Skip to main content

துணை மருத்துவ படிப்புகளுக்கு சேர்க்கை அறிவிப்பு; ஆன்லைனில் அக்.17 வரை விண்ணப்பிக்கலாம்!!

Published on 02/10/2020 | Edited on 03/10/2020

 

 

nursing and b.pharm students apply now

பி.எஸ்சி., நர்சிங், பி.ஃபார்ம் உள்ளிட்ட துணை மருத்துவப் படிப்புகளில் சேர்வதற்கான விண்ணப்ப படிவத்தை மருத்துவக் கல்வி இயக்ககம் ஆன்லைனில் புதன்கிழமை (அக்.1) வெளியிட்டுள்ளது. அக். 17- ஆம் தேதி மாலை 05.00 மணி வரை ஆன்லைனில் விண்ணப்பிக்கலாம். அக். 15- ஆம் தேதி, மாலை 5 மணி வரை இதற்கான விண்ணப்பப் படிவத்தை பதிவிறக்கம் செய்து கொள்ள முடியும்.

 

இளங்கலை மருந்தாளுநர் (பி.ஃபார்ம்), பிஸியோதெரபி, ஆடியோலஜி மற்றும் ஸ்பீச் லாங்குவேஜ் பெத்தாலஜி, பி.எஸ்சி பிரிவில் நர்சிங், ரேடியோகிராபி மற்றும் இமேஜிங் டெக்னாலஜி, ரேடியோ தெரபி டெக்னாலஜி, கார்டியோ பல்மனரி பெர்ஃபியூஷன் டெக்னாலஜி, கார்டியாக் டெக்னாலஜி, கிரிட்டிகல் கேர் டெக்னாலஜி, பி.ஓ.டி., உள்ளிட்ட துணை மருத்துவப் படிப்புகளில் சேர விண்ணப்பங்கள் வரவேற்கப்படுகின்றன.

 

இதற்கான விண்ணப்பத்தை www.tnhealth.tn.gov.in மற்றும் www.tnmedicalselection.org ஆகிய இணையதளங்களில் இருந்து அக்.1- ஆம் தேதி முதல் பதிவிறக்கம் செய்து கொள்ளலாம்.

 

சேர்க்கை தொடர்பான தகவல்கள் அனைத்தும் மேற்கண்ட இணையதளங்கள் வாயிலாகவே வெளியிடப்படும் என்பதால், விண்ணப்பதாரர்கள் மேற்குறிப்பிட்ட இணையதளங்களை அடிக்கடி பார்வையிட அறிவுறுத்தப்படுகின்றனர். காலதாமதமாக பெறப்படும் விண்ணப்பம் நிராகரிக்கப்படும்.

 

முன்னாள் படை வீரர்களின் வாரிசுகள், மாற்றுத்திறனாளிகள் உள்ளிட்ட சிறப்புப் பிரிவின் கீழ் சேர்க்கை பெற விரும்பும் விண்ணப்பதாரர்கள் அதற்குரிய படிவத்தில் சமர்ப்பிக்க வேண்டும். இந்த விண்ணப்பத்துடன் கூடுதலாக 100 ரூபாய் கட்டணம் செலுத்த வேண்டும். சிறப்பு பிரிவினருக்கான பிரத்யேக படிவத்தை இணைக்காவிட்டால் அவ்விண்ணப்பதாரர்கள் சிறப்புப் பிரிவின் கீழ் கருதப்பட மாட்டார்கள்.

 

வயது விவரம்: 

அனைத்துப் பாடப்பிரிவுகளுக்கும், வரும் டிசம்பர் 31- ஆம் தேதியன்று விண்ணப்பதாரர்கள் 17 வயதை பூர்த்தி செய்திருக்க வேண்டும்.

 

பி.எஸ்சி., நர்சிங் படிப்பைப் பொருத்தவரை, வரும் டிசம்பர் 31- ஆம் தேதிப்படி ஓசி, பிசி, பிசிஎம், எம்பிசி, டிஎன்சி ஆகிய பிரிவுகளைச் சேர்ந்த விண்ணப்பதாரர் 30 வயது நிரம்பாதவராகவும், எஸ்.சி., எஸ்.சி.ஏ., எஸ்.டி., பிரிவினர் 35 வயது நிரம்பாதவராகவும் இருக்க வேண்டும்.

 

பி.ஏஎஸ்எல்பி., எனப்படும் ஆடியோலஜி மற்றும் ஸ்பீச் லாங்குவேஜ் பெத்தாலஜி படிப்பில் சேர விரும்பும் விண்ணப்பதாரர்கள் 1.7.2020ம் தேதி நிலவரப்படி 25 வயது பூர்த்தி ஆகாதவராக இருத்தல் அவசியம்.

nursing and b.pharm students apply now

கல்வித்தகுதி

பிளஸ்2 அல்லது அதற்கு இணையான வகுப்பில் தேர்ச்சி பெற்றிருக்க வேண்டும்.

