Skip to main content

"திருவாசகத்தை படித்துவிட்டு எண்ணத்தை மாற்றிய ஜி.யு.போப்" - தமிழ் வரலாறு பகிரும் நாஞ்சில் சம்பத்!

Published on 27/11/2021 | Edited on 27/11/2021

 

nanjil sampath

 

மேடைப்பேச்சாளரும் மூத்த அரசியல்வாதியுமான நாஞ்சில் சம்பத், 'தமிழும் சமயமும்' என்ற தலைப்பில் நக்கீரனிடம் பல்வேறு விஷயங்களைப் பகிர்ந்துவருகிறார். அந்தவகையில், மாணிக்கவாசகர் குறித்து அவர் பகிர்ந்துகொண்டவை பின்வருமாறு...

 

“திருமுறையும் திவ்ய பிரபந்தமும் தமிழின் தகுதியை உயர்த்தின. தமிழின் தகுதி உயர்ந்ததற்கு திருமுறையும் திவ்ய பிரபந்தமும்தான் காரணம் என்று சொன்னால் அதைப் பூரணமாக ஒப்புக்கொண்டுதான் ஆக வேண்டும். அதிலும் எட்டாவது திருமுறை முக்கியமானது. எட்டாவது திருமுறையில் திருவாசகமும் திருக்கோவையாரும் உள்ளன. மாணிக்கவாசகர் எழுதிய திருவாசகத்திற்கு ஈடான வாசகம் இன்பத்தமிழில் மட்டுமல்ல, உலக இலக்கியத்தில்கூட எங்கும் கிடைக்காது. அந்த திருவாசகத்தைப் படித்துவிட்டு இது எலும்பை உருக்குகிற பாடல் என்று ஜி.யு. போப் வியந்தார். திருவாசகத்திற்கு உருகாதார் ஒரு வாசகத்திற்கும் உருகார் என்பது தமிழ்நாட்டில் நாம் கேட்டுப் பழகிய மொழி. 

 

ஒருநாள், திருவாசகம் எழுதிய மாணிக்கவாசகர் முன்பு அந்தணர் வடிவில் வந்து சிவன் நிற்கிறார். அவர் சிவன்தான் என்று இவருக்குத் தெரியாது. உன்னுடைய திருவாசகத்தைச் சொல் என்று அவர் கூற, மாணிக்கவாசகரும் சொல்ல ஆரம்பிக்கிறார். மாணிக்கவாசகர் சொல்லச் சொல்ல அவர் பட்டோலையில் எழுதுகிறார். அதை நிறைவுசெய்த பின், அந்தணர் வடிவில் வந்த இறைவன் கோவை பாடு என்கிறார். உடனே மாணிக்கவாசகர் திருக்கோவையாரும் பாடுகிறார். அதையும் எழுதி முடித்த பிறகு, மாணிக்கவாசகர் சொற்படி, அழகிய சிற்றம்பலம் உடையான் என்று சிவபெருமான் தமிழில் கையெழுத்திட்டார். அதை சிதம்பரம் நடராஜர் வாசலில் வைத்துவிட்டு அந்தணர் காணாமல் போய்விடுகிறார். அடுத்த நாள், தில்லைவாழ் அந்தணர்கள் திருக்கோவிலுக்குப் பூஜை செய்வதற்காக கதவைத் திறக்கிறபோது அங்கே ஓலைச்சுவடி இருக்கிறது. அதைக் கண்டு, இதை யார் கொண்டுவந்து வைத்தது என அந்தணர்களுக்கு ஆச்சர்யமும் அதிர்ச்சியும். இதை மாணிக்கவாசகரிடம் காட்டி இது என்ன என்று அந்தணர்கள் கேட்டபோது இதுதான் திருவாசகமும் திருக்கோவையாரும் என்கிறார். உடனே, இதற்கு என்ன பொருள் என்று அவர்கள் கேட்கின்றனர். அதற்கு மாணிக்கவாசகர் தில்லை கூத்தன் சந்நிதிக்கு முன்னால் நின்றுகொண்டு, இதற்கு பொருளே இந்தத் தில்லைக்கூத்தன்தான் என்கிறார். அவர் கூறிய உடனேயே அங்கு ஒளிப்பிழம்பு தோன்றியது. அந்த ஒளிப்பிழம்பில் மாணிக்கவாசகர் கரைந்து போனார். 

