Skip to main content

விபூதி பூசுவதால் ஏற்படும் நன்மைகள்; விபூதி பற்றிய சுவாரசிய தகவல்கள்

Published on 13/02/2023 | Edited on 13/02/2023

 

Benefits of applying vibhuti; Interesting facts about Vibhuti

 

கோவிலில் இறைவனை தரிசனம் செய்த பிறகு பிரசாதமாக விபூதி கொடுக்கப்படுகிறது. விபூதி கொடுத்து ஆசீர்வாதம் செய்வது காலங்காலமாய் நடைமுறையில் இருக்கக்கூடிய ஒரு வழக்கம். கோவில்களில் இந்த மரபு இன்றும் வழக்கில் இருந்து வருகிறது. இந்த விபூதியை அணிந்து கொள்பவர்களை தீமைகளிலிருந்து காப்பாற்றும் கவசமாக இருந்து பிரச்சினைகளைப் போக்கி செல்வத்தைத் தருவதாக நம்பப்படுகிறது.

 

விபூதி என்றால் ஐஸ்வர்யம் என்று பொருள். விபூதி என்னும் சொல்லுக்கு மகிமை என்றும் பொருளுண்டு. விபூதியை நாம் தரித்துக்கொள்ளும்பொழுது கிழக்கு பார்த்தோ அல்லது வடக்கு திசை பார்த்தோ அணிந்துகொள்ள வேண்டும். வலக்கையின் நடுவிலுள்ள மூன்று விரல்களால் விபூதியை பவ்யமாக எடுத்து தலையை நிமிர்த்தி அணிந்துகொள்ள வேண்டும். காலையிலும், மாலையிலும் கோவிலுக்குச் செல்லும்பொழுதும், இரவு படுக்கப் போகும் முன்பும் விபூதி போட்டுக் கொள்ளலாம்.

 

விபூதி பூசும்பொழுது வெள்ளை நிற விபூதி மட்டுமே பயன்படுத்த வேண்டும். விபூதியைப் பயன்படுத்தும்பொழுது நடந்து கொண்டோ, படுத்துக் கொண்டோ பயன்படுத்தக் கூடாது. ஆசாரியார், சிவனடியார்களிடமிருந்து விபூதி வாங்கும்பொழுது அவர்களை வணங்கி வாங்கவேண்டும். வாயைத் திறந்து கொண்டும், பேசிக்கொண்டும் திருநீறு பூசக்கூடாது.

 

விபூதி, இரட்சை, சாரம், பஸ்மம், பசிதம், திருநீறு என பல பெயர்களில் அழைக்கப்படுகிறது. விபூதியை தண்ணீரில் குழைத்து நெற்றியில் பூசினால் கபாலத்தில் உள்ள நீர் வற்றி பல வியாதிகள் தீருமென்பது இன்று வரைக்கும் இருக்கக் கூடிய ஒரு நம்பிக்கை. திருநாவுக்கரசு சுவாமிகளுக்கு வயிற்றுவலி ஏற்பட்டபொழுது, அவருடைய தமக்கையார் வயிற்றில் விபூதி பூசி குணமடையச் செய்த வரலாறு பெரிய புராணத்தில் உள்ளது.

 

விபூதியை உச்சியில் தரிப்பதன் மூலமாக கண்டத்துக்கு மேல் செய்த பாவம் நீங்குமெனவும், விபூதியை நெற்றியில் தரிக்கும்பொழுது நான்முகனால் எழுதப்பட்ட கெட்ட எழுத்துகளின் தோஷம் நீங்குமெனவும், விபூதியை மார்பில் தரிக்கும்பொழுது மனதினால் செய்த குற்றம் விலகுமெனவும், விபூதியை நாபியில் தரித்தால் பீஜத்தினால் செய்த தோஷம் நீங்குமெனவும் சொல்லப்படுகிறது.

 

விபூதியை முழந்தாள்களில் தரித்தால் கால்களால் செய்த பாவம் நீங்குமெனச் சொல்லப்படுகிறது. விபூதியை முதுகின் கீழுள்ள முச்சந்தியில் தரித்தால் சூதத்தினால் செய்த பாவம் விலகுமெனவும், விபூதியை புயங்களில் தரித்தால் அந்நிய மாதரிடம் தவறாக நடந்த பாவம் நீங்குமெனவும், நம்முடைய கையிலுள்ள கட்டை விரலால் விபூதியைத் தொட்டு அணியும்போது தீராத சிலவகை நோயானது நம்மிடம் வந்து சேரும் எனவும் சொல்லப்படுகிறது.

