Skip to main content

தினசரி பல் துலக்குவதால் என்ன பயன்? - விளக்குகிறார் டாக்டர் அருண் கனிஷ்கர்

Published on 03/04/2023 | Edited on 03/04/2023

 

Dental hygiene tips

 

தினமும் காலை எழுந்தவுடன் முக்கியமாக நாம் செய்யும் வேலைகளில் ஒன்று பல் துலக்குதல். சரியான முறையில் பல் துலக்குவது எப்படி, பல் துலக்குவதால் ஏற்படும் பயன்கள் என்னென்ன என்பது குறித்து பல் மருத்துவர் டாக்டர் அருண் கனிஷ்கர் விளக்குகிறார்.

 

வாய் சுத்தம் என்றாலே நம் நினைவுக்கு வருவது பல் துலக்குதல் தான். நாம் பல் துலக்கவில்லை என்றால் பற்கள் தொடர்பான பிரச்சனைகள் ஏற்படும். பல் சொத்தை, ஈறுகள் சேதம், வாய் துர்நாற்றம் உள்ளிட்ட பிரச்சனைகள் ஏற்படும். நம்முடைய உடலில் நல்ல பாக்டீரியா, கெட்ட பாக்டீரியா என்று இருவகையான பாக்டீரியாக்கள் இருக்கும். அவை எப்போதும் சரிசமமான அளவில் தான் இருக்கும். கெட்ட பாக்டீரியாக்கள் அதிகமானாலோ, நோய் எதிர்ப்பு சக்தி குறைந்தாலோ அதனால் பல நோய்கள் ஏற்படும். இது வாய்ப் பகுதிக்கும் பொருந்தும்.

 

பல் துலக்குதலில் டூத்பேஸ்ட், மவுத்வாஷ் ஆகியவற்றைப் பயன்படுத்துதல் நன்று. காலையில் குறைந்தபட்சம் இரண்டு நிமிடங்கள் பல் துலக்க வேண்டும். இரவில் தூங்குவதற்கு முன் அதேபோல் இரண்டு நிமிடங்கள் பல் துலக்க வேண்டும். உங்களுக்கு அதிக நேரம் இருந்தால் ஒவ்வொரு முறை உணவு உண்ட பிறகும் பல் துலக்குவது நல்லது. சாஃப்டான டூத்பிரஷை பயன்படுத்துவது நல்லது. டூத்பிரஷில் எடுத்தவுடன் பேஸ்ட் தடவி விடாமல் முதலில் அதை நன்கு கழுவ வேண்டும். இல்லையெனில் ஏற்கனவே உள்ள கிருமிகள் வாய்க்குள் சென்றுவிடும். 

 

பல் துலக்கி முடித்த பிறகும் பிரஷை நன்கு கழுவ வேண்டும். டூத்பேஸ்ட் மற்றும் மவுத்வாஷைப் பொறுத்தவரை உங்களுக்கு எது தேவையோ அதை மருத்துவரின் பரிந்துரையோடு தேர்ந்தெடுப்பது நல்லது. பல் மருத்துவரை அணுகி வாயை சுத்தப்படுத்தலாம். பல் சுத்தப்படுத்துதலைப் பொறுத்தவரை எதையுமே வேகமாக அல்லாமல் பொறுமையாகச் செய்ய வேண்டும். இல்லையெனில் ரத்தக் கசிவு ஏற்படும். நாக்கையும் தொடர்ந்து சுத்தப்படுத்த வேண்டும். இதை தினமும் செய்ய வேண்டும். இல்லையென்றால் வாய் துர்நாற்றம் ஏற்படும்.

 


 

 

Next Story

அரசு மருத்துவமனைக்கு குளிரூட்டும் இயந்திரம் வழங்கிய எம்.சி.கே.எஸ் அறக்கட்டளை

Published on 11/07/2024 | Edited on 11/07/2024
A trust provided air conditioning machine to a government hospital

எம்.சி.கே.எஸ் அறக்கட்டளை அரசு மருத்துவமனைக்கு குளிரூட்டும் இயந்திரம் வழங்கியுள்ளது.

