உலக அளவில் வர்த்தகத்தில் குறைந்த ஸ்மார்ட் ஃபோன்கள்... இந்தியாவில் மட்டும் அதிகரிப்பு...

உலக அளவில் ஸ்மார்ட் ஃபோன்களின் வர்த்தகம் 4.9% குறைந்துள்ளது. ஆனால் இந்தியாவில் மட்டும் 10% அதிகரித்துள்ளது. சர்வதேச தரவு நிறுவனம் சார்பில் சமீபத்தில் நடத்தப்பட்ட ஆய்வில் இந்த தகவல் தெரியவந்துள்ளது.

இந்நிறுவனம் நடத்திய ஆய்வில் 2018-ம் ஆண்டின் நான்காவது காலண்டில் 375.4 மில்லியன் ஸ்மார்ட் ஃபோன்கள் எனும் எண்ணிக்கையின் அடிப்படையிலே வர்த்தகம் நடைபெற்றுள்ளது. இது கடந்த 2017-ம் ஆண்டின் நான்காவது காலாண்டில் நடந்த வர்த்தகத்தைவிட 4.9% குறைவு என்பதும் அந்த ஆய்வு தெரிவித்துள்ளது. அதேபோல் 2018-ம் ஆண்டில் மொத்தமாக 1.4 பில்லியன் ஸ்மார்ட் ஃபோன்கள் எனும் எண்ணிக்கையின் அடிப்படையில் வர்த்தகம் நடைபெற்றுள்ளதாகவும் தெரிவிக்கப்பட்டுள்ளது.

ஆனால், இந்தியாவில் மட்டும் 10% அதிகமாக வர்த்தகம் நடைபெற்றுள்ளது என அந்த ஆய்வின் முடிவுகள் தெரிவிக்கிறது. 2017-ம் ஆண்டில் 132 மில்லியன் ஸ்மார்ட் ஃபோன்கள் வர்த்தகமானதாகவும், அதுவே கடந்த 2018-ம் ஆண்டில் அந்த எண்ணிக்கை 145.2 மில்லியனாக இருக்கிறது எனவும் அந்த ஆய்வின் முடிவில் தெரியவந்துள்ளது.