Skip to main content
Nakkheeran Magazine Nakkheeran Magazine

வழியெல்லாம் காதல்...

indiraprojects-large indiraprojects-mobile
It is all love on the way...


வரும் வழியில்
ஒரு காதல் தன் காதலியின் கைபிடித்து,
சாலையில் பறந்து கொண்டிருந்தது

இன்னொரு காதல்
பேருந்து நிறுத்தத்தின் நிழலில்
தன் காதலன் தோளில் சாய்ந்து
உலகை மறந்து கொண்டிருந்தது

பிறகொரு காதல்
தன் காதலி தன்னை நினைப்பதாய் நம்பி
சிரித்துக் கொண்டே தும்மியது
அடுத்தொரு காதல்
பெற்றோர் எதிர்ப்பை எண்ணி
காதலன் மடியில் விம்மியது

கடற்கரையில் ஒரு காமம்
தன்னைக் காதல் என்று சொல்லிக் கொண்டது
தனியறையில் ஒரு காதல்
காமம் மறந்து பேசிக் கொண்டது

கைபேசியில் ஒரு காதல்
கண்ணீர் விட்டுக் கெஞ்சிக் கொண்டிருந்தது
கண்ணீர் காண்டத்தை கடந்த ஒரு காதல்
கல்யாணக் கனவுகள் கண்டு கொண்டிருந்தது
கல்யாணக் காண்டத்தைக் கடந்த ஒரு காதல்
குழந்தையிடம் எரிந்து விழுந்தது

இன்னும் சொல்லாததன் கனத்தை
சுமந்து தவித்தது ஒரு காதல்
சொல்லிமுடித்து விட்ட சுகத்தில்
மிதந்து குதித்தது ஒரு காதல்

நட்புக்குள் சிக்கி
குழம்பிக் கொண்டிருந்தது ஒரு காதல்
நட்பையும் தாண்டி
துணையாய் சென்றது ஒரு காதல்

இப்படி...
வழியெல்லாம் நிறைந்திருந்த
காதல்களைக் கடந்து
தனியே நடந்து வந்த என்னை
பார்த்து சிரித்தபடியே மெல்ல விலகி 
தூரம் சென்று கொண்டிருக்கிறது...
என்னுள் இருந்து 
ஒரு காதல் !!!
 

உங்கள் கருத்தைப் பதிவு செய்யுங்கள்
Loading...