சென்னையை அடுத்த தாம்பரம் மாநகராட்சி ஜமீன் பல்லாவரத்தில் உள்ள நகர்புற அரசு ஆரம்ப சுகாதார நிலையத்திற்கு  எம்.சி.கே.எஸ் டிரஸ்ட் ஃபண்ட் என்கிற பிராணிங் கீலிங் அமைப்பை சேர்ந்தவர்கள் மற்றும் பிரிட்டி லிட்டில் ஆர்ட்ஸ் அறக்கட்டளையின் சார்பில் சிகிச்சைக்காக வரும் கர்ப்பிணி பெண்கள் சோர்வு அடையாமல் இருக்க ஒரு லட்சத்து 32 ஆயிரம் மதிப்புள்ள மூன்று குளிர்சாதன பெட்டிகள் ஆரம்ப சுகாதார நிலையத்தில் பொருத்தப்பட்டது.

சுகாதார நிலையத்தில் பொருத்தப்பட்ட குளிர்சாதன பெட்டிகளை பிரிட்டி லிட்டில் ஆர்ட்ஸ் மற்றும் எம்.சி.கே.எஸ் டிரஸ்ட் ஃபண்ட் என்கிற பிராணிங் கீலிங் அமைப்பை சார்ந்த நிர்வாகிகள் இயக்கி வைத்தனர்.

பின்னர் இது குறித்து மருத்துவ மகேந்திரன் கூறுகையில், ஆரம்ப சுகாதார நிலையத்திற்கு ஒரு நாளைக்கு 200 க்கும் மேற்பட்ட நோயாளிகள், கர்ப்பிணி பெண்கள் வருகின்றனர். இவர்கள் சோர்வுடன் வருவதை கண்ட எம்.சி.கே.எஸ் டிரஸ்ட் ஃபண்ட் மற்றும் பிரிட்டி லிட்டில் ஆர்ட்ஸ் அறக்கட்டளை நிர்வாகிகள் குளிர்சாதன பெட்டிகளை வழங்கி உள்ளனர். மேலும் தேவையான உதவி செய்வதாக தெரிவித்த அவர்களுக்கு தனது நன்றியை தெரிவித்தார்.

ஒருங்கிணைப்பாளர் லியோ ஆகாஷ் ராஜ் பேசுகையில், 'ஆரம்ப சுகாதார நிலையத்தில் அதிகப்படியான கர்ப்பிணி பெண்கள் சிகிச்சைக்காக வருவதும், அவர்கள் புழுக்கத்தால் சோர்வு அடைவதையும் எங்கள் அறக்கட்டளை நிர்வாகிகள் அறிந்து எம்.சி.கே.எஸ் டிரஸ்ட் ஃபண்ட் என்கிற பிராணிங் கீலிங் அமைப்பைச் சேர்ந்தவர்கள்  உதவியுடன் குளிர்சாதன பெட்டிகளை வழங்கியதாக தெரிவித்தார்.

இதில் பிரிட்டி லிட்டில் ஆர்ட்ஸ் மற்றும் எம்.சி.கே.எஸ் டிரஸ்ட் ஃபண்ட் என்கிற பிராணிங் கீலிங் அமைப்பை சேர்ந்த நிர்வாகிகள், மருத்துவமனை ஊழியர்கள் ஏராளமானோர் கலந்து கொண்டனர்.