 

மேல்நிலை வகுப்பில் இயற்பியல், வேதியியல், தாவரவியல் அல்லது விலங்கியல் பாடங்களை படித்திருக்க வேண்டும். அல்லது இயற்பியல், வேதியியல், உயிரியல், கணித பாடங்களை படித்திருத்தல் வேண்டும்.

 

இளங்கலை மருந்தாளுநர் (பி.ஃபார்ம்) மற்றும் பி.ஏஎஸ்எல்பி., படிப்புக்கு ஓ.சி., பி.சி., பி.சி.எம்., எம்.பி.சி., டி.என்.சி., பிரிவினர் இயற்பியல், வேதியியல், உயிரியல் அல்லது தாவரவியல் மற்றும் விலங்கியல் அல்லது கணித பாடங்களில் சராசரியாக 40 சதவீத மதிப்பெண்கள் அல்லது அதற்கு மேலும் பெற்றிருக்க வேண்டும். பட்டியல் சமூகத்தினர் மேற்கண்ட பாடங்களில் தேர்ச்சி பெற்றிருந்தால் போதுமானது.

 

பி.எஸ்சி., நர்சிங் படிப்பைப் பொருத்தவரை முதன்மைப் பாடங்களில் குறைந்தபட்சம் 45 சதவீத மதிப்பெண்கள் பெற்றிருத்தல் வேண்டும். பட்டியல் பிரிவினர் 40 சதவீத மதிப்பெண்கள் பெற்றிருக்க வேண்டும். இளங்கலை ஆப்டோமெட்ரி படிப்பில் சேர முதன்மைப் பாடங்களில் தேர்ச்சி பெற்றிருந்தால் போதுமானது.

 

பிளஸ்2வில் தொழில்கல்வி, திறந்தவெளி பள்ளிகள் மற்றும் தனித்தேர்வராக படிப்பை முடித்தவர்கள் துணை மருத்துவப் படிப்புகளுக்கு விண்ணப்பிக்க தகுதியற்றவர்கள்.

 

விண்ணப்பிப்பது எப்படி?

விண்ணப்பதாரர்கள் www.tnhealth.tn.gov.in மற்றும் www.tnmedicalselection.org ஆகியவற்றில் ஏதேனும் ஒரு இணையதளம் வழியாக விண்ணப்பிக்கலாம். ஆன்லைன் விண்ணப்பக் கட்டணம் 400 ரூபாய். இக்கட்டணத்தை வங்கி இணையதள சேவை மூலம் செலுத்த வேண்டும்.

 

பதிவிறக்கம் செய்த விண்ணப்பப் படிவத்தை முழுமையாக பூர்த்தி செய்த பின், மேற்கண்ட இணையதளத்தில் அக்.17- ஆம் தேதி மாலை 05.00 மணிக்குள் பதிவேற்றம் செய்ய வேண்டும். பதிவேற்றம் செய்த பின், விண்ணப்பத்தில் திருத்தங்கள் செய்ய முடியாது. முழுமையாக நிரப்பப்படாத விண்ணப்பங்களும் நிராகரிக்கப்படும்.

 

விண்ணப்பதாரர்கள், ஆன்லைனில் பதிவேற்றுவது மட்டுமின்றி பூர்த்தி செய்யப்பட்ட விண்ணப்பப் படிவத்தை தேவையான இணைப்புகளுடன் ஏ4 அளவுள்ள உறையில் வைத்து, 'செயலாளர், தேர்வுக்குழு, எண்.162, ஈ.வெ.ரா.பெரியார் நெடுஞ்சாலை, கீழ்ப்பாக்கம், சென்னை - 10' என்ற முகவரிக்கு மேற்கண்ட காலத்திற்குள் சேருமாறு தபாலில் அனுப்ப வேண்டும்.

 

மேலும் விவரங்களை மேலே குறிப்பிட்டுள்ள இணையதள தகவல் குறிப்பேட்டை பார்த்துத் தெரிந்து கொள்ளலாம். 


 

 

Next Story

 தமிழகம் முழுவதும் நாளை பள்ளிகளுக்கு விடுமுறை!