 

மாணிக்கவாசகர் எழுதிய திருவாசகத்திலும் திருக்கோவையாறிலும் எல்லாம் வல்ல சிவபெருமானே கையெழுத்திட்டார் என்ற செய்தியைப் படிக்கிறபோது தமிழ், சமயத்திற்கு எவ்வளவு இடம் கொடுத்தது, சமயம் தமிழுக்கு எவ்வளவு இடம் கொடுத்தது என்பதை அறியமுடிகிறது. ஆனால், இன்று தமிழில் கையெழுத்து இடுவதற்கே இயக்கம் நடத்துகிறார்கள். எட்டாவது திருமுறையில் எல்லோருடைய நெஞ்சையும் உருக்கக்கூடிய திருவாசகத்திற்கு சிவனும் உருகினார். மதுரைக்கு அருகேயுள்ள திருவாதவூர்தான் மாணிக்கவாசகர் பிறந்த ஊர். அவர் பிறந்த இடமே இன்றைக்கு சிவனின் கோவிலாகிவிட்டது. அவர் தீட்சைப்பெற்ற இடமான திருப்பெருந்துறை இன்றைக்கு ஆவுடையார் கோவில். அந்தக் கோவிலைக் கட்டியவரே மாணிக்கவாசகர்தான். 

 

மதுரையில் மன்னராக இருந்து போருக்குத் தேவையான குதிரைகள் வாங்குவதற்காக வந்த இடத்தில் அந்தப் பணத்தைக் கொண்டு திருப்பெருந்துறை என்ற இடத்தில் சிவனுக்குக் கோவில் கட்டினார். இன்றைக்கு அந்தக் கோவில் ஆவுடையார் கோவில் என்று அறியப்படுகிறது. மாணிக்கவாசகர் காலத்தைத் திரும்பிப் பார்த்தால், சமயத்தின் கொடி உயர பறந்த காலத்தில் தமிழுக்கு தகுந்த மரியாதை இருந்தது என்பதை நாம் தெரிந்துகொள்கிறோம். உலகமே இன்றைக்குத் தமிழை மெச்சுகிறது என்றால் அதற்கு மாணிக்கவாசகரும் ஒருவகையில் காரணமாக இருந்தார். ‘பக்தி இலக்கியங்கள் லத்தீனில்தான் இருக்கின்றன என்று இதுவரைக்கும் நான் நினைத்துக்கொண்டிருந்தேன். ஆனால், தமிழில் இருப்பது போன்ற பக்தி இலக்கியங்கள் உலகத்தில் எந்த மொழியிலும் இல்லை’ என்று ஜி.யு. போப் கூறுவதற்கு திருவாசகமே முக்கிய காரணமாக இருந்தது.”

 

 

Next Story

இது கலாச்சார யுத்தம்; வெட்கி தலை குனியும் ஆளுநர்!

Next Story

“50 ரூபாய்க்கு சிங்கியடிச்ச ஜெய்ஷா...” - நாஞ்சில் சம்பத் தாக்கு

Published on 01/08/2023 | Edited on 01/08/2023

 

nanjil sampath interview about manipur issue and bjp

 

சமகால அரசியல் நிகழ்வுகள் குறித்து மூத்த திராவிட இயக்கப் பேச்சாளர் நாஞ்சில் சம்பத்திடம் பேட்டி கண்டோம். அப்போது அவர் நம்மிடம் பல்வேறு விஷயங்கள் குறித்து பகிர்ந்து கொண்டார். அதில் சிலவற்றை இங்கு தொகுத்துள்ளோம்..

 

“மணிப்பூர் பிரச்சனை என்பது ஒரு இனப்படுகொலை. இரட்டை எஞ்சின் ஆட்சியின் தோல்வி. பெண்களை நிர்வாணப்படுத்தி, பாலியல் வன்புணர்வு செய்து, 80 நாட்கள் பல்வேறு கொடுமைகளை அங்கு நிகழ்த்திய பிறகும் பிரதமர் அங்கு நேரில் சென்று பார்க்கவில்லை. ஆனால், இந்த 80 நாட்களில் அவர் எட்டு நாடுகளுக்கு சுற்றுப்பயணம் மேற்கொண்டிருக்கிறார். இதுவரை மக்களின் வரிப்பணத்திலிருந்து 400 கோடி ரூபாய் செலவழித்து 124 நாடுகளுக்கு அவர் பயணம் செய்திருக்கிறார். தன்னை விளம்பரப்படுத்திக் கொள்வதற்கு மட்டும்தான் இந்தப் பதவியை அவர் பயன்படுத்துகிறார். நாட்டு மக்களின் சுக துக்கங்களைத் தீர்மானிப்பதற்கு அவர் முன்வரவில்லை.