Next Story

போலீசார் தாக்கியதால் காயம்; மருத்துவ அறிக்கையை தாக்கல் செய்ய நீதிமன்றம் உத்தரவு 

Published on 06/07/2024 | Edited on 06/07/2024
Ordered to submit medical report of Pandian who was injured  by police

புதுக்கோட்டை மாவட்டம் மணமேல்குடி காவல் சரகத்தில் கடந்த மாதம் 9 ந் தேதி ஒரு மூதாட்டியை தாக்கி நகை பறித்துச் சென்றதாக வந்த புகாரையடுத்து சந்தேக நபராக கூறப்பட்ட ரவி மகன் பாண்டியன்(18) மற்றும் அவரது 17 வயது நண்பன் ஆகியோரை 10 ந் தேதி விசாரனைக்காக அழைத்துச் சென்று 16 ந் தேதி ஆலங்குடியில் கஞ்சா விற்றதாக 17 வயது சிறுவனை ஆலங்குடி காவல் நிலையத்தில் வழக்குப் பதிவு செய்யப்பட்டு திருச்சி சிறுவர் சீர்திருத்தப்பள்ளியில் விடப்பட்டார்.

அதே போல 18 ந் தேதி கோட்டைப்பட்டினம் காவல் நிலைய எல்லைக்கு உட்பட்ட கீழமஞ்சக்குடி கிராமம் கொள்ளுவயல் ஆற்றுப்பாலம் அருகே 1 கிலோ 150 கிராம்  கஞ்சாவுடன் பைக்கில் வந்த போது கிராம நிர்வாக அலுவலர் மற்றும் கிராம உதவியாளர் முன்னிலையில் அவர்கள் சாட்சியாக பாண்டியனை கைது செய்தனர். மேலும், பைக் மற்றும் கஞ்சாவை பறிமுதல் செய்த போது உடலில் காயங்களுடன் இருந்ததாக வாக்குமூலம் பதிவு செய்து மணமேல்குடி மருத்துவமனையில் காண்பித்து மருத்துவச் சான்று பெற்று நீதிமன்றத்தில் ஆஜர்படுத்தி புதுக்கோட்டை சிறையில் அடைக்கப்பட்டார்.

ஆனால் போலீசார் தன்னை தாக்கியதால் படுகாயம் ஏற்பட்டு வலிக்கிறது என்று பாண்டியன் கதறியதால் உடனே புதுக்கோட்டை மருத்துவக்கல்லூரி மருத்துவமனையில் தீவிர சிகிச்சைப் பிரிவில் சேர்க்கப்பட்டார். அங்கு பாண்டியனின் சிறுநீரகம் பாதிக்கப்பட்டுள்ளதால் டயாலிசிஸ் செய்ய வேண்டும் என்று தொடர்ந்து பல நாட்கள் டயாலிசிஸ் செய்யப்பட்டு மேல் சிகிச்சைக்காக தஞ்சாவூர் மருத்துவக்கல்லூரியில் அனுமதிக்கப்பட்டு சிகிச்சை அளிக்கப்பட்டு வருகிறது. பின்பகுதியில் உள்ள புண்களும் மேலும் அதிகரித்துள்ளதாக கூறப்படுகிறது.

இந்த நிலையில் பாண்டியன் தரப்பில் உயர்நீதிமன்றம் மதுரை கிளையில் போலீசார் தாக்கியதில் ஏற்பட்டுள்ள காயங்களுக்கு பாண்டியனுக்கு தனியார் மருத்துவமனையில் அரசு செலவில் உயர் சிகிச்சை அளிக்கவும், மாற்று விசாரணை கேட்டும் மனுத்தாக்கல் செய்யப்பட்டிருந்தது. இந்த மனு வெள்ளிக்கிழமை(5.7.2024) விசாரணைக்கு வந்த நிலையில் பாண்டியனின் உடல்நிலை மற்றும் சிகிச்சைகள் பற்றிய மருத்துவ அறிக்கையை வரும் 10 ந் தேதி தஞ்சாவூர் மருத்துவக்கல்லூரி முதல்வர் நீதிமன்றத்தில் தாக்கல் செய்ய வேண்டும். மேலும், போலீசார் தரப்பில் கவுண்டர் கொடுக்கவும் உத்தரவிடப்பட்டுள்ளது.