Published on 12/07/2024 | Edited on 12/07/2024
All over Tamil Nadu schools will have a holiday tomorrow

பள்ளி மாணவர்களுக்குக் கோடை விடுமுறை ஏப்ரல் இறுதியில்  தொடங்கி ஜூன் முதல் வாரத்தில் பள்ளிகள் மீண்டும் திறக்கப்படுவது வழக்கம். ஆனால் இந்த முறை நாடாளுமன்றத் தேர்தல் ஏப்ரல் மாதத்தில் வந்ததால், முன்கூட்டியே பள்ளிகளுக்கு விடுமுறை விடப்பட்டது. இதனைத் தொடர்ந்து ஜூன் 4 ஆம் தேதி நாடாளுமன்றத் தேர்தல் வாக்கு எண்ணிக்கை இருந்தாலும், வெப்ப அலையின் காரணமாகவும் ஜூன் முதல் வாரத்தில் திறக்க வேண்டிய பள்ளி ஜூன் 10 ஆம் தேதிக்குத் தள்ளிப்போனது. 

இந்த நிலையில்தான் திறப்பு விடுமுறை அளிக்கப்பட்ட தொடர்ந்து அதனை ஈடுசெய்யும் வகையில், நடப்பு ஆண்டில் அனைத்து சனிக்கிழமையும் பள்ளிகள் செயல்படும் எனப் பள்ளிக் கல்வித்துறை சார்பில் அறிவிக்கப்பட்டது.  இதனைத் தொடர்ந்து அனைத்து சனிக்கிழமையும் பள்ளிகள் செயல்பட்டு வரும் நிலையில் நாளை(13.7.2024) அனைத்து பள்ளிகளுக்கு விடுமுறை அறிவிக்கப்பட்டுள்ளது. பல்வேறு ஆசிரியர் சங்கங்கள் மாதத்தில் 2வது சனிக்கிழமை விடுமுறை அளிக்கவேண்டும் என்று முன்வைத்த கோரிக்கையை ஏற்று, நாளை பள்ளிக்கல்வித்துறை விடுமுறை அளித்துள்ளது. 

Next Story

‘பாதம் பட்ட இடம் யாவும் பாதை என்றே மாற்றிட ஓடு..’- வரலாறு படைத்த பழங்குடியின மாணவிகள்!

Published on 10/07/2024 | Edited on 10/07/2024
became the first tribal girl student to crack JEE and get into NIT
ரோகிணி - சுகன்யா

திருச்சி மாவட்டம், பச்சமலையை ஒட்டிய கிராமம் சின்ன இலுப்பூர். தேவையான மின் வசதி, கழிப்பிட வசதி, இணைய வசதி என எவ்வித அடிப்படை வசதிகளும் இல்லாத கிராமம்தான், இந்த சின்ன இலுப்பூர். இங்கு வாழும் பழங்குடி மக்களுக்கு விவசாயமே பிரதான தொழிலாக இருந்து வருகிறது. இந்த கிராமத்தைச் சேர்ந்தவர் மதியழகன். கேரளாவில் கூலி வேலை செய்கிறார். இவரது மனைவி வசந்தி. பச்சைமலையில் விவசாயம் செய்து வருகிறார். இந்த தம்பதியின் மூன்றாவது மகள், ரோகிணி.

இந்த கிராமத்தில் பழங்குடியின மக்களின் குழந்தைகள் பயில்வதற்காக அரசு உண்டு உறைவிட மேல்நிலைப்பள்ளி உள்ளது. இந்த பள்ளியில் பிளஸ்2 முடித்த மாணவி ரோகிணி, சமீபத்தில் ஜேஇஇ போட்டி தேர்வில் கலந்து கொண்டார். தாயுடன் வீட்டில் இருப்பதால் அம்மாவுக்கு உதவியாக வீட்டு வேலைகளையும் படிப்பு வேலைகளையும் அவரே பார்க்கவேண்டிய சூழல். இதனால் படிப்பில் சோர்ந்துபோகாத ரோகிணி, துடிப்புடன் படித்து வந்துள்ளார். இதைக் கவனித்த பள்ளி ஆசிரியர்கள், ரோகிணியை மேலும் படிக்குமாறு ஊக்குவித்துள்ளனர். தற்போது அதன் முடிவுகள் வெளியான நிலையில், ரோகிணி 73.8 சதவீத மதிப்பெண்கள் பெற்று சாதனை படைத்தார். இதனால் அவர் திருச்சி என்ஐடியில் கெமிக்கல் இன்ஜினியரிங் பிரிவில் சேர்ந்து பயில தேர்வாகி உள்ளார். இதன்மூலம், திருச்சி என்ஐடியில் படிக்கும் வாய்ப்பு பெற்ற முதல் பழங்குடியின மாணவி என்ற வரலாற்றை படைத்துள்ளார்.