 

நம்முடைய சுட்டுவிரல் மூலமாக விபூதியை எடுத்துப் பூசும்பொழுது பொருட்கள் நாசம் ஏற்படுமெனச் சொல்லப்படுகிறது. நம்முடைய நடுவிரல் கொண்டு விபூதி எடுத்துப் பூசும்பொழுது வாழ்க்கையில் நிம்மதியில்லாத சூழல் ஏற்படுமாம். சுண்டு விரலைக்கொண்டு விபூதியை எடுத்துப் பூசும்பொழுது நம்முடைய வாழ்க்கையில் ஏற்படும் கிரக தோஷங்களுக்கு அதிக தாக்கத்தை ஏற்படுத்தும் என்கிறார்கள்.

 

மோதிர விரல் மற்றும் கட்டைவிரல் சேர்த்தபடி விபூதி எடுத்துப் பூசும்பொழுது, இந்த உலகம் நம் வசம் வரும். நாம் செய்யக் கூடிய எந்தவொரு செயலும், முடிவும், முயற்சியும் மிகப்பெரிய வெற்றியாகும் எனச் சொல்லப்படுகிறது. கோவிலில் இறைவனை தரிசித்ததும் விபூதி பிரசாதத்தை வாங்கும்போது இடக்கையைக் கீழேவைத்து வலக்கையை மேலே வைத்து வாங்கவேண்டும்.

 

விபூதியை இடக்கையால் வாங்கவோ அணியவோ கூடாது என்பது சாஸ்திரமாகக் கடைப்பிடிக்கப்பட்டு வருகிறது. விபூதியை இரு புருவங்களுக்கிடையில் வைக்கும்பொழுது அது மூளை நரம்புகளைத் தூண்டுகிறது. நினைவாற்றலை அதிகரிக்கிறது. அதிர்வுகளை உள்வாங்கும் சக்தி விபூதிக்குண்டு எனச் சொல்லப்படுகிறது. மிகவும் சிறந்த கிருமி நாசினியாகவும், நெற்றியில் வடியும் வியர்வையை உறிஞ்சும் தன்மை கொண்டதாகவும் விபூதியைச் சொல்கிறார்கள்.

 

கிராமங்களில் பிறந்த குழந்தைக்கு தலைக்கு குளிப்பாட்டியதும் உச்சந்தலையில் விபூதி வைப்பார்கள். இப்படி வைக்கும் பொழுது அந்த விபூதி தலையில் இருக்கக் கூடிய ஈரத்தை உறிஞ்சிக்கொள்ளும் என்பதை அன்றே நம்முடைய முன்னோர்கள் கண்டறிந்து அதை ஆன்மிகத்தோடு தொடர்புபடுத்திக் கொண்டுள்ளார்கள். திருமணமாகாத பெண்கள் விபூதியைக் கழுத்தில் பூசி வரும்பொழுது விரைவில் கழுத்தில் மாங்கல்யம் அணியும் பாக்கியம் கிட்டுமென சொல்லப்படுகிறது.

- கவிதா பாலாஜிகணேஷ்

 

 

Next Story

குபேர வாழ்வருளும் குடமுழுக்கு தரிசனம்!

Published on 19/10/2023 | Edited on 19/10/2023

 

 A vision of the life of Kubera!

 

எங்கே தெய்வம் இருக்கிறதோ அங்கே அருள் இருக்கிறது. தெய்வம் இருக்குமிடமே கோவில். ஊரென்று ஒன்றிருந்தால் அங்கே கோவிலென்று ஒன்றிருக்க வேண்டும்."கோ' என்றால் இறைவன். "இல்' என்றால் இல்லம். அதாவது இறைவன் குடிகொண்டிருக்குமிடமே "கோவில்' என்பதாகும்.

 

கடவுளுக்குக் கோவில் கட்டி கும்பாபிஷேகம் செய்து, அவரை வணங்கி ஆறுகால பூஜையும் செய்யவேண்டும். நாம் நமக்கு ஒரு வீடு கட்டிய பின்பு எப்படி கிரகப் பிரவேசம் செய்கிறோமோ அப்படி கோவிலுக்கு கும்பாபிஷேகம் என்பது முக்கியமானது. கும்பாபிஷேகம் முடிந்த பின்பு ஆன்மீகப் புராணச் சொற்பொழிவுகள், இசை நிகழ்ச்சிகள், இறைவன் மீதானதை குறைந்தபட்சம் 48 நாட்களாவது நடத்தவேண்டும்.

