புனே டூ கோவை..... கொடிக்கட்டி பறக்கும் விவகாரம் - காப்பு மாட்டிய காவல்துறை!

கோவை மாநகரம், உக்கடம் காவல் நிலைய எல்லைக்குட்பட்ட சுங்கம் பைபாஸ் சாலையில் ரோந்துப் பணியில் ஈடுபட்டிருந்த போலீசார், சந்தேகத்திற்கிடமாக நின்று கொண்டிருந்த ஒருவரைப் பிடித்து விசாரித்தனர். விசாரணையில் அவர் கோவைப்புதூரைச் சேர்ந்த முகமது தாரிக் (வயது 32) என்பதும், போதை மாத்திரை விற்பனையில் ஈடுபட்டு வந்ததும் தெரியவந்தது.

உடனடியாக அவரைக் கைது செய்த போலீசார், அவரிடமிருந்து 1,470 போதை மாத்திரைகளைப் பறிமுதல் செய்தனர். தொடர்ந்து நடத்திய விசாரணையில், புனேவில் உள்ள ஒரு மருந்துக் கடையில் குறைந்த விலைக்கு இந்த மாத்திரைகளை வாங்கி, கோவைக்குக் கடத்தி வந்து அதிக விலைக்கு விற்பனை செய்து வந்தது தெரியவந்தது. மேலும், இவர் மீது ஏற்கனவே கஞ்சா மற்றும் போதைப்பொருள் வழக்குகள் நிலுவையில் இருந்த நிலையில், அவரை நீதிமன்றத்தில் ஆஜர்படுத்தி சிறையில் அடைத்தனர்.

இதேபோல், பெங்களூரு பகுதியிலிருந்து மெத்தாம்பெட்டமைன் (Methamphetamine) எனப்படும் உயர்தர போதைப்பொருள் கோவைக்குக் கடத்தப்படுவதாக மத்திய உளவுத்துறைக்குக் கிடைத்த ரகசியத் தகவலின் அடிப்படையில், கவுண்டம்பாளையம் பகுதியில் உதவி ஆய்வாளர்கள் சேகர், தனபால் தலைமையிலான போலீசார் ரோந்துப் பணியில் ஈடுபட்டிருந்தனர். அப்போது கேரள மாநிலம், இடுக்கி மாவட்டத்தைச் சேர்ந்த ரமேஷ் என்பவரைப் பிடித்து விசாரித்தனர்.

விசாரணையில், கோவையில் உள்ள இளைஞர்கள் மற்றும் ஐ.டி. நிறுவன ஊழியர்களுக்கு இவர் தொடர்ந்து இந்த போதைப்பொருளை விற்பனை செய்து வந்தது தெரியவந்தது. இவரிடமிருந்து 80 கிராம் மெத்தாம்பெட்டமைன், இரண்டு செல்போன்கள் ஆகியவற்றைப் பறிமுதல் செய்த போலீசார், ரமேஷையும் கைது செய்து நீதிமன்றத்தில் ஆஜர்படுத்தி சிறையில் அடைத்தனர்.

கோவையில் போதைப்பொருள் கடத்தல் மற்றும் விற்பனை தொடர்ந்து அதிகரித்து வருவதால், போலீசார் தீவிர கண்காணிப்பில் ஈடுபட்டுள்ளனர்.