இதுகுறித்து மாணவி ரோகிணி கூறும்போது, “மலைவாழ் மக்களுக்கான பள்ளியில் பிளஸ் டூ படித்து முடித்து ஜே.இ.இ தேர்வு எழுதினேன். அதில் தேர்ச்சி பெற்று, திருச்சி என்.ஐ.டியில் சேர்க்கை பெற்றுள்ளேன். பி.இ., கெமிக்கல் இன்ஜினியரிங் பாடப்பிரிவை தேர்வு செய்து உள்ளேன். என் படிப்புக்கான முழு செலவையும் தமிழக அரசு ஏற்றுக்கொண்டுள்ளது. பள்ளியில் படித்த போது என்ஐடி கெமிக்கல் ஆய்வகத்திற்கு என்னை அழைத்துச் சென்றனர். அப்போது ஏற்பட்ட ஆர்வத்தின் காரணமாக, ஆசிரியர்களிடம் என்.ஐ.டியில் சேர்க்கை பெற வேண்டும் என்று கேட்டேன். பள்ளியில் பிளஸ் டூ தேர்விலும் ஜேஇஇ தேர்விலும் தேர்ச்சி பெற்றதற்கு பள்ளி தலைமை ஆசிரியர் மற்றும் ஆசிரியர்கள் ஊக்கப்படுத்தி உதவி செய்தனர். என்னை ஊக்கப்படுத்திய ஆசிரியர்கள் பெற்றோர்கள் மற்றும் மேல்படிப்புக்கு உதவி செய்யும் முதல்வர் ஆகியோருக்கு என் நன்றியைத் தெரிவித்துக் கொள்கிறேன்” எனத் தெரிவித்தார்.

இதே போன்று, சேலம் மாவட்டம் கரியகோவில் வளவைச் சேர்ந்த பூச்சான்-ராஜம்மாள் ஆகியோரின் மகள் சுகன்யா. பழங்குடியின மாணவியான சுகன்யாவும் ஜேஇஇ நுழைவுத் தேர்வில் தேர்ச்சி பெற்றுள்ளார். இதன்மூலம் திருச்சி என்.ஐ.டியில் புரொடக்ஷன் என்ஜினியரிங் படிக்கும் வாய்ப்பை பெற்றுள்ளார். சில ஆண்டுகளுக்கு முன்பு ராஜம்மாள் இடி, மின்னல் தாக்கியதில் உயிரிழந்தையடுத்து, பெரியம்மா பராமரிப்பில் வளர்ந்து வருகிறார். அரசுப் பள்ளியில் பன்னிரெண்டாம் வகுப்பை முடித்தவர், தமிழக அரசு சார்பில் அளிக்கப்பட்ட இலவச நுழைவுத் தேர்விற்கான பயிற்சியில் கலந்துகொண்டார். இதையடுத்து, சேலத்தில் ஜேஇஇ நுழைவுத்தேர்வை எழுதி, மாநில அளவில் முதலிடம் பிடித்து அசத்தியுள்ளார்.

இந்நிலையில், ஜேஇஇ தேர்வில் வெற்றி பெற்ற சுகன்யாவிற்கு இசையமைப்பாளர் ஜிவி பிரகாஷ்குமார் தனது எக்ஸ் பக்கத்தில் வாழ்த்து தெரிவித்துள்ளார். அந்த பதிவில், "ஜேஇஇ நுழைவுத்தேர்வில் வென்று திருச்சி என்.ஐ.டி யில் பயில போகும் அன்புத்தங்கை சுகன்யா அவர்களுக்கு என் இதயம் கனிந்த நல்வாழ்த்துகள். "கல்வி ஆகச்சிறந்த செல்வம்" அது தமிழ்நாட்டில் உள்ள ஒவ்வொரு தங்கை, தம்பிகளுக்கும் கிடைக்கவேண்டும்" என்று பதிவிட்டுள்ளார்.

அதேபோல், திருச்சி கைலாசபுரத்தைச் சேர்ந்த கவினி என்ற மாணவி, ஜேஇஇ நுழைவுத்தேர்வில் வென்று கட்டிடக்கலை பிரிவை தேர்வு செய்துள்ளார். முத்தரசநல்லூரைச் சேர்ந்த மாணவி ரித்திகா கணினி அறிவியல் மற்றும் பொறியியல் படிப்பில் சேர்வதற்கும், பூலாங்குடியை சேர்ந்த மாணவி திவ்யாபிரீதா, கைலாசபுரத்தை சேர்ந்த தனுஷ் ராஜ்குமார் பங்காரு  ஆகியோர் புரொடக்ஷன் என்ஜினியரிங் பிரிவில் சேர்வதற்கும் திருச்சி என்ஐடி கல்லூரியில் பதிவு செய்துள்ளனர். கடந்த 60 ஆண்டுகளில் முதல்முறையாக பழங்குடியின மாணவர்கள் 6 பேர் தேர்வாகி உள்ளது குறிப்பிடத்தக்கது.