 

மந்திரங்களால் சக்தியூட்டப்பட்ட கும்பங்களிலுள்ள நீரைக் கோவில் உச்சியிலுள்ள கலசங்களுக்கு அபிஷேகம் செய்து, ஆராதனை செய்யவேண்டும். கும்பாபிஷேகம் பலவகைப்படும். புதிதாகக் கட்டப்பட்ட ஆலயத்துக்குச் செய்யப்படும் கும்பாபிஷேகம் "ஆவர்த்தம்' என்றழைக்கப்படும். வெகுநாட்களாகப் பூஜையின்றி கேட்பாரற்றுக்கிடந்த கோவிலை புனரமைப்பு செய்து கும்பாபிஷேகம் செய்வது "அனவர்த்தம்' என்றழைக்கப்படும். ஒரு முக்கியமான இடம் மட்டும் புனரமைப்பு செய்வது "புனராவர்த்தம்' என்பதாகும். ஆலயத்தில் தகாத செயல் நடந்துவிட்டால் புனரமைப்பு செய்யும் கும்பாபிஷேகம் "அந்தரிதம்' எனப்படும்.

 

"கும்பம்' என்பது உடலாகும். கும்பத்தின் மீது சுற்றப்பட்ட நூல் நாடி நரம்புகளாகும். உள்ளே ஊற்றப்படும் நீர் ரத்தத்தையும், அதனுள் போடப்படும் தங்கம் ஜீவனையும், மேல் வைக்கப்படும் தேங்காய் தலையையும், உள்ளே போடப்படும் தானியம் ஆசனத்தையும் குறிக்கும். இதில் செய்யப்படும் விக்ரகப் பூஜையானது அனுக்ஞை, சங்கல்பம், பாத்திர பூஜை, கணபதி பூஜை, பஞ்சகவ்யம், வாஸ்து சாந்தி, மிருத்சங்கிரஹணம், அங்கு ரார்ப்பணம், ரக்ஷாபந்தனம், கும்ப அலங்காரம், கலாகர்ஷணம் என்று பலவகை உள்ளன.

 

அதேபோல யாகசாலையிலுள்ள குண்டங்கள் ஏககுண்டம், பஞ்சாக்னி குண்டம், நவாக்னி குண்டம், உத்தமபக்ஷம் என்று அழைக்கப்படுகின்றன. இந்த குண்டங்கள் தெய்வங்களைப் பொருத்து மாறுபடும். மேற்சொன்ன ஒவ்வொன்றும் ஒவ்வொரு காரணத்தை வைத்தே செய்யப்படுகின்றன. "பூர்ணாஹுதி' என்பது யாகத்தைப் பூர்த்தி செய்வதாகும். கும்பாபிஷேகம் முடிந்தபின்பு மூல விக்ரகங்களுக்கு முறைப்படி அபிஷேகம், அலங்காரம் செய்து, பூஜை, நிவேதனம், கற்பூர தீப ஆரத்தி செய்து, 48 நாட்கள் விசேஷ அபிஷேகம் செய்து மூலவரை முழுசக்தி பெறச் செய்ய வேண்டும்.

 

கோவில் கட்டி கும்பாபிஷேகம் செய்பவர்கள், ஹோம மந்திரங்களைக் காதால் கேட்பவர்கள், தெய்வத்தையும், ஆலயத்தையும், கும்பாபிஷேகத்தையும் பார்ப்பவர்கள் என பலதரப்பட்டவர்களும் நீண்ட ஆயுள், கல்வி, உடல் ஆரோக்கியம், நன்மக்கட்பேறு, நிறைந்த செல்வம் அனைத்தையும் அடைவார்கள். கும்பாபிஷேகத்திற்கு நன்கொடையாக பொருள் கொடுத்தால் புண்ணியம் சேரும். இதனால் நமக்கு நல்ல பதவி கிடைக்கும். இது மறுமைக்கு நாம் சேர்த்து வைக்கும் அருள் சேமிப்பாகும்.

