“பிரதமர் அனைத்து கட்சிக் கூட்டத்துக்கு வருவதே இல்லை” - திருச்சி சிவா டெல்லியில் பேட்டி!

இந்தாண்டுக்கான நாடாளுமன்ற குளிர்கால கூட்டத்தொடர் நாளை (01.12.2025) தொடங்க உள்ளது. இந்த கூட்டத்தொடர் வரும் டிசம்பர் 19ஆம் தேதி நடைபெறும் என்று தெரிவிக்கப்பட்டுள்ளது. இந்த கூட்டத்தொடரில், 14 மசோதாக்கள் தாக்கல் செய்யப்படவுள்ளதாகக் கூறப்படுகிறது.

அதே சமயம், எதிர்க்கட்சிகள் சார்பில் தேர்தல் ஆணையத்தால் மேற்கொள்ளப்பட்டு வரும் வாக்காளர் பட்டியல் சிறப்பு தீவிர திருத்தம் (எஸ்.ஐ.ஆர்), டெல்லி கார் வெடிப்பு சம்பவம், விலைவாசி உயர்வு, பணவீக்கம்,  வருமான வரித்துறை, அமலாக்கத்துறை, சிபிஐ போன்ற விசாரணை அமைப்புகளை கொண்டு எதிர்க்கட்சிகளை முடக்குவது போன்ற பிரச்சனைகளை எழுப்பக்கூடும் எதிர்பார்க்கப்படுகிறது  இந்த நாடாளுமன்றக் கூட்டத்தொடர் இன்று (30-11-25) நாடாளுமன்றத்தில் அனைத்து கட்சிக் கூட்டம் நடைபெற்றது.

நாடாளுமன்ற விவகாரத்துறை அமைச்சர் கிரண் ரிஜிஜூ தலைமையில் நடைபெற்ற இந்த கூட்டத்தில், அனைத்து கட்சி எம்.பிக்களும் பங்கேற்று பேசியுள்ளனர். இந்த கூட்டத்தில் பங்கேற்றப் பின்பு திமுக எம்.பிக்களான டி.ஆர்.பாலு மற்றும் திருச்சி சிவா ஆகியோர் டெல்லியில் செய்தியாளர்களைச் சந்தித்துப் பேசினர்.  அப்போது திமுக எம்.பி டி.ஆர்.பாலு கூறுகையில், “தேர்தல் ஆணையத்தின் வாக்காளர் பட்டியல் தீவிரத் திருத்தம் தேவையற்றது. அதனால் எஸ்.ஐ.ஆருக்கு எதிராக நாடாளுமன்றத்தில் குரல் எழுப்புவோம். தமிழ்நாட்டுக்கான கல்வி நிதியை வழங்க வலியுறுத்தியும் நாடாளுமன்றத்தில் குரல் எழுப்புவோம்” என்று கூறினார்.

இதையடுத்து பேசிய திருச்சி சிவா, “1952இல் நாடாளுமன்றம் செயலாற்ற தொடங்கியதற்கு பின்னால் இதுவரை இல்லாத அளவிற்கு வெறும் 19 நாட்கள் தான் இந்த குளிர்காலக் கூட்டத்தொடர் நடைபெற இருக்கிறது. ஆண்டிற்கு குறைந்தது 75 நாட்களாவது நாடாளுமன்றம் வேலை செய்ய வேண்டும். நாங்கள் 100 நாட்கள் என்று எதிர்பார்க்கிறோம். ஆனால் அந்த அளவிற்கு இல்லை என்பதை விட நாளாக நாளாக குறைந்து வருகிறது. இந்த அரசுக்கு நாடாளுமன்ற விவாதங்களின் மீது நடைமுறைகளின் மீதும் நம்பிக்கை இல்லை என்பதற்கு வெளிப்படுத்துவதற்கான பலவகைகளில் இதுவும் ஒன்று.  இந்த 19 நாட்களில் 4 நாட்கள் சனி ஞாயிறுகிழமை விடுமுறை, மீதி 15 நாட்கள் நடக்கிறது. அனைத்து கட்சி கூட்டத்திற்கு பிரதமர் ஒரு முறை கூட வந்ததே இல்லை.  

நாங்கள் எவ்வளவோ சொல்லி பார்த்துவிட்டோம்.  இத்தனை அரசியல் கட்சிகள் உங்களை நம்பி  மதித்து வருகிற போது ஏன் பிரதமர் வரக்கூடாது. ஆனால், ஒரு முறை கூட அவர்  வருவதில்லை. வழக்கம் போல ராஜ்நாத் சிங் வந்து உட்காருகிறார், கேட்டு கொள்கிறார்கள், கிளம்பி விடுகிறார்கள். ஆக இன்னும்  எதிர்பார்ப்புடனும் நம்பிக்கையுடன் சொல்லிக் கொண்டிருக்கிறோம் ஆனால் பலன் இல்லை. அவையிலும் பேசுவதற்கு வாய்ப்பு மறுக்கப்படுகிறது. மீறி நாங்கள் குரல் எழுப்பினால் அவை நடவடிக்கை குந்தகம் விளைவிக்கிறோம் என்ற பழி சுமத்தப்படுகின்றது. மக்கள் தான் இதை  தீர்மானிக்க வேண்டும்.   பா.ஜ.கஆட்சி நடத்துகிற இந்த  காலகட்டத்தில் நாடாளுமன்ற நெறிமுறைகள் காற்றிலே பறக்கவிடப்படுகின்றன.  நாடாளுமன்றம் நடைபெறுகின்ற நாட்கள்  குறைக்கப்படுகின்றன. எதிர்கட்சிகளுக்கு பேசுவதற்கான வாய்ப்பில்லை. ஆனால் இதன்  பெயர் ஜனநாயக நாடு. ஆனால் ரெண்டே முக்கால் மணி நேரம் நடக்குது. எல்லா கட்சிகளும் நம்பி பேசுகிறார்கள். கேட்டுக்கொள்கிறார்களே தவிர ஒரு பதில் கூட  கிடையாது. ஆக நாங்கள் போராடி கொண்டே இருக்கிறோம், தீர்வு இல்லை” என்று கூறினார்.