ஒன்றல்ல, இரண்டல்ல... 12 முறை கரோனா பரவல் குறித்து எச்சரித்த புலனாய்வுத்துறை.. கண்டுகொள்ளாத அதிபர்...

கடந்த ஜனவரி முதல் பிப்ரவரி மாதத்தில் அமெரிக்காவின் மத்திய புலனாய்வு அமைப்பான சிஐஏ கரோனா தொற்று குறித்து 12 முறை எச்சரித்ததாகவும், அதனை அமெரிக்க அதிபர் ட்ரம்ப் உதாசீனம் செய்ததாகவும் தகவல்கள் வெளியாகியுள்ளன. இதுகுறித்து வாஷிங்டன் போஸ்ட்டில் வெளியாகியுள்ள செய்தியில், ஜனவரி மற்றும் பிப்ரவரி மாதங்களில் தினமும் காலையில், கரோனா பரவல் குறித்த தகவல்கள், அமெரிக்காவில் அது பரவுவதற்கான சாத்தியக்கூறுகள் ஆகியவை அடங்கிய கோப்புகள் அதிபரின் பார்வைக்கு வைக்கப்பட்டும், அதனை ட்ரம்ப் தொடர்ந்து புறக்கணித்து வந்ததாகத் தெரிவிக்கப்பட்டுள்ளது. மேலும், கரோனா வைரஸ் குறித்த பல முக்கியத் தகவல்களைச் சீனா மறைத்து வருகிறது என்றும் அமெரிக்க அதிபருக்கு எச்சரிக்கை கொடுக்கப்பட்டுள்ளது. இருப்பினும் அதனையும் அவர் கண்டுகொள்ளவில்லை எனத் தெரிவிக்கப்பட்டுள்ளது.