 

கும்பாபிஷேகத்தின் கடைசியில் வைதீகர்கள் ஆசிர்வாதம் என்ற மந்திரத்தை ஓதுவார்கள். அப்போது பக்தர்கள் அனைவரும் அமைதியாக இருக்க வேண்டும். ஒவ்வொரு மந்திரம் முடிந்ததும் "ததாஸ்து' என்று வைதீகர்கள் சொல்வார்கள். "ததாஸ்து' என்றால் "அப்படியே ஆகட்டும்' என்பது பொருள் இதைச் சொல்லும் போது நாம் ஏதாவது தவறானவற்றைப் பேசினாலோ, நினைத்தாலோ அது அப்படியே ஆகி விடும். மேலுள்ள "அஸ்து' தேவதைகள் நமக்கு அருள் பாலிப்பதால், நாம் நல்லது சொன்னால் நல்லது நடக்கும். எனவே நல்லதே நினைத்து நன்மை பெறவேண்டும்.

 

கும்பாபிஷேகத்தன்று நாம் அந்த ஆலயத்திலிருந்து தரிசித்தால் முப்பத்து முக்கோடி தேவர்களும், மாமுனிவர்களும், ரிஷிகளும் நம்மை ஆசிர்வதிப்பார்கள். இந்த ஆசிர்வாதத்தால் நாம் சகல ஐஸ்வர்யங்களையும் பெற்று மகிழ்ச்சியோடு வாழலாம். நாடும் நலம்பெறும்.

 


 

Next Story

மங்கலம் பொழியும் மகா சிவராத்திரி; விரதமும் பலனும்!

Published on 18/02/2023 | Edited on 18/02/2023

 

Auspicious Maha Shivratri; Fasting and benefits!

 

மனித மனம் மண், பொன், பெண் ஆகிய மூவாசைகளையும் சுற்றியே அலைபாய்கிறது. மனித வாழ்வுக்கும் அஸ்திவாரமாக இந்த மூன்று ஆசைகளே விளங்குகின்றன. ஒவ்வொருவரின் மனமும் செல்வத்தில் அந்தஸ்தில் புகழில் மற்றவர்களைக் காட்டிலும் தான் சிறந்து விளங்க வேண்டுமென்று போராடுகிறது. பிறக்கும் போதே ஒருவர் செல்வச் செழிப்பான பெற்றோருக்கு பிறப்பதற்கும் ஏழ்மையில் வாடும் பெற்றோருக்கு பிறப்பதற்கும் அவரவரின் ஊழ்வினையே காரணம். முன் ஜென்ம ஊழ்வினையை அறுக்க ஒவ்வொருவரும் பல வழிகளையும் தேடி அலைகிறார்கள்.

 

ஊழ்வினையிலிருந்து மீண்டு இறைவனை அடைய நம் முன்னோர்கள் பல்வேறு வழிகளை போதித்துள்ளார்கள். உலகிலுள்ள மதங்களில் எந்தவித கட்டுப்பாடுமில்லாமல் எந்தவகையில் பூஜித்தாலும் இறைவன் ஏற்றுக்கொள்வார் என்னும் நம்பிக்கையுள்ள ஒரே மதம் இந்து மதம். கர்மவினையைத் தீர்த்து பிறவா நிலையடைய இந்து மதத்தில் நான்குவித உபாயங்கள் கூறப்பட்டுள்ளன.

 

நமது இல்லத்தில் இறைவனை ஆத்மார்த்தமாய் வழிபடுவதுடன் கோவில்களுக்கு சென்று இறைவனை துதித்துப் பாடுவது; மலர்மாலை தொடுப்பது; சந்தனம் அரைத்துக் கொடுப்பது போன்ற இறைப்பணிக்கு உதவுதல். திருக்கோவிலில் மெழுகிடுதல்; தூய்மை செய்வது போன்ற உழவாரப்பணிகள் செய்து வணங்குதல் யாவும் சரியான வழியாகும்.

 

ஒருவர் தன் வாழ்நாளில் மிகுதியான சிரமத்தை அனுபவிப்பதற்கு ஜாதகத்திலுள்ள தோஷங்களே காரணம். அத்தகைய தோஷங்களை அழிக்கும் வல்லமை பெற்றவர் சிவபெருமான். தன்னை வணங்குபவர்களின் மனதிலிருக்கும் கெட்ட எண்ணக்கழிவுகளான காமம், கோபம், குரோதம், பேராசை, பொறாமை போன்ற கெட்ட கர்மவினைக் கழிவுகளை அழிப்பவர். அவரை வழிபடுபவர்களின் வாழ்வில் நிலவும் நோய்கள், மனக்கவலைகள், வறுமைநிலை போன்றவற்றை அறவே அழிப்பவர்.

