக்கும். 

Next Story

லவ் பிரேக் அப் ஆனால் ஏன் இப்படி ஆகுறாங்க? - மனநல மருத்துவர் ராதிகா முருகேசன் விளக்கம்

Published on 22/07/2024 | Edited on 22/07/2024
Psychiatrist Radhika Murugesan explained

காதல் என்ற விஷயமே ஜஸ்ட் காமம் தான். காமம் தான் காதல். ஒருவரை பார்த்து ஒரு ஈர்ப்பு வரும்போது தற்செயலாக ஹார்மோன்ஸ் கூட ஆரம்பிக்கும். டோபோமைன்ஸ் கூடும். காதல் என்பதே ஆல்டர் மெண்டல் ஸ்டேட் (Alter Mental state) தான். அதனால் தான் காதல் தோல்வி அடைந்த பிறகு, விட்டுட்டு போனவங்கள பத்தியே நினைச்சுட்டு இருப்பாங்க. அவுங்க ஆன்லைன்ல இருக்காங்களா, சமூக வலைத்தளங்களில் இருக்காங்களா என செக் பண்ணிட்டே இருப்பாங்க. இந்த மாதிரி ஸ்டாக்கிங் செய்வாங்க. இப்படி உள்ளவங்கள நான் ஓசிடி மாதிரியே சிகிச்சை அளித்திருக்கிறேன். அவர்களும், 3 அல்லது 4 மாதங்களிலே சரி ஆகியிருக்கிறார்கள். 

காதல் என்பது ஒரு போதைப் பொருள் மாதிரி. ஒரு போதைப்பொருள் பயன்படுத்தும் போது டொபொமைன்ஸ் அதிகமாக இருக்கும். திடீரென, அந்த போதைப்பொருளை நிறுத்திவிட்டால் ஒருவிதமாக நடந்துகொள்வார்கள். அது போல் தான் காதலிலும் இருக்கிறது. பார்த்தவுடன் காதல் வருது என்கிறார்கள். அது கண்டிப்பாக காமத்தினால் தான் வருகிறது. அது எப்படி ஒருத்தங்கள பார்த்தவுடன் அவுங்கள பத்தி ஒன்னுமே தெரியாமல் காதல் வரும். இந்த காதல், காமம், சமூகம் இத பத்தி பேசும்போது தான் எனக்கு தோனுது. நிறைய இளம் காதலர்கள், காதலிக்கும் போது நெருக்கமாக ஒரு காவியக் காதல் போல் காதல் செய்வார்கள். ஆனால், அவர்கள் இருவரும் கல்யாணம் செய்த பிறகு, சின்ன சின்ன விஷயத்திற்கு அளவுக்கு அதிகமாக கோபப்படுவது, சண்டை போடுவது போல் இருப்பார்கள். இவர்கள் இருவரும் பிரிந்துபோக வேண்டும் என்ற விருப்பம் இருக்கும். ஆனால், ஏதோ இடத்தில் இந்த சமூகத்திற்காக திருமணம் செய்துவிட்டோம், அதனால் சேர்ந்து தான் வாழ வேண்டும், குழந்தை பிறந்தால் சரியாகிவிடும் என்று ஒரு நிலைப்பாடு எடுக்கும் போது அங்கு மிகப் பெரிய பிரச்சனையாக இருக்கிறது. 

இளைஞர்களுக்கு அவர்களுடைய மனநிலையை எப்படி ஒழுங்குப்படுத்துவது என்று தெரியவில்லை. கோபம் வந்தால் எப்படி கையாளுவது, ஒரு பேச்சுவார்த்தையை எப்படி உருவாக்க வேண்டும் என்பது போன்ற திறமை இல்லாததால், அதிகளவு கோபப்படுவது, எமோஷனலாக கத்துவது போன்றெல்லாம் தான் நடக்குது. இதுக்குமேல், இந்த உறவு சரியா வராது என்று புரிந்தாலும், திருமணத்தில் தான் இருப்பேன் அதைத் தாண்டி என்னால் யோசிக்க முடியாது என்ற மனநிலையில் இருக்கிறார்கள். அதையெல்லாம் கையாளுவது மிக மிக கஷ்டம். 

ஒரு வேளை காதல் வந்துவிட்டது. ஆனால், அந்த காதல், கடைசி வரைக்கும் ரோமியோ ஜூலியட் மாதிரி எல்லாம் இருக்காது. காதல் என்பது முதல் கட்டம் தான். ஆண்டாண்டு காலமா ஈர்ப்பே இல்லாமல், ஒரே சாதிக்குள்ள இருக்கனும் வேண்டும் அரேஞ் மேரேஜ் நடந்துட்டு இருந்த சிஸ்டம்ல காதல் என்ற கான்செப்ட்க்கு வந்துருக்கோம். காதல் செய்து கல்யாணம் செய்ய வேண்டும். அது இயற்கை. ஒருத்தங்கள பார்த்தவுடன் அவருடன் வாழ்நாள் முழுவதும் பயணிக்க வேண்டும் என்று தோனுகிறது. ஆனால், அதுக்கு மேல் நிறைய விஷயம் இருக்கிறது. அதை அவர்களோடு பழகுனா தான் தெரியும். அதனால், காதல் என்பது முதல் கட்டம் தான். அதுக்கு மேல் ஒரு பெரிய பிராஸஸ் இருக்கு. சில பேருக்கு அவர்களிடம் இருக்கும் முதர்ச்சியால் அவர்களுக்கு வரக்கூடிய பிரச்சனைகளை எதிர்கொண்டே இருப்பார்கள். அதோடு சேர்த்து அந்த காதலையும் வளர்ப்பார்கள். அது தான் 50, 60 வயதுகொண்ட ஒரு தம்பதிகூட ரொமாண்டிக் தம்பதியராக இருப்பார்கள். 

கணவன் மனைவி உறவுக்குள் நட்பு இல்லையென்றால் எதையுமே செய்யமுடியாது. எக்காரணம் கொண்டு திருமணத்தில் இருந்து விட்டு போகக்கூடாது, அந்த சிஸ்டத்தை உடைக்கக்கூடாது என்ற நோக்கத்தில் தான் காதலை புனிதப்படுத்துகிறார்கள். அந்த சிஸ்டத்தை எதிர்கேள்வி கேட்கக்கூடாது அத புனிதப்படுத்தி செய்யக்கூடாது என்ற சட்டம் இருக்கிறது. அப்படி எதிர்கேள்வி கேட்டு செய்தால், பெண்களுக்கு கற்பு கிடையாது போன்றவற்றை சொல்வார்கள். மற்றபடி காதலுக்கு புனிதமும் கிடையாது, ஒரு புண்ணாக்கும் கிடையாது.