 

இந்திய வரலாற்றில் பாராளுமன்றத்துக்கு வராத பிரதமர், நரேந்திர மோடி மட்டும்தான். எதிர்க்கட்சிகளின் கேள்விக்கு அவர் பதில் சொல்ல வேண்டும். சபை இவ்வளவு நாட்கள் முடக்கப்பட்ட பிறகு, இப்போது சிபிஐ விசாரணை என்று பொய் சொல்கிறார்கள். போலீசாரிடமும் ராணுவத்தினரிடமும் இருக்கும் துப்பாக்கி, வன்முறையாளர்களிடம் வந்தது எப்படி? குறைந்தபட்சம் தன் பதவியை ராஜினாமா செய்கிறேன் என்று கூட அந்த மாநில முதலமைச்சர் சொல்லவில்லை. அண்ணாமலையின் யாத்திரை முடியும்போது பாஜகவுக்கு தமிழ்நாட்டு வாக்காளர்கள் முடிவுரை எழுதி விடுவார்கள். மோடியின் சாதனைகள் என்ன?

 

இந்திய நாட்டின் முக்கியமான மொழிகளை ஆட்சி மொழியாக இவர்களால் அறிவிக்க முடியவில்லை. 1000 ரூபாய் செல்லாது என்று சொல்லிவிட்டு 2000 ரூபாயை அறிமுகப்படுத்தினார்கள். இந்தியப் பணத்துக்கு இன்று உலக அளவில் மரியாதை கிடையாது. பாராளுமன்றத் தேர்தலில் திமுக மிகப்பெரிய வெற்றி பெறும். திமுகவை மிகப்பெரிய ஊழல் கட்சி என்கிறார் அமித்ஷா. அவருடைய மகன் ஜெய்ஷாவிடம் கேட்டால் ஊழல் என்றால் என்ன என்பது தெரிந்துவிடும். 50 ரூபாய்க்கு சிங்கி அடித்த ஜெய்ஷா இன்று 50 ஆயிரம் கோடிக்கு அதிபதியாக இருக்கிறார். கிரிக்கெட் சங்க பதவி அவருக்கு எப்படி கிடைத்தது?

 

ராகுல் காந்திக்கு சென்ற இடமெல்லாம் மக்களின் வரவேற்பு கிடைக்கிறது. இந்தியா கூட்டணியைப் பார்த்து பாஜக இன்று பயந்து போயிருக்கிறது. எந்தவித ஆசாபாசமும் இல்லாமல் இந்திய நாட்டின் நலனுக்காக காங்கிரஸ் கட்சி புதிய அவதாரம் எடுத்திருக்கிறது. அந்தக் கட்சியின் தலைவர் ராகுல் காந்தியைப் பிரதமராக்க வேண்டியது இந்த நாட்டின் கடமை. மோடிக்கு முடிவுரை எழுதுவதற்கு நாடு தயாராகி விட்டது. தமிழ்நாட்டில் ஏதாவது ஒரு தொகுதியில் தங்களால் வெல்ல முடியும் என்று பாஜகவால் சொல்ல முடியுமா? பிரதமருக்கு தக்காளி விலை என்னவென்று தெரியுமா? 

 

பல மாநிலங்கள் சேர்ந்தது தான் இந்தியா. ஆனால் மாநிலங்களே இருக்கக் கூடாது என்று பாஜக நினைக்கிறது. ஒரே நாடு, ஒரே கலாச்சாரம், ஒரே பண்பாடு என்று கொண்டுவர நினைக்கிறார்கள். இதனால் இந்தியாவின் பன்முகத்தன்மை பாதிக்கப்பட்டுள்ளது. பொது சிவில் சட்டம் கொண்டுவரும் நாளில் மக்கள் இவர்களுக்கு குழிதோண்டி விடுவார்கள். மத்தியப்பிரதேசத்தில் மக்கள் வாக்களித்தது காங்கிரஸ் கட்சிக்கு. ஆனால் எம்.எல்.ஏக்களை விலைக்கு வாங்கி பாஜக ஆட்சிக்கு வந்தது. இவர்கள் இப்போது தமிழ்நாட்டில் நடத்துவது யாத்திரை அல்ல, உல்லாசப் பயணம். இதை மக்கள் ஒருபோதும் ஏற்றுக்கொள்ள மாட்டார்கள்”.