 

ஒருவர் தனது மூன்று பிறவிகளில் செய்த பாவங்களையும் அழிப்பவர் சிவபெருமான். சிவன் என்ற சொல்லுக்கு மங்களம், இன்பம் என்று பொருள். ஒருவர் தன் வாழ்வில் வினைப்பயனை அழிக்க எட்டுவிதமான சிவ வழிபாட்டு முறைகளைக் கடைபிடிக்கலாம் என சாஸ்திரத்தில் கூறப்பட்டுள்ளது. அவற்றுள் மிகச்சிறப்பு வாய்ந்ததாகக் கருதப்படுவது மாசிமாத தேய்பிறை சதுர்த்தசி திதியன்று வரும் மகா சிவராத்திரி விரதமாகும். சிவராத்திரி என்றால் ஒளிமயமான இரவு; இன்பம் தருகின்ற இரவு என்று பொருள்.

 

குளிர்ந்த நீரில் குளித்து, நெற்றியில் திருநீறு பூசி, கடவுள் படம் முன் விளக்கேற்றி, சிவராத்திரி விரதத்தைத் தொடங்க வேண்டும். சிவராத்திரி விரதத்தை முதல் நாளே தொடங்கிவிட வேண்டும். விரதமிருப்போர் ஒருவேளை மட்டுமே உணவுண்ண வேண்டும். சிவராத்திரி நாளில் சமைத்த உணவை உண்ணாமல், சிவ சிந்தைனையுடன் இருக்க வேண்டும். தண்ணீர் மட்டும் அருந்தலாம். பகல் மற்றும் இரவு முழுவதும் எதுவும் சாப்பிடக் கூடாது. வயதானவர்கள், நோயாளிகள் சமைக்காத உணவுகளான பழங்கள், அவல் சாப்பிடலாம்.

 

மகா சிவராத்திரியன்று முழுவதும் மௌன விரதமிருந்து, மனதுக்குள் பஞ்சாட்சரமாகிய ‘ஓம் நமசிவாய’ மந்திரம் சொல்வதால் புண்ணியப்பலன் மிகுதியாகும். கோவில்களில் நடைபெறும் நான்கு கால அபிஷேக பூஜைகளில் கலந்துகொண்டு சிவனை வழிபட வேண்டும். மறுநாள் காலையில் நீராடி, பகல் முழுவதும் உறங்காமலிருந்து விரதத்தை முடித்தால், சகல வினைகளும் நெருப்பில் விழுந்த தூசிபோல் உடனே சாம்பலாகும்.

 

வயதானவர்கள், குழந்தைகள், கோவிலுக்குச் செல்ல முடியாமல் உடல்நலக் குறைவோடு இருப்பவர்கள் சிவபுராணம், வில்வாஷ்டகம் படித்து, வில்வத்தால் சிவபூஜை செய்தால் அந்த நிமிடமே அவர்களுடைய அனைத்துப் பாவங்களும் நீங்கும். அசுவமேத யாகம் செய்த பலன் கிட்டும். பஞ்சமகா பாதகங்கள் அகலும்.

 

மகா சிவராத்திரியன்று விரதமிருப்பவர்களுக்கு நற்கதி கிடைப்பதுடன் சொர்க்கலோக பாக்கியமும் கிடைக்கும் என்பது நம்பிக்கை. ஒருவர் தொடர்ந்து 24 வருடங்கள் சிவராத்திரி விரதம் கடைப்பிடித்து வந்தால் அவர் சிவகதியை அடைவதுடன், அவரது 21 தலைமுறைகளும் நற்கதியடைந்து முக்தியடைவார்கள் என்பது ஐதீகம். அசுவமேத யாகம் செய்த பலனும் கிடைக்கும்.

 

உணவுண்ணாமல் பசியை அடக்குவதன் மூலம் காமம், குரோதம், கோபம், பேராசை, பொறாமை ஆகியவற்றிலிருந்து விடுதலை கிடைக்கும். எல்லாருக்கும் இந்த மகா சிவராத்திரி விரதமிருக்கும் பாக்கியம் கிட்டாது. அவனருளாலே "அவன் தாள் வணங்கி' என்றபடி, அவன் (சிவன்) அருள் இருந்தால் மட்டுமே இந்த மகா சிவராத்திரி விரத வாய்ப்பு கிட்டும். வாழ்வில் செல்வம், வெற்றி ஆகியவற்றைப் பெற விரும்புவோர் அவசியம் மகா சிவராத்திரி விரதம் கடைப்பிடிக்க வேண்டும்.

 

பிரசன்ன ஜோதிடர் ஐ. ஆனந்தி