காட்டுப் பன்றிக்கு அமைத்த மின்வேலி; விவசாயிக்கு நேர்ந்த சோகம்!

தூத்துக்குடி மாவட்டம் கயத்தாறு அருகே ஆத்திகுளம் கிராமத்தில் சுடலைமாடசாமி சுவாமி கோவில் தெருவைச் சேர்ந்தவர் சிவனுகோனார் மகன் வடிவேல் (60). இவர், தனது வீட்டின் அருகே உள்ள தோட்டத்தில் 5 ஏக்கர் நிலத்தில் மக்காச்சோளம் பயிர் விவசாயம் செய்து வருகிறார்.

இந்த நிலையில் நேற்று தோட்டத்திற்கு சென்று மக்காச்சோளப்பயிரில் தண்ணீர் பெருகி இருக்கிறதா என பார்க்க சென்ற வடிவேல் மின் வேலிக்கு மின்சார இணைப்பு கொடுத்ததை மறந்து அந்த கம்பியில் மிதித்துள்ளார். அதில் மின்சாரம் தாக்கி தூக்கி வீசப்பட்டதில் சம்பவ இடத்திலேயே பரிதாபமாக உயிரிழந்தார். இதனிடையே, அவரது மனைவி தனது கணவர் வீட்டிற்கு வெகுநேரமாகியும் வரவில்லையே என நினைத்து தோட்டத்திற்கு சென்று பார்த்த போது அங்கு அவர் மின்சாரம் தாக்கியதில் இறந்தது தெரியவந்தது. உடனடியாக வீட்டிற்கு வந்து உறவினர்களிடம் கூறவே அவர்கள் மின்வாரிய அதிகாரிகளுக்கு தகவல் கொடுத்தனர்.

பின்னர் அவரது உடலை கைப்பற்றி பிரேதப் பரிசோதனைக்காக அனுப்பி வைத்தனர். மேலும் இது குறித்து போலீசார் வழக்கு பதிவு செய்து விசாரணை நடத்தி வருகின்றனர். இறந்து போன வடிவேலுக்கு சுப்புத்தாய் என்ற மனைவியும் ஐந்து மகள்களும் உள்ளனர். இந்தப் பகுதியில் காட்டுப்பன்றிகள் அதிக அளவில் நடமாடுவதால் பயிர்கள் சேதம் ஏற்பட்டு வருகிறது. கடந்த சில நாட்களுக்கு முன்பு மூன்று ஆண்கள் ஒரு பெண் தோட்டத்தில் வேலை பார்த்தபோது பன்றிகள் அவர்களை கடித்து ஆபத்தான நிலையில் சிகிச்சையில் உள்ளனர். மேலும் இப்பகுதியில் ஆயிரத்திற்கும் மேற்பட்ட பன்றிகள் திரிவதால் பாதுகாப்பு இல்லாமல் பயிர் செய்ய முடியவில்லை. ஆகவே தமிழக அரசு, மாவட்ட நிர்வாகம் உடனடியாக இப்பகுதியில் திரியும் பன்றிகளை கட்டுப்படுத்தக் கோரி விவசாயிகள் மற்றும் பொதுமக்கள் கோரிக்கை விடுத்துள்ளனர்.