கனடா நாட்டில் உள்ள ஆல்பெர்ட்டா பகுதியைச் சேர்ந்தவர் ஸெரா ஸ்மால். இவர் அந்தப் பகுதியில் உள்ள ஹாக்கி அணியில் விளையாடி வருகிறார். அதேபோல், ஆல்பெர்ட்டாவில் உள்ள தொடக்கப்பள்ளியில் ஆசிரியையாகவும் பணியாற்றி வருகிறார்.
இந்நிலையில், சில தினங்களுக்கு முன்னர் ஹாக்கி போட்டியில் கலந்துகொண்ட அவர், இடைவேளை நேரத்தில் ஓய்வறைக்கு சென்று தனது 8 மாதக் குழந்தைக்கு தாய்ப்பால் கொடுத்துள்ளார். அப்போது எடுத்த படத்தை தாய்ப்பால் ஆலோசகருக்கு ஸ்மால் அனுப்ப, அவர் தாய்ப்பால் விழிப்புணர்வு குறித்த முகநூல் பக்கத்தில் அதைப் பகிர்ந்துள்ளார். இந்தப் புகைப்படம் பலரிடத்திலும் பாராட்டைப் பெற்றுள்ளது.
‘எல்லா அம்மாக்களும் செய்வதைத்தான் நானும் செய்திருக்கிறேன். என் குழந்தையின் தேவையைப் பூர்த்தி செய்வதில் அளவுகடந்த மகிழ்ச்சி அடைகிறேன்’ எனக்கூறும் ஸ்மால், ‘தாய்ப்பால் கொடுப்பது மிக அத்தியாவசியமானது’ எனவும் தெரிவித்துள்ளார்.